تۋريستىك نىساندارعا قاراي 2 مىڭ شاقىرىمعا جۋىق اۆتوجول جوندەلەدى - قازاۆتوجول

استانا. KAZINFORM - «قازاۆتوجول» ۇلتتىق كومپانياسى وتاندىق تۋريزمدى دامىتۋ ءۇشىن ەلىمىزدىڭ تۋريستىك نىساندارىنا باراتىن اۆتوموبيل جولدارىن جاڭارتۋ بويىنشا جۇمىستاردى باستادى.

كومپانيانىڭ باسپا ءسوز قىزمەتىنىڭ حابارلاۋىنشا، ەكى جىلدىڭ ىشىندە دەمالىس ورىندارى مەن كورنەكى جەرلەرگە قاراي باراتىن 2 مىڭ شاقىرىمعا جۋىق جول جوندەۋدەن وتەدى.

اقمولا وبلىسىندا «استانا-قورعالجىن» جولىنىڭ 19-58 شاقىرىمى ارالىعىندا ورتا جوندەۋ جۇمىستارى وتەدى. بۇل جول «الجير» مەموريالدى-مۇراجاي كەشەنى مەن «قورعالجىن» مەملەكەتتىك تابيعي قورىعىنا بارادى.

ال الماتى وبلىسىندا «كوكپەك-كەگەن-ءتۇپ-جالاڭاش-ساتى-كولساي كولىنە باراتىن جول» اۆتوجولىنىڭ 3-24 شاقىرىمى، «كوكپەك-كەگەن-ءتۇپ» جولىنىڭ 26-41، 68-88 شاقىرىمى ارالىعىندا ورتا جوندەۋ جۇمىستارى جۇرگىزىلەتىن بولادى. بۇل باعىت بويىنشا «كولساي» ۇلتتىق پاركىنە جانە قايىڭدى، كولساي كولدەرىنە بارۋعا بولادى.

سونىمەن قاتار، «سارىوزەك-كوكتال» اۆتوجولىنىڭ 0-45، 110-141، 142-178 شاقىرىمى جوندەلىپ، «التىنەمەل» ۇلتتىق پاركىندەگى «ايعاي قۇمعا» باراتىن جولدىڭ جاعدايى جاقسارماق.

شىعىس قازاقستاندا «وسكەمەن-التاي-راحمان قاينارى» تاسجولىنىڭ 0-45، 110-140، 151-186، 199-203، 205-207، 211-214، 366-399 شاقىرىمى ارالىعىنداعى جول ۋچاسكەسى جوندەلەدى. سونداي-اق، 4 كوپىر كۇردەلى جوندەۋدەن وتەدى. كاتونقاراعاي اۋدانىندا «كاتونقاراعاي» ۇلتتىق پاركى جانە «راحمان قاينارى» شيپاجايى بار.

جەتىسۋ وبلىسىندا الاكول كولى مەن «الاكول» قورىعىنا باراتىن «ءۇشارال- دوستىق» جولىنىڭ 0-9 شاقىرىمى ارالىعىنداعى جول ۋچاسكەسى جوندەلەدى.

باتىس قازاقستان وبلىسىندا جاڭگىر حاننىڭ رەزيدەنتسياسىنا اپاراتىن «حان ورداسى اۋىلىنا كىرەبەرىس» اۆتوجولىنىڭ 0-21 شاقىرىمى ارالىعىندا جوندەۋ جۇمىستارى باستالىپ كەتتى.

قاراعاندى وبلىسى بويىنشا تۋريستەرگە «قارقارالى» ۇلتتىق پاركىنە بارۋ ءۇشىن «قاراعاندى- اياگوز- تارباعاتاي- بوعاز» جولىنىڭ ارالىعىنداعى جول ۋچاسكەسى جوندەلەدى.

پاۆلودار وبلىسىندا «قالقامان- باياناۋىل- ۇمىتكەر- ۋليانوۆسك» تاس جولىنىڭ 100-105 شاقىرىمى كۇردەلى جوندەۋدەن، ال 82-91، 94-99، 221-231 شاقىرىمى ورتا جوندەۋدەن وتەدى. بۇل باعىتتا «باياناۋىل» ۇلتتىق پاركى بار.

تۇركىستان وبلىسى بويىنشا «سامارا-شىمكەنت» جولىنىڭ 2186-2216 شاقىرىمى ورتا جوندەۋدەن، 2056 شاقىرىمداعى اينالما جولى كۇردەلى جوندەۋدەن وتپەك. بۇل باعىتتا ساۋران قالاشىعى بار.

اۆتور

ەلميرا ورالبايەۆا