تولەگەن ايبەرگەنوۆتىڭ ولەڭدەرى
استانا. قازاقپارات - تولەگەن ايبەرگەنوۆتىڭ «ويلاي بەر مەنى...»، «ماحاببات! نەتكەن الىپ، قايراتتى ەدىڭ»، «مۇنارالار»، «ساعىنىش»، «ءبىر جەتسە مەنىڭ اجالىم جەتەدى»، «ءبىر تويىم بار»، «ءبىزدىڭ جىگىتتەر» سەكىلدى شىعارمالار بەرىلدى.
ويلاي بەر مەنى...
تاعاتسىز كۇتكەن ىستىق ءۇن،
جارالى حال عوي - عاشىق حال.
كۇيساندىق كورسەڭ، ءبىر ءتىلىن
مەنى ويلاپ بار دا، باسىپ قال.
تەك قانا كوزگە جاس الما،
ويلاي بەر مەنى كۇنىگە.
ماحابباتتاردىڭ قاشاندا
ويلاماۋ جەتكەن تۇبىنە.
جانىما قاپ ەڭ جاقىن بوپ،
جۇرەكتە بۇگىن سىزداۋ كوپ.
مەن بولسام كەتتىم اقىن بوپ،
ازىراق باقىتسىزداۋ بوپ...
جولىعار بولسام قايتا مەن
ساعىنىش تولى سول شاقپەن.
ءبارىن دە ساعان ايتار ەم
جالعىز-اق تامشى مونشاقپەن.
ماحاببات! نەتكەن الىپ، قايراتتى ەدىڭ
ماحاببات! نەتكەن الىپ، قايراتتى ەدىڭ،
مەن سەنى مۇنشالىق دەپ ويلاپ پا ەدىم.
تۇساۋلاپ، تابانداتىپ تاعدىرىمدى،
قولىنا قارا كوزدىڭ بايلاپ بەردىڭ.
كوپ ەكەن ءومىر سىرى بىلگىزبەگەن،
جانى پاك تانىستىم دا ءبىر قىزبەنەن،
ءتۇرىلىپ شاتتىعىمنىڭ توماعاسى،
سىرلاسا باستادىم اي، جۇلدىزبەنەن.
كوز الماي قاراي بەردىم كىل شىڭداردان،
قيالدان قولىن سوزىپ قۇلشىندى ارمان.
ايتەۋىر، سول ءبىر قىزعا كەزدەستىم دە،
تاپ بولدىم قۋانىشقا تىنشىمدى العان.
مۇنارالار
كەزىم مەنىڭ!
جاتىرسىڭ جىراقتى اشىپ،
قىزىل گۇلدى بارادى قىر اپ-قاشىپ.
جيىرماسىنشى عاسىر ءجۇر ماڭعىستاۋدا
مۇنارالار باسىنا شىراق تاسىپ.
قالايشا مەن، جانىم-اۋ، تۇرا الامىن؟
جۇرەگىمنىڭ سىڭسىتپاي شىنار ءانىن.
تابانىمنىڭ استىندا قارا داريا
تاس توبەمدە تايگاسى مۇنارانىڭ.
مۇنارالار، سىڭسىعان مۇنارالار،
بۇرقىراتىپ تەرەڭنەن بۇلاق الار،
بولدىڭ مەنىڭ ويلاسام ماڭعىستاۋدى
كوز الدىمدا ءتىزىلىپ تۇرا قالار.
ءومىر، ءومىر، ويلايسىڭ، تولعاناسىڭ،
جاستىق شاعىڭ اڭسايدى قاربالاسىن.
مۇڭايادى جيىرما بەس - قىزىق داۋرەن
كوككە وسىلاي شانشىلىپ قالماعاسىن.
ەر جەتكەنشە، ادام بوپ باس تىققانشا،
اعالاردان كوردىك ءبىز دوستىق قانشا.
قارتايدى عوي ءبىز ءۇشىن تالايلارى
جەر بەتىندە جارار دەپ جاستىق قالسا.
كەشەگى كۇن جۇرەكتە جىلاعان ءار،
ومىراۋىن توسەگەن بۇل اعالار.
بۇگىندە تۇر قاراپ سول شىرقاۋ كوكتەن
مۇنارالار، سىڭسىعان مۇنارالار.
ءومىر، ءومىر، ويلايسىڭ، القىناسىڭ،
قانات بايلاپ، قياعا شارق ۇراسىڭ.
جەتۋ دەگەن ءسوز ەمەس، تەك اۋەلى
قارسى الدىمنان مۇنارا جارقىراسىن.
جەر بەتىنىڭ جاقۇتى - مۇنارالار،
ماڭدايداعى باقىتى - مۇنارالار،
مۇنارالار جارىعى سونبەسىن دەپ
كىرپىك ىلمەي شىعادى عۇلامالار.
