توقايەۆ: فرانسيا - قازاقستاننىڭ ەۋروپاداعى وتە ماڭىزدى سەرىكتەسى

 مەملەكەت باسشىسى قاسىم-جومارت توقايەۆ اقورداداعى فرانسيا پرەزيدەنتى ەممانيۋەل ماكرونمەن كەڭەيتىلگەن قۇرامداعى كەزدەسۋىندە ەكىجاقتى بايلانىستاردىڭ باسىم باعىتتارىن اتادى، دەپ حابارلايدى Kazinform اگەنتتىگى. 

«بۇگىنگى كەزدەۋ ەكى ەل اراسىنداعى ءتۇرلى سالالارداعى ىنتىماقتاستىقتى جاڭا بەلەسكە كوتەرەدى. مەن بۇعان كامىل سەنەمىن. فرانسيا - قازاقستاننىڭ ەۋروپاداعى وتە ماڭىزدى ءارى سەنىمدى سەرىكتەسى. بىلتىر ءوزارا تاۋار اينالىمى 30 پايىزعا ءوسىپ، 4 ميلليارد دوللارعا جەتتى. بيىل سەگىز اي ىشىندە ەكىجاقتى ساۋدا-ساتتىق كولەمى بىلتىرعىمەن سالىستىرعاندا 21 پايىزعا ارتتى. ياعني، 2,7 ميلليارد دوللارعا جەتتى»، - دەدى قازاقستان باسشىسى.

قاسىم-جومارت توقايەۆ فرانسيا وسىعان دەيىن قازاقستانعا 18,7 ميلليارد دوللارعا جۋىق ينۆەستيتسيا سالعانىن اتاپ ءوتتى.

«بىرلەسكەن جوبالار ەنەرگەتيكا، بەيبىت اتوم، تاۋ- كەن- حيميا ونەركاسىبى، ماشينا جاساۋ، قۇرىلىس زاتتارىن ءوندىرۋ، اەروعارىش، فارماتسەۆتيكا جانە باسقا دا سالالاردى قامتيدى. بۇدان بولەك تاعى ءبىرقاتار ماڭىزدى جوبالار قولعا الىنباق. بۇل جوبالار بۇگىن وتەتىن قازاق- فرانسۋز بيزنەس فورۋمىندا جان-جاقتى تالقىلانادى»، - دەدى قازاقستان پرەزيدەنتى.

سونداي-اق، مەملەكەت باسشىسى ەكى ەلدىڭ مادەني-گۋمانيتارلىق بايلانىستارى جاندانا تۇسكەنىن ەسكە سالدى.

«ماكرون مىرزا، وسىنىڭ ءبارى ءسىزدىڭ جەكە قولداۋىڭىزدىڭ ارقاسىندا جۇزەگە اسىپ جاتىر. مەن ءسىزدىڭ ءوزارا قارىم- قاتىناستى دامىتۋعا قوسىپ وتىرعان ولشەۋسىز ۇلەسىڭىزدى جوعارى باعالايمىن. سونداي-اق، ەكى ەلدىڭ ىنتىماقتاستىعىن جاڭا بەلەسكە كوتەرۋ ءۇشىن بار كۇش- جىگەرىمدى سالىپ، وزىڭىزبەن بىرگە جۇمىس ىستەۋگە دايىن ەكەنىمدى تاعى دا اتاپ وتكىم كەلەدى»، - دەدى ق. توقايەۆ.

اۆتور

ەسىمجان ناقتىباي