تۇرىك ليراسى دامۋشى ەلدەردىڭ ۆاليۋتالارى اراسىندا قۇنسىزدانۋ جاعىنان ەكىنشى ورىنعا شىقتى
استانا. قازاقپارات - 2025 -جىلدىڭ العاشقى بەس ايىندا تۇرىك ليراسى دامۋشى ەلدەردىڭ ۆاليۋتالارى اراسىندا ەڭ ناشار كورسەتكىشتەردىڭ ءبىرىن كورسەتتى، دەپ حابارلايدى Kazinform اگەنتتىگىنىڭ مەنشىكتى ءتىلشىسى.
ا ق ش دوللارىنا قاتىستى تۇرىك ليراسىنىڭ باعامى جىل باسىنان بەرى %10,9 عا ءوستى، بۇل تۇرىك ۆاليۋتاسىن ۇقساس ەكونوميكالار اراسىندا قۇنسىزدانۋ بويىنشا ەكىنشى ورىنعا شىعاردى.
قۇنسىزدانۋ بويىنشا كوشباسشى - ارگەنتينا ۆاليۋتاسى. ارگەنتينالىق پەسو ءوز قۇنىنىڭ %15,33 ىن جوعالتتى. ال رەسەي رۋبلى گەوساياسي جانە ەكونوميكالىق قيىندىقتارعا قاراماستان %31,71 عا نىعايىپ، ەڭ كوپ كۇشەيگەن ۆاليۋتا اتاندى.
الەمدىك ۆاليۋتالار قورجىنىنا قاتىستى ا ق ش دوللارىنىڭ كۇشىن كورسەتەتىن دوللار يندەكسى جىل باسىنداعى 109,209 دەڭگەيىنەن مامىر ايىنىڭ سوڭىندا 99,259 عا دەيىن تومەندەدى. دوللاردىڭ جالپى السىرەۋىنە قاراماستان، تۇرىك ليراسى ءوز ۇستانىمىن جوعالتۋدى جالعاستىردى. 1-قاڭتاردا 1 ا ق ش دوللارىنا 35,3585 ليرا بەرىلسە، 30-مامىرعا قاراي بۇل كورسەتكىش 39,2098 ليراعا جەتتى.
ليرانىڭ بۇلايشا كۇرت قۇنسىزدانۋى ىشكى ينۆەستورلاردى دا، حالىقارالىق ساراپشىلاردى دا الاڭداتۋدا. نەگىزگى سەبەپتەر - ينفلياتسيانىڭ ساقتالۋى، سىرتقى ينۆەستيتسيالاردىڭ از كەلۋى، يمپورتقا تاۋەلدىلىكتىڭ جوعارى بولۋى جانە ەلدىڭ ەكونوميكالىق ساياساتىنا سەنىمنىڭ شەكتەۋلىگى.
ەكونوميستەر قۇرىلىمدىق رەفورمالار مەن تۇراقتى ماكروەكونوميكالىق ساياساتسىز ليراعا دەگەن سەنىمدى قالپىنا كەلتىرۋ مەن ۆاليۋتا نارىعىنداعى تۇراقتىلىققا قايتا قول جەتكىزۋ قيىن بولاتىنىن ايتۋدا.
بۇعان دەيىن Morgan Stanley ينۆەستيتسيالىق بانكى ءوز جاڭا تالدامالىق ەسەبىندە 2025 -جىلدىڭ ەكىنشى جارتىسىندا تۇركيا ەكونوميكاسىنىڭ پەرسپەكتيۆالارىنا قاتىستى وپتيميستىك كوزقاراس بىلدىرگەنى حابارلانعان بولاتىن. الايدا بۇل مالىمدەمەدەن ءبىر اپتا بۇرىن تۇرىك ليراسىنىڭ باعامى تاعى دا قۇلدىرادى.
ايتا كەتەلىك تۇرىك ليراسىنىڭ قۇنى ءتۇسىپ باراتىنى تۋرالى جازعان ەدىك.