بىلمەدىم مەن كەۋدەمنەن اشتى ما كەڭ،
ومىراۋى وسىناۋ تاسقىن الەم.
كۇن كوتەرىپ بارادى ماڭعىستاۋدا
مۇنارالار اسپاننىڭ استىمەنەن...
ساعىنىش
ەي، ادامدار، اينالايىن تۋعاندار،
جالعىز مينۋت تىڭداڭدار!
مەن سەندەرگە كوپ بولدى سىر شەرتپەدىم،
شارتاراپقا جۇرگەنىممەن ءجۇز اتتاپ،
بۇرىن مۇنداي كورمەپ ەدىم ۇزاقتاپ.
قازىر تۇگەل كوكىرەگىم ءورت مەنىڭ!
ءبىر ساعىنىش ماڭگى-باقي دوس ەتكەن
قازىر مەنى جۇلىپ الدى توسەكتەن.
جاتىر ەكەن ويانسام
كوكىرەگىمدە استان-كەستەن باستالىپ،
جاستىعىما جاس تامىپ!
شىرت ۇيقىمنان جۇلمالاپ
ساعىندىرىپ وياتتى ءۇش نارەستەم.
ءيا، كادىمگى ۇشان-تەڭىز ارماننىڭ
ۇشىنداعى ءۇش-اق ءتۇيىر تال ءوسكەن.
باسقا دۇنيە شىعىپ كەتكەن ءبارى ستەن.
ۇزاق جولدان شارشاپ كەلگەم
جىر جازاتىن حالدە ەمەن،
جىنداندىم با الدە مەن؟
مۇنداي تۇستەر بۇرىن ماعان ەنبەگەن،
ونسىز دا مەن ساعىنىشتان كەندە ەمەن.
مۇنداي حالدى شەرتكەن ءبىر كەز ورتەنە،
جۇماعالي جىرىنا دا سەنبەگەم.
ساياسىندا بولدىم مەن سان شىناردىڭ،
مەن ءجۇز قىزعا عاشىك بولعان شىعارمىن.
اداممىن عوي شىن ساعىنىش ءتان ماعان،
ءبىراق مەنىڭ تامدى بۇگىن كوز جاسىم
سول قىزداردىڭ بىرىنە دە تامباعان.
قازىر مەنىڭ ەسسىز ءشولىم باستالدى
ەش قايناردان قانباعان...
ەي، ادامدار، اينالايىن جىر كەنى،
مەنىڭ وسى قاينارىمنان قانىپ ءىش.
اكەم ولگەن كەزىندە دە بۇل مەنى
ورتەمەگەن ساعىنىش!
مەن ساعىنباس ادامدارمەن دوس ەمەن،
سان اعىنعا كەلدىم، تولعان كەسەمەن.
ءجۇرمىن قازىر كورىنگەننىڭ بالاسىن
ۇستاپ ءسۇيىپ كوشەدەن.
مەن وسىناۋ ازىن-اۋلاق جاسىمدا
سان زاڭعارلار توسىنەن
سان داريا كەشىپ ەم.
قۇشتارلىعىم بەرمەگەسىن ءتىپتى بوي،
ءبارى بۇدان تەرەڭ بولماي شىقتى عوي.
ەشقاشان دا مەنىڭ مىناۋ كەۋدەمدە
ەشبىر تەڭىز مۇنشالىقتى تاسقان جوق.
مەن بارماعان اسپان جوق،
ءبارى مۇنىڭ بيىگىنەن اسقان جوق.
مەن وسىناۋ ازىن-اۋلاق جاسىمدا
جۇرەگىمنىڭ لاپىلداعان وتىمەن
سان جولداردان ءوتىپ ەم.
سان ورماننىڭ ۇشار باسىن ءيدىرىپ،
سان تۇلپاردىڭ قۇيرىعىن شارت ءتۇيدىرىپ.
سان جارىققا ءوز شۇعىلاسىن ءسۇيدىرىپ.
ءبىراق مەنىڭ مىنا ءمولدىر ءوز دەرتىم،
بارا جاتىر تيگەن جەرىن كۇيدىرىپ...
ءبىر جەتسە مەنىڭ اجالىم جەتەدى
ءبىر جەتسە مەنىڭ اجالىم جەتەدى
نايزاعاي وتتارىنان،
ساتقىندار وقتارىنان،
ويتكەنى مەن تەڭىز بوپ اقتارىلام.
ءبىر جەتسە مەنىڭ اجالىم جەتەدى
ادام قولى جاساعان ۇياتتاردان،
قالىڭدىعى وسىناۋ سياقتى ورمان.
ايتپەسە پىسىقتىققا پىسقىرمايدى
مەندەگى قۋاتتى ارمان.
