توقايەۆ: قاعازباستىلىق كوزقاراسىنان قۇتىلا الماساق، ەش ىلگەرىلەۋ بولمايدى

— بۇعان دەيىن ەلىمىزدىڭ ۇلتتىق يدەولوگياسىنا قاتىستى كوپتەگەن تالقىلاۋ بولعانىن بىلەسىزدەر. 1- شىلدەدە زاڭدى كۇشىنە ەنگەن كونستيتۋتسيامىز وسى ماسەلەنىڭ نۇكتەسىن ءبىرجولا قويدى دەپ ايتساق، ورىندى بولار. كونستيتۋتسيادا ەلىمىزدىڭ وتكەنى، بۇگىنى جانە كەلەشەكتەگى بەينەسى ايقىن كورىنىس تاپتى. كونستيتۋتسيا پرەامبۋلاسىندا بايىرعى قازاق جەرىندە مەملەكەتتىلىگىمىزدى نىعايتىپ، ۇلى دالانىڭ مىڭداعان جىلدىق تاريحىنىڭ ساباقتاستىعىن ساقتاۋعا باسا ءمان بەرەتىنىمىز ناقتى جازىلدى. بۇل — ءتول تاريحىمىزعا تاعزىم ەتۋ، بابالار اماناتىنا ادال بولۋ دەگەن ءسوز، — دەدى پرەزيدەنت.

مەملەكەت باسشىسى سونىمەن قاتار نەگىزگى زاڭدا ادام قۇقىقتارى مەن بوستاندىعىن قورعاۋ، زاڭ مەن ءتارتىپتى ورنىقتىرۋ، بىرلىك پەن ىنتىماقتى ساقتاۋ، حالىقتىڭ ءال-اۋقاتىن ارتتىرۋ، ءبىلىم مەن عىلىمدى، يننوۆاتسيانى دامىتۋ مەملەكەتتىڭ مىزعىماس مىندەتى رەتىندە ايقىندالعانىن ايتتى.

— ءبىرتۇتاس ۇلت رەتىندە وسكەلەڭ ۇرپاق الدىنداعى اسا جوعارى جاۋاپكەرشىلىكتى سەزىنە وتىرىپ، وسى كونستيتۋتسيانى قابىلدادىق. سول ارقىلى بولاشاعى جارقىن، باعدارى ايقىن ادىلەتتى، وزىق ءارى كۇشتى قازاقستاننىڭ بەرىك نەگىزىن قالادىق. ازاماتتارىمىز كونستيتۋتسيانىڭ ەرەجەلەرىن جاقسى ءبىلىپ، كۇندەلىكتى ومىردە قولدانعان سايىن ونىڭ كۇشى دە، قۋاتى دا ارتا تۇسەدى. سول سەبەپتى مەن كونستيتۋتسيا ءار ادامنىڭ قولىندا جۇرەتىن، جۇمىس ۇستەلىندە تۇراتىن، جەكە كىتاپحاناسىنان ورىن الاتىن قۇجات بولۋعا ءتيىس دەپ ەسەپتەيمىن، — دەدى قاسىم-جومارت توقايەۆ.

پرەزيدەنتتىڭ پايىمىنشا، كونستيتۋتسيادا بەكىتىلگەن قاعيداتتار مەن قۇندىلىقتاردى بۇكىل ەل بولىپ دارىپتەۋىمىز كەرەك.

— ءبىراق فورماليزم مەن ناۋقانشىلدىقتان الشاق بولعانىمىز ءجون، ايتپەسە، وسى اسا ماڭىزدى جۇمىستى قۇرتىپ، حالقىمىزدىڭ الدىندا ۇياتقا قالامىز. باياعى جارتاس — سول جارتاس بولىپ، قاعازباستىلىق كوزقاراسىنان قۇتىلا الماساق، ەش ىلگەرىلەۋ بولمايدى. بۇل جۇمىستى شىن جۇرەگىمىزبەن، اق نيەتىمىزبەن اتقارماساق، قاجەتتى ناتيجەگە جەتۋ وتە قيىن بولادى، — دەدى مەملەكەت باسشىسى.

ايتا كەتەيىك، كەشە حالىق كەڭەسىنىڭ ۇيىمداستىرۋشىلىق وتىرىسى ءوتتى. جيىندا مەملەكەت باسشىسى قاسىم-جومارت توقايەۆ قازاقستان حالىق كەڭەسى ءتوراعاسى قىزمەتىنە ەرلان قوشانوۆتىڭ كانديداتۋراسىن ۇسىندى.

ۇسىنىس كەڭەس مۇشەلەرى تاراپىنان قولداۋ تاپتى.