توعىز ايدا جول اپاتىنان 1700 دەن استام ادام قازا تاپقان

استانا. KAZINFORM - ستاتيستيكا كورسەتكەندەي، اعىمداعى جىلعى 9 ايدا ەلىمىزدە 19 مىڭنان استام (19302) جول-كولىك وقيعاسى تىركەلگەن، ونىڭ سالدارىنان 26703 ادام زارداپ شەككەن.

بۇل تۋرالى قۇقىقتىق ستاتيستيكا جانە ارنايى ەسەپكە الۋ جونىندەگى كوميتەت ءمالىم ەتتى.

ستاتيستيكاعا سۇيەنسەك، جول-كولىك اپاتى سالدارىنان 1754 ادام قازا تاپسا، ونىڭ ىشىندە:

- 230 كامەلەتكە تولماعان بالالار؛

- 486 ايەلدەر؛

- 1268 ەر ادامدار.

جاراقات العاندار سانى - 24949:

- 6488 كامەلەتكە تولماعان بالالار؛

- 10937 ايەلدەر؛

- 14012 ەر ادامدار.

ايماق بويىنشا ەڭ كوپ جول اپاتى:

الماتى قالاسى – 3869، الماتى وبلىسى - 2118

استانا قالاسى -1220، جامبىل وبلىسى – 1181،

شىمكەنت قالاسى - 1122 وبلىستارىندا تىركەلگەن.

كوپ جاعدايدا جول-كولىك وقيعاسىنا سەبەپ بولعان نەگىزگى زاڭ بۇزۋشىلىقتارعا مىنالار جاتادى:

- مانيەۆر جاساۋ قاعيدالارىن ساقتاماۋ – 3700،

- جىلدامدىقتى اسىرۋ - 2773,

- جاياۋ جۇرگىنشىلەرگە قوزعالىستاعى باسىمدىلىقتى ۇسىنباۋ – 3401،

- جول قيىلىستارىنان ءوتۋ نەمەسە جولدىڭ ءجۇرۋ بولىگىن قيىپ ءوتۋ قاعيدالارىن بۇزۋ -1417.

جول-كولىك وقيعاسىنىڭ %95 - دان استامى جۇرگىزۋشىلەردىڭ كىناسىنەن بولادى، ونىڭ 451- ءى الكوگولدىك نەمەسە ەسىرتكىلىك ماساڭ كۇيىندە جاسالعان.

ادام ولىمىنە اكەلەتىن ج ك و- نىڭ %60- دان كوبى قالا ماڭىنداعى جولداردا ورىن الادى.

جالپى اپاتتىق دەڭگەيدىڭ جوعارىلاۋىنا جۇرگىزۋشىلەردىڭ جىلدامدىق رەجيمىن اسىرۋى، باسىپ وزۋ قاعيدالارىن ساقتاماۋى، شارشاڭقى كۇيدە جولعا شىعۋى سەبەپ بولاتىنى انىقتالعان.

سوڭعى جىلدارى جاستار مەن جاسوسپىرىمدەر موپەد، سكۋتەر، ساموكات سىندى شاعىن كولىك قۇرالدارىن تىزگىندەۋدى سانگە اينالدىردى.

جول قوزعالىسىنا قاتىسۋشىلاردىڭ جەتكىلىكتى تاجىريبەسىنىڭ جوقتىعىنان، سونداي-اق ەرەجەلەردى بىلمەۋىنىڭ سالدارىنان 1077 ج ك و- نا سەبەپ بولىپ وتىر، وندا 1190 ادام جارالانىپ، 86-سى قازا تاپتى.

جول قاۋىپسىزدىگى دەڭگەيىن ارتتىرۋ ماقساتىندا كوميتەت جانىنان تۇراقتى ۆەدومستۆوارالىق جۇمىس توبى قۇرىلدى.

بۇگىنگى تاڭدا، مىسالى، كولىك مينيسترلىگىنە جۇكتەلگەن اپاتتى- قاۋىپتى ۋچاسكەلەردى انىقتاۋ تەتىگى ىسكە قوسىلدى. بۇل رەتتە كوميتەتتىڭ ج ك و تۋرالى دەرەكتەرى نەگىزگە الىنادى.

ىشكى ىستەر مينيسترلىگى جۇرگىزۋشى ەمتيحاندارىن تاپسىرۋ ءۇشىن ءوزىن-ءوزى دايىنداۋدى الىپ تاستادى.

اۆتومەكتەپتەردى مەملەكەتتىك باقىلاۋ، گاز-باللون جابدىقتارىن ورناتۋ جانە تەحنيكالىق بايقاۋ وپەراتورلارىنىڭ جاۋاپكەرشىلىگىن كۇشەيتۋ ماسەلەلەرى پىسىقتالىپ جاتىر.

ۆەدومستۆوارالىق جۇمىس توبىنىڭ باستاماسىمەن كولىك مينيسترلىگى تاكسي اگرەگاتورلارىمەن مەموراندۋم جاسادى. بارلىق شارالار ۇزاق مەرزىمدى پەرسپەكتيۆاعا باعىتتالعان.

كوميتەت ادامدار زارداپ شەككەن جول-كولىك وقيعالارىنا قاتىستى مەملەكەتتىك ستاتيستيكانى قالىپتاستىرادى. بۇل دەرەكتەر «qamqor.gov.kz» پورتالىندا كوميتەت ازىرلەگەن اپات كارتاسىندا قولجەتىمدى. ەلىمىزدەگى جولداردىڭ اپاتتىق جاعدايى تۋرالى تولىق اقپاراتتى وسى پورتالدان بىلۋگە بولادى.

اۆتور

باقىتگۇل اباي قىزى