توقايەۆ: بەلگيا - قازاقستاننىڭ ەۋروپاداعى سەنىمدى سەرىكتەسى
استانا. KAZINFORM — قازاقستان پرەزيدەنتى بەلگيالىقتار كورولىمەن جانە پاتشايىمىمەن شاعىن قۇرامدا كەلىسسوز جۇرگىزدى. بۇل تۋرالى اقوردانىڭ باسپا ءسوز قىزمەتى حابارلادى.
كەلىسسوز بارىسىندا پرەزيدەنت بەلگيالىقتار كورولى مەن پاتشايىمىنىڭ قازاقستانعا جاساعان العاشقى مەملەكەتتىك ساپارى ەكىجاقتى سەرىكتەستىكتىڭ جاڭا كەزەڭىنە جول اشاتىن تاريحي ۋاقيعا ەكەنىن اتاپ ءوتتى.
- ءسىزدى استانادا قارسى العانىما قۋانىشتىمىن. بۇل - مەن ءۇشىن زور مارتەبە. تاريحي ساپارىڭىز جۇرتشىلىقتىڭ ۇلكەن قىزىعۋشىلىعىن تۋدىردى. قازاقستانعا كەلگەن دەلەگاتسيا قۇرامىنا ۇكىمەت پەن ايماقتىق بيلىك، ىسكەرلىك توپتار، اكادەميالىق قاۋىمداستىق جانە بۇقارالىق اقپارات قۇرالدارى وكىلدەرى ەنگەن. ءسىز تاق مۇراگەرى رەتىندە قازاقستانعا ءۇش مارتە كەلگەن ەدىڭىز. ەلىمىزبەن قارىم-قاتىناستى دامىتۋ جونىندەگى نيەتىڭىزدى جوعارى باعالايمىز. ءسىزدىڭ قولداۋىڭىزدى ءاردايىم سەزىنەمىز، - دەدى قاسىم-جومارت توقايەۆ.
قاسىم-جومارت توقايەۆ بەلگيانى قازاقستاننىڭ ەۋروپاداعى ۋاقىت سىنىنان وتكەن سەنىمدى سەرىكتەسى دەپ سانايتىنىن جەتكىزدى.
- كەلەسى جىلى ەلدەرىمىزدىڭ اراسىندا ديپلوماتيالىق قارىم-قاتىناس ورناعانىنا 35 جىل تولادى. وسى جىلداردا شىنايى دوستىق پەن ءوزارا قۇرمەتكە نەگىزدەلگەن تىعىز قارىم-قاتىناستى جولعا قويدىق. ۇزدىكسىز ساياسي ديالوگ ىنتىماقتاستىعىمىزدىڭ بەرىك تۇعىرى ىسپەتتەس. ءبىز جەتىستىكتەرىڭىزدى ۇدايى قاراپ وتىرامىز. بۇل شىن مانىندە تاڭعالدىرادى. سىزدەردەن ۇلگى الىپ، تاجىريبەلەرىڭىزدى ۇيرەنۋىمىز قاجەت. بەلگياعا بەس جىل بۇرىن جاساعان ساپار بارىسىنداعى مازمۇندى كەلىسسوزدەردى ىقىلاسپەن ەسكە الامىن. بيىل ماۋسىم ايىندا بەلگياعا بارعان ساپارىمدا پرەمەر-مينيستر بارت دە ۆيەۆەرمەن كەلىسسوز جۇرگىزىپ، سەرىكتەستىكتى نىعايتۋعا قوس تاراپ تا بەيىل ەكەنىن راستادىق، - دەدى مەملەكەت باسشىسى.
كورول فيليپپ پەن پاتشايىم ماتيلدا قوناقجايلىعى جانە سىي-قۇرمەتى ءۇشىن قازاقستان پرەزيدەنتىنە شىنايى ريزاشىلىعىن ءبىلدىردى.
ولار ەلىمىزدىڭ الەۋمەتتىك-ەكونوميكالىق تابىستارىنا جانە حالىقارالىق ارەناداعى بيىك ابىروي-بەدەلىنە ارنايى توقتالدى.
- قازاقستان - ءبىز ءۇشىن قارقىندى دامىپ كەلە جاتقان وتە ماڭىزدى ەل. جالپى، بەلگيا تۇتاس ورتالىق ازيا وڭىرىنە ايرىقشا قىزىعۋشىلىقپەن قارايدى. بۇل ءوڭىردىڭ ءمانى زور. مەنىمەن بىرگە ۇلكەن دەلەگاتسيا كەلدى. البەتتە، ءبىز ءبىر-ءبىرىمىزدى وتە جاقسى بىلەمىز. ەلدەرىمىز 35 جىل ىشىندە جاقسى قارىم-قاتىناس ورناتتى. ءبىز وسى تاريحي مەجەنى بىرگە اتاپ وتۋگە نيەتتىمىز. سونىمەن قاتار ىنتىماقتاستىعىمىزدى جاڭا ساپالى دەڭگەيگە كوتەرەتىنىمىزگە سەنىمدىمىن. مەنىمەن بىرگە كەلگەن دەلەگاتسيا قۇرامىنا كەلەشەككە باعدارلانعان ءتۇرلى سالانىڭ وكىلدەرى كىردى. پرەزيدەنت مىرزا، بىزبەن بىرگە ءجۇرۋ ءۇشىن جۇمىس كەستەڭىزدى وزگەرتكەنىڭىزدى بىلەمىن. وسى ىقىلاسىڭىزعا ءتانتىمىز. سوندىقتان التىن ۋاقىتىڭىزدى ءبولىپ، قۇرمەت كورسەتكەنىڭىزدى جوعارى باعالايمىز، - دەدى بەلگيالىقتار كورولى فيليپپ.
ايتا كەتەلىك بەلگيالىقتار كورولى فيليپپ پەن ماتيلدا پاتشايىم اقورداعا كەلگەن ەدى.
