توقايەۆ ياساۋي مۇراسىنا قاتىستى اۋقىمدى يدەولوگيالىق جۇمىس باستالاتىنىن ايتتى

— بۇگىنگى ساپاردىڭ سيمۆولدىق ءمانى تەرەڭ، ويتكەنى ەكى ەل تاۋەلسىزدىگىنىڭ 35 جىلدىعىنا تۇسپا-تۇس كەلىپ وتىر. ەگەمەن ەل بولعالى قازاقستان دا، تاجىكستان دا تابىسقا تولى ۇلكەن جولدى ەڭسەردى. تاجىكستان ءسىزدىڭ بەدەلدى باسشىلىعىڭىزبەن مەملەكەتتىلىك تۇعىرىن نىعايتۋدا، الەۋمەتتىك- ەكونوميكالىق دامۋدا وراسان جەتىستىكتەرگە قول جەتكىزدى، حالىقارالىق ارەنادا ابىرويىن ارتتىردى. ءسىزدىڭ ەلىڭىز ورتالىق ازياداعى تۇراقتىلىق پەن قاۋىپسىزدىكتى قامتاماسىز ەتۋدە ماڭىزدى ءرول اتقارادى. بۇگىنگى تاجىكستاننىڭ بارلىق تابىسىن ءسىزدىڭ ەسىمىڭىزبەن جانە حالىقتىڭ قولداۋىنا ارقا سۇيەگەن پاراساتتى ءارى جاسامپاز ساياساتىڭىزبەن بايلانىستىرادى. قازاقستان قازىرگىدەي گەوساياسي احۋال كۇردەلى كەزەڭدە كۇشتى ءارى وركەندەگەن مەملەكەت قۇرۋدى كوزدەيتىن ستراتەگيالىق باعدارىڭىزعا زور قۇرمەتپەن قارايدى، — دەدى پرەزيدەنت.

مەملەكەت باسشىسى قازاقستان مەن تاجىكستان اراسىندا قانداي ءدا بىر شەشىلمەگەن نەمەسە ءتۇيىنى تارقامايتىن ماسەلە جوق ەكەنىنە، كەرىسىنشە ءوزارا ىنتىماقتاستىق ىلگەرىلەپ كەلە جاتقانىنا نازار اۋداردى. سونداي- اق تاجىكستاننىڭ ۇلتتىق كوشباسشىسى ەمومالي راحمونعا جۋىردا عانا تاعايىندالعان Qoja Ahmet Yasaui وردەنىن تابىستاعانىن ايتتى.

— تاجىكستان پرەزيدەنتىنىڭ ءبىلىم، عىلىم، مادەنيەت سالالارىنا جانە حالىقارالىق قوعامداستىققا سىڭىرگەن ەلەۋلى ەڭبەگىنە قۇرمەت رەتىندە بەرىلگەن بۇل ماراپاتتىڭ ءمانى ايرىقشا. قوجا احمەت ياساۋي — وڭىرىمىزگە ءبىلىمپازدىق، گۋمانيزم جانە وركەندەۋ قاعيداتتارىن تۋ ەتكەن ءىلىمدى تاراتقان جاھاندىق اۋقىمداعى تۇلعا. ءبىزدىڭ قازىرگى بولمىس-ءبىتىمىمىزدىڭ قالىپتاسۋىنا قوجا احمەت ياساۋيدىڭ دە ۇلەسى بار. ونىڭ ءىلىمى قازاق حالقىنىڭ دىلىنە، ەتنيكالىق ءتۇپ-تامىرىنا جانە دۇنيەتانىمىنىڭ دامۋىنا ىقپال ەتتى. سوندىقتان مەن بۇكىل ەل كولەمىندە جوعارى سىنىپتاردان باستاپ ۋنيۆەرسيتەتتەردە، اسكەر قاتارىندا، قۇقىق قورعاۋ ورگاندارىندا جانە باسقا دا مەكەمەلەردە ياساۋي ۇلاعاتىنىڭ ءمان- ماعىناسىن ءتۇسىندىرۋ جۇمىستارىن ۇيىمداستىرۋدى تاپسىردىم. بۇل ۋاقىتشا ناۋقان ەمەس، اۋقىمدى يدەولوگيالىق جۇمىس. اڭگىمە سوقىر سەنىم، كوزسىز ءپىر تۇتۋ تۋرالى ەمەس، كەرىسىنشە، ۇلى ويشىل، عۇلاما قوجا احمەت ياساۋيدىڭ عىلىمي، ادەبي، فيلوسوفيالىق مۇراسىن تەرەڭ تۇيسىنۋدە بولىپ وتىر. سوندىقتان اتالعان جوعارى ناگرادانى تاعايىندادىم. ءدال وسى سەبەپتى ونى بۇگىنگى قۇرمەتتى قوناعىمىز ەمومالي شاريپوۆيچ راحمونعا تابىستادىم، — دەدى قاسىم-جومارت توقايەۆ.

ايتا كەتەيىك، اقوردادا قازاقستان مەن تاجىكستاننىڭ رەسمي دەلەگاتسيالارى ۇكىمەتارالىق جانە ۆەدومستۆوارالىق دەڭگەيدە 14 قۇجاتقا قول قويدى.

5-7 -قاراشا كۇندەرى مەملەكەت باسشىسىنىڭ شاقىرۋىمەن ەلىمىزگە تاجىكستان پرەزيدەنتى ەمومالي راحموننىڭ رەسمي ساپارى ءوتىپ جاتىر.