توقايەۆ ءماجىلىس ءتوراعاسى ەرلان قوشانوۆتى قابىلدادى
استانا. KAZINFORM - ءماجىلىس ءتوراعاسى ەرلان قوشانوۆ قاسىم-جومارت توقايەۆقا پرەزيدەنت رەفورمالارىن زاڭنامالىق تۇرعىدان قامتاماسىز ەتۋ اياسىندا پالاتانىڭ اتقارعان قىزمەتى تۋرالى باياندادى، دەپ حابارلايدى اقوردانىڭ باسپا ءسوز قىزمەتى.
ءماجىلىس ءتوراعاسىنىڭ ايتۋىنشا، سەسسيا باستالعاننان بەرى 31 زاڭ قابىلدانىپ، سەناتقا جولداندى، سونداي-اق 15 زاڭعا پرەزيدەنت قول قويدى. ولاردىڭ ىشىندە بيۋدجەت كودەكسى، بيرجالىق ساۋدا ماسەلەلەرى بويىنشا زاڭدار، ەسىرتكى قىلمىسى ءۇشىن جازانى قاتاڭداتۋ، «كەلەشەك» ءبىرىڭعاي ەرىكتى جيناقتاۋشى جۇيەسىن ەنگىزۋ، سوتتاردى جاڭعىرتۋ، اكىمشىلىك زاڭنامانى جەتىلدىرۋ جانە تاعى باسقالارى بار.
قازىر دەپۋتاتتار 71 زاڭ جوباسىن قاراپ جاتىر. سالىق، سۋ، قۇرىلىس، سيفرلىق كودەكستەرى مەن تۇتىنۋشىلار قۇقىعىن قورعاۋ، تۇرعىن ءۇي قۇرىلىسىنا ۇلەستىك قاتىسۋ ماسەلەسى، قارجى نارىعىن دامىتۋ، اسكەري- پاتريوتتىق تاربيە، پوشتا سەكىلدى زاڭ جوبالارى بويىنشا جۇمىس جۇرگىزىلۋدە.
پرەزيدەنتتىڭ اتىراۋدا وتكەن ۇلتتىق قۇرىلتايدا بەرگەن تاپسىرماسىن ورىنداۋ ماقساتىندا دەپۋتاتتار قىز الىپ قاشقانى ءۇشىن بەرىلەتىن جازانى قاتاڭداتۋ جونىندە تۇزەتۋلەر دايىنداپ جاتىر.
دەپۋتاتتار بيۋدجەت شىعىندارىنا پارلامەنتتىك باقىلاۋ جۇمىستارىن ۇدايى جۇرگىزىپ كەلەدى. جۋىردا جوعارى اۋديتورلىق پالاتا ءتوراعاسىنىڭ اۋىل شارۋاشىلىعىن مەملەكەتتىك سۋبسيديالاۋدىڭ تيىمدىلىگى تۋرالى ەسەبى تىڭدالدى.
سپيكەردىڭ ايتۋىنشا، ءماجىلىس زاڭ شىعارۋ جۇمىسىنىڭ اشىقتىعىنا، وعان قوعام مەن ساراپشىلار قاۋىمداستىعىن تارتۋعا ەرەكشە ءمان بەرەدى. قوعامدىق پالاتانىڭ وتىرىستارى تۇراقتى تۇردە وتكىزىلەدى.
بارلىق پارتيالىق فراكسيا دەپۋتاتتارى مەن ءبىر مانداتتىق وكرۋگتەردەن سايلانعان حالىق قالاۋلىلارى سايلاۋشىلارىمەن ءجيى كەزدەسۋلەر وتكىزىپ، ازاماتتاردى قابىلداپ، وڭىرلەرگە ساپارلايدى.
ءماجىلىس ءتوراعاسى پارلامەنتتىك ديپلوماتيا باعىتىنداعى جۇمىستىڭ قورىتىندىلارى جونىندە مالىمەت بەردى.
ەرلان قوشانوۆ «AMANAT» پارتياسىنىڭ «اۋىل اماناتى» جانە «جەر اماناتى»، سونداي-اق مەملەكەت باسشىسىنىڭ حالىقتىڭ قارجىلىق ساۋاتىن ارتتىرۋ جونىندەگى تاپسىرماسىن ورىنداۋ بويىنشا اتقارىلىپ جاتقان «قارىزسىز قوعام» جوبالارى تۋرالى ايتتى.
ەسكە سالساق، بۇدان بۇرىن مەملەكەت باسشىسى جاساندى ينتەللەكتتى دامىتۋ جونىندەگى كەڭەس قۇرۋدى تاپسىردى.