مەن كۇن سايىن تەڭىز بوپ اقتارىلام،
بۇلبۇل بولىپ شۋلايمىن باقتارىڭنان.
كوكتەم جاققا اققۋلار ۇشىرامىن،
جازيرانىڭ اق تۇتەك اقپانىنان.
باسقاسىنان اجالىم جەتپەس مەنىڭ،
جاۋىزدىقپەن ويتكەنى شەكتەسپەدىم.
مەن جاراقات سالماعان سەمسەر ەدىم
سوندىقتان جارقىلدايمىن،
ايتپەسە وتپەس تە ەدىم.
ولە بەرسىن كۇنشىلدەر كۇيىگىندە
ءوز عاسىرىم ءوزىمنىڭ يىنىمدە.
اق جاڭبىرلار توزدىرعان تاۋ سياقتى
مەن ولەمىن ءوزىمنىڭ بيىگىمدە.
ءبىر تويىم بار
ءبىر تويىم بولاتىنى ءسوزسىز مەنىڭ،
ءدال قاي كۇنى ەكەنىن ايتا المايمىن.
ءبىراق... ءبىراق...
ەشكىمدى دە بيلەتپەي قايتارمايمىن.
وندا ورتاعا تاستالار ۇران سونداي:
قايتا المايدى قارتىڭ دا ءبىر ءان سالماي.
جيىرما بەستىڭ ءبارىن دە سابىلدىرتام،
كەمپىرلەرگە قىز كۇنىن ساعىندىرتام...
سابيلەرگە اعانى ۇلگى ەتەمىن،
جەڭگەيلەردىڭ تولتىرام گۇلگە ەتەگىن.
مەنىڭ جارىم بۇل تۇنى كىرپىك ىلمەي،
اق كوڭىلىمەن اق قايىڭ بۇرتىگىندەي،
ومىراۋىنان ءبىر ءساۋىر شايقاپ ەسىپ،
اجىراسقاندى جۇرەدى قايتا قوسىپ.
مەن ءوزىم دە ءان سالام تۇن اۋعانشا،
مەنىڭ جانىم بۇل كۇنگە قۇمار قانشا!
بايگى بەرەم جىعىلعان بالۋانعا دا،
ادالدىعى سەزىلىپ تۇرار بولسا.
قىز قۋاتىن جىگىتكە ات بەرەمىن،
جانام دەگەن جۇرەككە وت بەرەمىن.
مەن ايتەۋىر بار جيعان-تەرگەنىمدى،
ءبىر تاماشا توي قىلىپ وتكەرەمىن.
ءبىزدىڭ ءۇيدى سول كۇنى بەتكە ال، قاۋىم،
نىساناعا اپ قۋانىش توقتالماۋىن.
مەن بۇل تويدان تىلەيمىن جىلاپ تۇرىپ،
قازانىمدا ءبىر اسىم ەت قالماۋىن.
مەن ءسويتىپ بار شاڭنان ءبىر سىلكىنەمىن،
مەن ءسويتىپ راقاتتانىپ ءبىر كۇلەمىن.
كىم ءبىلسىن تالاي تۇنگى تىلەگىم ەد،
ماڭگىلىك تارقاماۋى دا مۇمكىن ونىڭ.
ءبىزدىڭ جىگىتتەر
بۇل قازاقتا جىگىتتەر بار نار قاسقا،
جارقىلداعان الماس پا
دەيسىڭ-اۋ، دەيسىڭ سەن ونى،
ايىرىپ كەتسە جول باسقا.
ورنى ءتىپتى تولماس تا.
دۋلاتار تەك وت دەنەنى.
بۇل قازاقتا جىگىتتەر بار قوناققا
ماڭدايىنداعى ءبىر اتىن
جايراتىپ سالىپ، جارقىلداپ كۇلىپ تۇراتىن.
كوكىرەگىنەن كۇن سونبەي
وسى ءبىر شاقتان بىلسەڭ عوي
تۇراتىن تاۋىپ مۇراتىن.
بۇل قازاقتا جىگىتتەر بار ءمارت-باتىر.
جالاڭاش باتىر كوبى ونىن.
اۋدارىپ تاستار سەن ءۇشىن
التىن بار دەسەڭ، استىندا مىناۋ توبەنىڭ.
سولاردىڭ اپپاق نيەتىمەن.
اق قارعا جاققان وتىمەن
لاپىلداپ مەن دە كەلەمىن.
بۇل قازاقتا جىگىتتەر بار شىڭ تەكتەس
تۇرا دا الماس شىڭ بۇلاي.
قاسقايىپ ولار تۇرعاندا
بيىكتەر سەنىڭ تۇلعاڭ دا،
ميلليون مارتە، قۇربىم-اي!
