توقايەۆ مەملەكەتتىك كومپانيالارداعى جەمقورلىقتى ازايتۋعا 24-قاراشاعا دەيىن ۋاقىت بەردى
استانا. KAZINFORM - مەملەكەت باسشىسى ۇكىمەت پەن باقىلاۋشى ورگاندارعا سىبايلاس جەمقورلىققا قاتىستى قۇقىقبۇزۋشىلىقتاردى بارىنشا ازايتۋ جونىندە ۇسىنىس بەرۋدى تاپسىردى، دەپ حابارلايدى اقوردانىڭ باسپا ءسوز قىزمەتى.
مەملەكەت باسشىسىنىڭ سوزىنشە، جوعارى لاۋازىمعا يە بولۋ - ءارقاشان جانە ءاردايىم جۇكتەلەتىن جوعارى جاۋاپكەرشىلىكتى دۇرىس ءتۇسىنۋ دەگەن ءسوز.
— قوعامىمىزدا اتقاراتىن لاۋازىمىنا، سىڭىرگەن ەڭبەگىنە نە بولماسا تامىر- تانىستارىنا، سونىڭ ىشىندە تۋىستىق بايلانىستارىنا قاراماستان، ەشكىم دە زاڭنان اتتاپ كەتە المايدى. بۇل - مەن ءۇشىن مىزعىمايتىن، ياعني وزگەرمەيتىن ۇستانىم، - دەدى ول.
قاسىم-جومارت توقايەۆ سوڭعى كەزدە كەيبىر كەلىسىمدەر مەن شارتتاردى قايتا قاراعاندارىن، ولارعا قول قويۋ قاتە شەشىم بولعانىن ايتتى.
— ءبىراق بيلىكتىڭ كاسىپكەرلەرگە كەدەرگىلەر، توسقاۋىلدار جاسايتىن ويى دا، نيەتى دە جوق. كەرىسىنشە، ءبىز ولارعا ءاردايىم جان-جاقتى قولداۋ كورسەتىپ جاتىرمىز جانە الداعى ۋاقىتتا دا سولاي بولادى. ءبارىڭىز دە بىلەسىزدەر، مەن كەلەسى جىلدىڭ 1-قاڭتارىنان باستاپ شاعىن كاسىپكەرلىكتى تەكسەرۋگە ارنالعان تاعى ءبىر ءۇش جىلدىق موراتوري جاريالاۋ تۋرالى تاپسىرمامدى بەردىم. ەلىمىزدە بىرتىندەپ ورنىعىپ جاتقان «زاڭ مەن ءتارتىپ» قۇقىقتىق ستراتەگياسىنىڭ تۇپكى ءمانى دە - وسى: ادىلەتتىلىك قاعيداتىنا جانە زاڭ تالاپتارىنا ساي كومەككە مۇقتاج ادامدارعا، سونداي-اق كاسىپورىندارعا قولداۋ كورسەتۋ، - دەدى پرەزيدەنت.
مەملەكەت باسشىسى جاعداي قانشالىقتى كۇردەلى بولسا دا «سامۇرىق-قازىنا» ۇلتتىق ءال-اۋقات قورىنىڭ اپپاراتى مەن مەملەكەتتىك كومپانيالاردىڭ، سونىڭ ىشىندە «قازاقستان تەمىر جولىنىڭ» جۇمىسى توقتاپ قالمايدى، ۇزدىكسىز جۇرە بەرەتىنىن العا تارتتى.
— مەملەكەتتىك كومپانيالارعا قاراستى بارلىق مەكەمەلەر قالىپتى تارتىپپەن جۇمىس ىستەپ جاتىر. جالپى، بۇعان ەشقانداي سەبەپ تە جوق. كەرىسىنشە، جەمقورلىققا قارسى جۇرگىزىلىپ جاتقان كۇرەس ينۆەستورلار مەن نەسيە بەرۋشىلەردىڭ اتالعان ينستيتۋتقا دەگەن سەنىمىن ارتتىرىپ، ولاردىڭ مەيلىنشە ءتيىمدى، اشىق جانە جەمىستى جۇمىس ىستەۋىنە مۇمكىندىك بەرەدى دەپ سانايمىن، - دەدى ول.
پرەزيدەنت باس پروكۋراتۋرا جالپى سوماسى 1,3 تريلليون تەڭگەدەن اساتىن زاڭسىز يەمدەنگەن اكتيۆتەردى قايتارعانىن ەسكە سالدى. بۇل قاراجات 466 الەۋمەتتىك جانە ينفراقۇرىلىمدىق نىساننىڭ قۇرىلىسىنا جۇمسالدى. قازىرگى تاڭدا 383 نىسان، سونىڭ ىشىندە مەديتسينالىق مەكەمەلەر، سۋمەن جابدىقتاۋ جەلىلەرى، مەكتەپتەر، سپورت كەشەندەرى سالىنىپ ءبىتتى. جۇمىس جالعاسا بەرەدى.
— قالىپتاسقان جاعدايعا قاراعاندا، نىساندار قانشالىقتى ساپالى سالىنعانىن تەكسەرۋگە سەبەپ بار سياقتى. ويتكەنى نىسانداردىڭ، سونىڭ ىشىندە جولداردىڭ ساپاسى تالاپقا ساي بولمايتىن جاعداي ءجيى كەزدەسەدى. دەگەنمەن وسى وقيعانىڭ ءوزى جەمقورلىققا قاتىستى قۇقىق بۇزۋشىلىقتار مەملەكەتتىك كومپانيالاردىڭ ەڭ وسال تۇسى، ياعني، باستى دەرتى ەكەنىن ايقىن كورسەتىپ وتىر. وسى ورايدا، ۇكىمەت پەن باقىلاۋشى ورگاندار بيىل 24 -قاراشاعا دەيىن سىبايلاس جەمقورلىققا قاتىستى قۇقىقبۇزۋشىلىقتاردى بارىنشا ازايتۋ، كۆازيمەملەكەتتىك سەكتورداعى كومپانيالار مەن ولاردىڭ قىزمەتكەرلەرىنىڭ جۇمىس ساپاسىن ايتارلىقتاي جاقسارتۋ جونىندە ماعان ۇسىنىس بەرسىن، — دەپ تاپسىردى توقايەۆ.
ەسكە سالساق، كەشە ۇ ق ك «سامۇرىق-قازىنا» ا ق باسقارما ءتوراعاسى ن. جاقىپوۆ، «ق ت ج» ۇ ك» ا ق باسقارما ءتوراعاسى ە. وتىنشيەۆ جانە سىبايلاس جەمقورلىق قىلمىسىن جاسادى دەگەن كۇدىككە ىلىنگەن وزگە دە تۇلعالار ۇستالعانىن حابارلادى.
