تۋريستەر بىلمەيتىن دەمالىس ايماقتارى
استانا. قازاقپارات- دۇنيەجۇزىلىك تۋريزم ۇيىمىنىڭ دەرەگى بويىنشا الەم دەمالىسقا لايىق ورىنداردىڭ تەك 5 پايىزىن عانا پايدالانادى. بۇل تۋريستەر بىلمەيتىن ايماقتاردىڭ كوپ ەكەنىن اڭعارتادى.
وسىنى ەسكەرگەن ماماندار بيىل ساياحاتشىلار ءۇشىن قىزىق بولارلىق باعىتتار ءتىزىمىن جاسادى. اپۋليا ايماعى يتاليانىڭ وڭتۇستىك- شىعىسىندا ورنالاسقان. بۇل جەر تەك تۇمسا تابيعاتىمەن عانا ەمەس، ساۋلەت ونەرىمەن دە تاڭعالدىرادى. جەرگىلىكتى قوناق ۇيلەر فەرمالارعا ۇقساس ەتىپ سالىنعان. مۇندا يۋنەسكو- نىڭ مۇرالار تىزىمىنە كىرەتىن نىساندار كوپ. بىلتىر ايماقتا 15 ميلليون تۋريست دەمالعان. بيىل ودان دا كوپ بولادى دەپ بولجانعان.
ساراپشىلار سلوۆەنيانىڭ تۋريستىك الەۋەتى زور ەكەنىن ايتادى. ال مۇنداعى نوۆا- گوريتسا قالاسىن ەۋروپانىڭ بەيرەسمي مادەني ورتالىعى دەپ تە اتايدى. ماماندار سلوۆەنيا تۋريستەردى تابيعاتىمەن دە تامساندىرادى دەيدى. ويتكەنى ەل اۋماعىنىڭ 60 پايىزىن ورماندار الىپ جاتىر. 9 جىل بۇرىن ورتالىق ەۋروپاداعى بۇل مەملەكەت الەمدەگى العاشقى جاسىل باعىت رەتىندە تىركەلگەن. وسىعان بايلانىستى تۋريستىك سالا ماماندارى كەيىنگى ۋاقىتتا شەتەلدىك ساياحاتشىلار تاراپىنان قىزىعۋشىلىقتىڭ ارتا باستاعانىن ايتادى.
ماماندار ساياحاتشىلار ءۇشىن بيىل قىزىق بولاتىن ەۋروپاداعى ۇزدىك باعىتتار قاتارىنا پاريجدى قوستى. بىلتىر قالادا جازعى وليمپيادا ويىندارى وتكەن. وسىدان كەيىن باعالار تومەندەگەن. بيىل جەرگىلىكتى مەترومەن ءجۇرۋ جاعى جەڭىلدەگەن. ونىڭ ۇستىنە ماماندار ايگىلى نوتر-دام-دە-پاري شىركەۋىنىڭ ورتتەن كەيىن قايتا اشىلۋى دا تۋريستەردىڭ قىزىعۋشىلىعىن ارتتىراتىنىن ايتادى.
24.kz
