توقايەۆ ب ۇ ۇ-نى رەفورمالاۋعا قاتىستى پايىمىمەن ءبولىستى
استانا. KAZINFORM - پرەزيدەنت قاسىم-جومارت توقايەۆ Al Jazeera تەلەارناسىنا بەرگەن ەكسكليۋزيۆ سۇحباتىندا بىرىككەن ۇلتتار ۇيىمىن رەفورمالاۋعا قاتىستى پايىمىمەن ءبولىستى.
Al Jazeera: ب ۇ ۇ- دا ناقتى نەنىڭ وزگەرگەنىن قالايسىز؟ ب ۇ ۇ قاۋىپسىزدىك كەڭەسىنە نەمەسە ۆەتو قۇقىعىن پايدالانۋ تەتىگىنە قاتىستى نە ايتاسىز؟
- ەڭ الدىمەن، قاۋىپسىزدىك كەڭەسىن كەڭەيتۋ قاجەت. دامۋشى مەملەكەتتەر، مۇمكىن روتاتسيا نەگىزىندە، بىرىككەن ۇلتتار ۇيىمىنىڭ وسىناۋ نەگىزگى ورگانىنا مۇشە بولۋى كەرەك. دەگەنمەن جاپونيا، گەرمانيا سىندى ءىرى دەرجاۆالار، سونىمەن قاتار ازيا مەن افريكادان شىققان وزگە دە ەلدەر قاۋىپسىزدىك كەڭەسىنە كىرۋى ءتيىس نەمەسە قانداي دا ءبىر جولمەن ونىڭ جۇمىسىنا ارالاسۋى قاجەت. بۇل پروبلەمانىڭ ءادىل شەشىمى بولار ەدى.
ءسىز قازىر عانا كەيبىر ءىرى مەملەكەتتەردىڭ نەمەسە دەرجاۆالاردىڭ وقشاۋلانۋىن ەسكە سالعان ەدىڭىز. ءيا، مۇنداي جايت ورىن الىپ جاتىر. ءبىز بۇعان الاڭداۋشىلىقپەن قارايمىز.
Al Jazeera: كوپتەگەن ەل ونداعان جىلدار بويى ءسىز ايتىپ وتىرعانداي ب ۇ ۇ- نىڭ باستى ينستيتۋتتارىن رەفورمالاۋعا ۇندەپ كەلەدى. قازاقستان وزگە ەلدەردىڭ قولىنان كەلمەگەن ءىستى قالاي جۇزەگە اسىرا الادى؟ قازاقستاننىڭ نەگىزگى تاۋارلارعا قولجەتىمدىلىگى، اسا ماڭىزدى شيكىزاتتاردى تاسىمالداۋى ەلىڭىزگە باسىمدىق بەرە مە؟ قالاي ويلايسىز؟
- ءيا، قانداي دا ءبىر دەڭگەيگە دەيىن ءبىز ىقپال ەتۋ تەتىكتەرىن پايدالاناتىن بولامىز. قازاقستان بىرىككەن ۇلتتار ۇيىمىنا قاتىستى ءبىزدىڭ قىزمەتىمىزدە قولدانۋعا بولاتىن سيرەك كەزدەسەتىن مەتالداردىڭ جانە باسقا دا تابيعي رەسۋرستاردىڭ قوماقتى قورىنا يە ەل. ءبىراق ءبىز ب ۇ ۇ- نى رەفورمالاۋعا قاتىستى اڭگىمەدە اسىرا سىلتەمەيمىز ءارى شامامىزدى ارتىق باعالامايمىز.
ب ۇ ۇ- نى بارىنشا ءادىل، قازىرگى زاماننىڭ تالاپتارىنا مۇمكىندىگىنشە جاۋاپ بەرەتىندەي جاساۋ ءۇشىن ەڭ ءبىرىنشى كەزەكتە بارلىق مەملەكەت، ءوزىڭىز ايتقانداي ورتا دەرجاۆالار كۇش-جىگەر بىرىكتىرۋى ءتيىس دەپ سانايمىز.
ەسكە سالا كەتەيىك، بۇعان دەيىن پرەزيدەنت مۇناي تاسىمالداۋدىڭ بالاما باعىتتارىنا قاتىستى ساۋالعا جاۋاپ بەرگەن بولاتىن.
