توقايەۆ بالادجي شرينيۆاسانمەن كەزدەستى: قازاقستاندا Network School ىسكە قوسىلدى
استانا. KAZINFORM - قاسىم-جومارت توقايەۆ Network School جوباسىنىڭ قازاقستانداعى تەحنولوگيالىق ەكوجۇيەنىڭ قالىپتاسۋىنا قوسقان ۇلەسىن جوعارى باعالاپ، ىنتىماقتاستىقتى نىعايتۋعا دايىن ەكەنىن جەتكىزدى. بۇل تۋرالى اقوردا ءمالىم ەتتى.
پرەزيدەنت ەلىمىز تەحنولوگيانى تەرەڭ مەڭگەرگەن كوشباسشىلاردىڭ جاڭا بۋىنىن تاربيەلەۋ ءۇشىن ءبىلىم، عىلىم جانە سيفرلىق قۇزىرەتكە بەلسەندى ينۆەستيتسيا سالىپ جاتقانىنا نازار اۋداردى.
وسى ورايدا، مەملەكەت باسشىسى جوبانىڭ نەگىزىن قالاۋشىعا جۋىرداعى جولداۋىندا جاريالانعان «حالىقتىق قۇرىلىس» باستاماسى كەلەشەك ۇرپاققا ماڭىزدى ءارى شىن مانىندە سالماقتى مۇرا قالدىرۋعا مۇمكىندىك بەرەتىنىن ايتتى.
- باعدارلاما اياسىندا جاپپاي الەۋمەتتىك ينفراقۇرىلىم نىساندارىن، سونىڭ ىشىندە مەكتەپتەر، ۋنيۆەرسيتەتتەر مەن مەديسينا مەكەمەلەرىن سالۋ جوسپارلانىپ وتىر. قاسىم-جومارت توقايەۆ استانادا Network School Kazakhstan جەلىسىنىڭ ىسكە قوسىلۋىن جانە جوبانىڭ قازاقستان ۋنيۆەرسيتەتتەرىمەن، ستارتاپتارىمەن، سونداي-اق تەحنولوگيالىق كاسىپورىندارىمەن سەرىكتەستىكتى كەڭەيتۋ نيەتىن قۇپتادى، — دەلىنگەن حابارلامادا.
سونىمەن قاتار پرەزيدەنت Astana AI Film فەستيۆالىنە ينۆەستيتسيالىق تۇرعىدان قولداۋ كورسەتكەنى ءۇشىن بالادجي شرينيۆاسانعا ريزاشىلىعىن ءبىلدىردى. Network School نەگىزىن قالاۋشى قازاقستاندا وزىق تەحنولوگيالىق شەشىمدەر مەن ەكونوميكانىڭ ءداستۇرلى سالالارى ۇيلەسىم تاۋىپ وتىرعانىن ايرىقشا اتاپ ءوتتى.
بالادجي شرينيۆاسان Network School Kazakhstan جوباسىنىڭ باسىم باعىتتارىن تانىستىردى. وندا سيفرلىق شەشىمدەردى ىلگەرىلەتۋ، ادام كاپيتالىن دامىتۋ جانە يننوۆاتسيالىق ازىرلەمەلەردى ەنگىزۋگە قولايلى جاعداي جاساۋ كوزدەلگەن.
مەملەكەت باسشىسى ەلىمىزدەگى جاساندى ينتەللەكت پەن يننوۆاتسيانى دامىتۋعا قوسقان ۇلەسى ءۇشىن بالادجي شرينيۆاساندى II دارەجەلى «دوستىق» وردەنىمەن ماراپاتتادى.
