تۇرىكمەنستان پرەزيدەنتى سەردار بەردىمۇحامەدوۆ استاناعا كەلدى
استانا. KAZINFORM - تۇرىكمەنستان پرەزيدەنتى سەردار بەردىمۇحامەدوۆ ورتالىق ازيا مەملەكەتتەرى باسشىلارىنىڭ VI كونسۋلتاتيۆتىك كەزدەسۋىنە قاتىسادى. تۇرىكمەنستان باسشىسىن قازاقستان پرەمەر-ءمينيسترى ولجاس بەكتەنوۆ قارسى الدى. بۇل تۋرالى ۇكىمەتتىڭ باسپا ءسوز قىزمەتى حابارلادى.
قازاقستان مەن تۇرىكمەنستان ءوزارا ءىس- قيمىلدىڭ بارلىق سپەكترى بويىنشا ساۋدا- ەكونوميكالىق ىنتىماقتاستىقتى بەلسەندى تۇردە كەڭەيتۋدە. ماسەلەن، 5 جىل ىشىندە ەكى ەل اراسىنداعى ءوزارا ساۋدا كولەمى 4 ەسەگە ءوسىپ، تەك سوڭعى جىلدىڭ وزىندە %28- عا ارتتى.
بيىلعى 6-ايدا تاۋار اينالىمى $237,2 ميلليون بولدى. بۇگىنگى تاڭدا ىنتىماقتاستىقتى ارتتىرۋدىڭ پەرسپەكتيۆالى باعىتتارى - گاز جانە ترانزيتتىك- كولىك سالالارى. وندا اۆتوجولداردى رەكونسترۋكتسيالاۋ جانە سالۋ بويىنشا ءبىرقاتار ءىرى جوبالار ىسكە اسىرىلىپ جاتىر.
ونىڭ ىشىندە ۇزىندىعى 225 شاقىرىم بولاتىن «قازاقستان شەكاراسى -گارابوگاز - تۇرىكمەنباشى» جاڭا اۆتوجولىنىڭ جانە گارابوگازگول شىعاناعى ارقىلى وتەتىن جاڭا كوپىردىڭ قۇرىلىسى بار. ۇزىندىعى 165 شاقىرىم «جاڭاوزەن - تۇرىكمەنستان شەكاراسى» ۋچاسكەسىن رەكونسترۋكتسيالاۋ جوباسى پىسىقتالۋدا.
اۆتور
ەلميرا ورالبايەۆا
