تۋريستەر شاعىمىنان كەيىن جەتىسۋدا ءۇشبۇلاق ماڭىنداعى شوشقا شارۋاشىلىعى جابىلدى
استانا. KAZINFORM - جەتىسۋ وبلىسىندا الەۋمەتتىك جەلىدەگى شاعىم نەگىزىندە زاڭسىز شارۋاشىلىق توقتاتىلدى، دەپ حابارلايدى ەكولوگيا جانە تابيعي رەسۋرستار مينيسترلىگى.
ۆەدومستۆو مالىمەتىنە سايكەس، الەۋمەتتىك جەلىلەردە جۇرگىزىلگەن مونيتورينگ ناتيجەلەرى بويىنشا جەتىسۋ وبلىسى الاكول اۋدانى ءۇشبۇلاق اۋىلدىق وكرۋگىنىڭ اۋماعىندا شوشقا وسىرۋمەن اينالىساتىن «Qaratas» ش ق ماڭىنان جاعىمسىز ءيىس شىعاتىنى جونىندە ماتەريالدار جارىق كوردى.
بەينەروليك بيىلعى جىلدىڭ 21-ساۋىرىندە جاريالانىپ، دەرەۋ ۋاكىلەتتى مەملەكەتتىك ورگاندارمەن ءتيىستى جۇمىس جۇرگىزىلدى.
اتاپ ايتقاندا، جەتىسۋ وبلىسى بويىنشا ەكولوگيا دەپارتامەنتى شارالار قابىلداۋ ءۇشىن الاكول اۋدانىنىڭ پوليتسيا بولىمىنە حات جولدادى، تيىسىنشە تابيعات قورعاۋ پوليتسياسىنىڭ قاتىسۋىمەن تەكسەرۋلەر جۇرگىزىلدى. اعىمداعى جىلدىڭ 22-ساۋىرىندە شارۋا قوجالىعىنىڭ يەسى تۋريستەر ءۇشىن اكەلىنگەن جابايى شوشقالاردى (ءوسىرۋ ماقساتىندا ەمەس) اكەتكەن. انىقتالعان بۇزۋشىلىق تولىعىمەن جويىلدى.
سونداي-اق، جەتىسۋ وبلىسىنىڭ جەر رەسۋرستارىن باسقارۋ دەپارتامەنتى جوسپاردان تىس تەكسەرۋ جۇرگىزدى، ونىڭ ناتيجەلەرى بويىنشا جەر ۋچاسكەسىنىڭ نىسانالى ماقساتىمەن كوزدەلمەگەن كۇردەلى وبەكتىلەردىڭ قۇرىلىسى انىقتالدى.
- شارۋاشىلىق باسشىسىنا قاتىستى اكىمشىلىك شارالار قابىلدانىپ، اتالمىش بۇزۋشىلىقتاردى جويۋ تۋرالى نۇسقاما بەرىلدى. 2025 -جىلدىڭ شىلدە ايىندا وقيعا ورنىن قوسىمشا ۆيزۋالدى تەكسەرۋ بارىسىندا شوشقا ءوسىرۋ جۇمىستارى توقتاتىلعانى بەلگىلى بولدى، تابيعي لاندشافت قالپىنا كەلتىرىلىپ، قارابۇلاق وزەنىنىڭ ساعاسىندا جاياۋ تۋريستەردىڭ سۇيىكتى سەرۋەندەۋ ورنى قايتارىلدى، - دەلىنگەن رەسمي حابارلامادا.
