توكيو سۋردليمپياداسىندا ەل نامىسىن 79 سپورتشى قورعايدى
استانا. قازاقپارات - 2025-جىلعى 15-قاراشادا توكيو قالاسىندا وتەتىن XXV جازعى سۋردليمپيادا ويىندارىندا قازاقستان اتىنان 79 سۋردوسپورتشى قاتىسادى.
- سۋردوسپورتشىلار ەلىمىزدىڭ ابىرويىن حالىقارالىق ارەنادا ابىرويمەن قورعاپ كەلەدى. تاۋەلسىزدىك جىلدارى ىشىندە قازاقستان سپورتشىلارى سەگىز سۋردليمپيادادا 42 مەدال، ونىڭ ىشىندە 8 التىن، 8 كۇمىس جانە 26 قولا مەدال جەڭىپ الدى. 2022-جىلى برازيليادا وتكەن ويىنداردا ۇلتتىق قۇرامامىز 29 مەدال يەلەنىپ، جالپىكوماندالىق ەسەپتە 13-ورىنعا يە بولدى. بيىل قازاقستان جەتىنشى رەت سۋردليمپيادا ويىندارىنا قاتىسپاق، - دەدى ۇلتتىق سۋردليمپيادالىق كوميتەتتىڭ پرەزيدەنتى سەرىك ساپيەۆ.
سپورت جانە دەنە شىنىقتىرۋ ىستەرى كوميتەتى مۇمكىندىكتەرى شەكتەۋلى تۇلعالارمەن جۇمىس باسقارماسىنىڭ باسشىسى مارات قاسقىربايەۆتىڭ مالىمەتىنشە، توكيودا وتەتىن جارىستاردا ەلىمىزدىڭ نامىسىن 79 سپورتشى جەڭىل اتلەتيكا، دزيۋدو، تاەكۆوندو، ۇستەل تەننيسى، بادمينتون، ءجۇزۋ، ەركىن جانە گرەك-ريم كۇرەسىنەن قورعايدى.
ايتا كەتەيىك، بۇگىندە رەسپۋبليكادا دەنە مۇمكىندىكتەرى شەكتەۋلى ادامدارعا ارنالعان 16 سپورت كلۋبى، 1 سپورتتى دامىتۋ ديرەكتسياسى (الماتى وبلىسىندا) جانە 2 مامانداندىرىلعان سپورت مەكتەبى (شىمكەنت قالاسى مەن قاراعاندى وبلىسىندا) جۇمىس ىستەيدى. اتالعان ۇيىمدار الماتى، اباي، تۇركىستان، جامبىل، باتىس قازاقستان، ماڭعىستاۋ، سولتۇستىك قازاقستان، پاۆلودار، شىعىس قازاقستان، اقمولا، قوستاناي، اقتوبە، اتىراۋ، جەتىسۋ، قىزىلوردا وبلىستارىندا جانە استانا قالاسىندا ورنالاسقان. ولاردا بارلىعى 7532 سپورتشى تۇراقتى تۇردە جاتتىعادى.
بۇعان دەيىن پاراليمپيادا، سۋردليمپيادا جۇلدەگەرلەرىن دايىنداعان جاتتىقتىرۋشىلار ارنايى تولەم الاتىنىن جازعان ەدىك.
