تولەنبەگەن قارىزىڭىز بولسا، شەتەلگە شىعا المايسىز

استانا. KAZINFORM - سوت اكىمشىلىگىندە بورىشكەرلەردىڭ ەلدەن تىس جەرلەرگە شىعۋىنا بايلانىستى تۇيتكىلدى ماسەلەلەر تالقىلاندى.

ءىس-شاراعا باس پروكۋراتۋرانىڭ، ادىلەت جانە دەنساۋلىق ساقتاۋ مينيسترلىكتەرىنىڭ، ۇلتتىق قاۋىپسىزدىك كوميتەتى شەكارا قىزمەتىنىڭ، جەكە سوت ورىنداۋشىلارى رەسپۋبليكالىق پالاتاسىنىڭ وكىلدەرى، وبلىستىق جانە وعان تەڭەستىرىلگەن سوتتاردىڭ ازاماتتىق ىستەر جونىندەگى سوت القالارىنىڭ ءتوراعالارى، سوت اكىمشىلىگى اۋماقتىق دەپارتامەنتتەرىنىڭ باسشىلارى قاتىستى.

ءىس-شارانى وتكىزۋگە اتقارۋشىلىق قۇجاتتار بويىنشا بورىشكەرلەردىڭ قازاقستاننان تىسقارى جەرلەرگە شىعۋىنا ۋاقىتشا شەكتەۋلەردى توقتاتا تۇرۋ تۋرالى سوت ورىنداۋشىلارىنىڭ قاۋلىلارىنا سوتتاردىڭ سانكسيا بەرۋ پراكتيكاسىن تالداۋ ناتيجەلەرى ارقاۋ بولدى.

ادەتتە، 147 مىڭ تەڭگەدەن (40 ا ە ك) 3 ايدان استام وتەلمەگەن قارىزى بارلارعا جول ءجۇرۋ شەكتەلەدى.

شەتەلگە شىعۋعا شەكتەۋلەردىڭ توقتاتىلۋىنىڭ جالعىز سەبەبى - شەتەلدە ەمدەلۋ قاجەتتىلىگى.

تالداۋ ناتيجەلەرى كورسەتكەندەي، بيىلعى 10 اي ىشىندە سوتقا جىبەرىلگەن 1768 قاۋلىنىڭ 867 ءسى نەمەسە ءاربىر ەكىنشىسىنە سانكسيا بەرۋدەن باس تارتىلعان.

رۇقسات بەرۋدەن باس تارتۋ شەتەلدە ەمدەلۋ قاجەتتىلىگى تۋرالى دالەلدەردىڭ بولماۋىنا جانە ءوز ەلىندە ەمدەلۋ مۇمكىندىگىنىڭ بولماۋىنا بايلانىستى. مىسالى، تىزە جاراقاتىن ەمدەۋگە شەتەلدىك ەمحانانىڭ شاقىرۋىنان باسقا اۋرۋدى شەتەلدە ەمدەۋ قاجەتتىلىگى تۋرالى مەديتسينالىق قۇجاتتار ۇسىنىلماعاندىقتان، سوت سوت ورىنداۋشىسىنىڭ بورىشكەردىڭ جۇرۋىنە ۋاقىتشا شەكتەۋدى توقتاتۋ تۋرالى قاۋلىسىنا سانكسيا بەرۋدەن باس تارتقان.

سوت ورىنداۋشىلارى زاڭدا كوزدەلمەگەن نەگىزدەر بويىنشا (قىزمەتتىك ءىس-ساپارلار، جارىستارعا قاتىسۋ، جاقىن تۋىستارىن جەرلەۋ جانە ت. ب.) جول جۇرۋگە ۋاقىتشا شەكتەۋلەردى توقتاتۋ تۋرالى قاۋلىلار شىعارۋ جاعدايلارىنا جول بەرگەن.

بورىشكەرلەر ەمدەلۋ ءۇشىن ەلدەن تىس جەرلەرگە شىعۋعا نەگىز رەتىندە قازاقستاندا ءساتتى ەمدەلىپ جاتقان ءجيى كەزدەسەتىن اۋرۋلاردى (وستەوحوندروز، گاستريت، ارتريت، پۋلپيت جانە ت. ب.) كورسەتكەن. بۇل جاعدايعا قازاقستاندا ەمدەۋگە ارنالعان ءتيىستى تەحنولوگيالار مەن جابدىقتار جوق اۋرۋلار تىزبەسىنىڭ جوقتىعى ىقپال ەتىپ وتىر. توقتاتۋ مەرزىمى دە رەتتەلمەگەن.

سونىڭ سالدارىنان بورىشكەرلەر ءوز قۇقىقتارىن ءجيى پايدالانىپ، مەملەكەت بيۋجەتى مەن اليمەنتتەردى قوسا العاندا، وتەلمەگەن ميلليونداعان بەرەشەگى بار، ولارعا قاتىستى قويىلعان شەكتەۋلەر مەن تىيىمداردى «اينالىپ وتەدى».

سونىمەن قاتار، مەملەكەتتىك ورگانداردىڭ بورىشكەرلەرگە قاتىستى اقپارات الماسۋ جۇيەلەرى ءبىر-بىرىمەن جەتكىلىكتى تۇردە بىرىكتىرىلمەگەن.

بۇل ماسەلە دە سوت ورىنداۋشىلارىنا بەرىلگەن قۇجاتتاردىڭ ورىندالۋىن باقىلاۋعا مۇمكىندىك بەرمەيدى.

تالقىلاۋ قورىتىندىسى بويىنشا وسى سالاداعى كەمشىلىكتەر مەن ولقىلىقتاردى جويۋ جونىندە كەشەندى ۇسىنىمدار ازىرلەنىپ، ۋاكىلەتتى ورگاندارعا جولداندى.