تۋريستەر بۋراباي تابيعاتىن تىكۇشاقپەن تاماشالاي الادى

استانا. KAZINFORM - كەلەر جىلدان باستاپ بۋرابايعا قىدىرىپ، دەمالۋعا باراتىن تۋريستەردىڭ اسەم ولكەنىڭ تابيعاتىن تىكۇشاقپەن تاماشالاۋ مۇمكىندىگى بولادى. بۇل تۋرالى اقمولا وبلىسىنىڭ اكىمى مارات احمەتجانوۆ ءمالىم ەتتى.

- بيىل قىركۇيەكتە ۇلكەن كاسىپورىنمەن كەلىسىمشارت جاسالدى. كەلەسى تۋريستىك ماۋسىم باستالعاندا تىكۇشاقپەن 15-20 مينۋت جانە جارتى ساعات كولەمىندە بۋرابايدى اينالىپ، ەكسكۋرسيا جاساۋعا بولادى. بۇل بۋرابايدىڭ كەرەمەت سۇلۋ تابيعاتىن اۋەدەن كورۋگە مۇمكىندىك، - دەدى مارات احمەتجانوۆ اگەنتتىك ءتىلشىسىنىڭ ساۋالىنا جاۋاپ بەرە تۇرىپ.

اكىمنىڭ ايتۋىنشا، تىكۇشاقپەن ەكسكۋرسيانى جەكە كومپانيا جۇزەگە اسىرادى جانە باعانى وزدەرى قويادى.

- باعانى ۋاقىتىنا، ياعني 15 مينۋت، 20 مينۋت تاپسىرىسقا قاراي قويادى، - دەپ تولىقتىردى ءوڭىر باسشىسى.

بۇعان دەيىن پوليتسەيلەر بۋراباي تابيعي ايماعىن دروننىڭ كومەگىمەن كۇزەتەتىنى تۋرالى حابارلاعان ەدىك.

ودان بولەك، جازدا بۋراباي كولدەرى بەينەباقىلاۋ كامەرالارىنىڭ كومەگىمەن باقىلاناتىنى ايتىلدى.

اۆتور داۋلەت ىزتىلەۋ