ۆەتەريناريالىق قىزمەتتى كۇشەيتۋگە رەزەرۆتەن 3,8 ميلليارد تەڭگە ءبولىندى
استانا. KAZINFORM - ق ر پرەمەر-ءمينيسترى ءاليحان سمايىلوۆ ءتيىستى قاۋلىعا قول قويدى. بۇل تۋرالى primeminister.kz جازدى
قاراجات ۆەتەريناريالىق زەرتحانالاردى دالدىگى جوعارى قۇرىلعىمەن - حالىقارالىق ۇسىنىمدار جانە Codex Alimentarius ەرەجەلەرى مەن تالاپتارىنا ساي كەلەتىن سۇيىق حروماتوگرافپەن جابدىقتاۋعا باعىتتالادى.
بۇل ۆەتەريناريا سالاسىندا ءدال جانە ناقتى زەرتتەۋلەر جۇرگىزۋگە مۇمكىندىك بەرىپ، ەلدىڭ ازىق-تۇلىك قاۋىپسىزدىگىن قامتاماسىز ەتەدى. تيىمدىلىگى جوعارى سۇيىق حروماتوگراف تاعام ونىمدەرىندەگى زياندى زاتتاردىڭ بولماشى ىزدەرىن انىقتاۋعا مۇمكىندىك بەرەدى. ونى قولدانۋ حالىقتىڭ دەنساۋلىعىن تاعام ارقىلى تارالاتىن ءقاۋىپتى اۋرۋلاردان قورعاۋعا ەلەۋلى ۇلەس قوسادى.
سونىمەن قاتار جاڭا قۇرىلعى بۇگىندە الەمدەگى ونداعان ەلگە تاۋارلارىن ەكسپورتتاپ جۇرگەن قازاقستاندىق وندىرۋشىلەرگە سىرتقى نارىقتىڭ قاتاڭ تالاپتارىنا سايكەس بولۋىنا مۇمكىندىك بەرەدى. بۇدان بولەك، قازاقستاننىڭ باسقا ەلدەردەن جەتكىزىلەتىن ونىمدەردى باقىلاۋ مۇمكىندىگى ايتارلىقتاي ارتادى.
ق ر ۇكىمەتىنىڭ اتالعان قاۋلىنى قابىلداۋى ازىق-تۇلىك قاۋىپسىزدىگىن قامتاماسىز ەتۋ جانە حالىقتىڭ دەنساۋلىعىن ساقتاۋ جولىنداعى ماڭىزدى قادام سانالادى.
اۆتور
ابىلايحان جۇماشەۆ
