پەتروپاۆلداعى يسلام مادەنيەتى مۋزەيىندە 1,5 عاسىرلىق جايناماز ساقتالعان
پەتروپاۆل. KAZINFORM - پەتروپاۆلداعى كونە مەشىتتىڭ عيماراتىندا ورىن تەپكەن يسلام مادەنيەتى مۋزەيىندە ساقتالعان كونە مۇرانىڭ ءبىرى - 1870 -جىلى تىگىلىپ، وسى كۇنگە دەيىن بۇلىنبەي جەتكەن جايناماز.
يسلام مادەنيەتى مۋزەيىنىڭ ديرەكتورى مۇرات ءامىرجانوۆتىڭ ايتۋىنشا، مۋزەي جۇمىسىنىڭ نەگىزى ماقساتى — عىلىمي- اعارتۋشىلىق، عىلىمي- زەرتتەۋ، باعا جەتپەس جادىگەرلەردى جيناۋ جانە ونى كوپشىلىككە تانىتۋ.
- بۇل جاينامازدى ءبابىش قاجىنىڭ اناسى تىگىپ بەرگەن، وسى جاينامازبەن اتامىز، ول اقجار اۋدانى ۇلكەن قاراوي توڭىرەگىنەن، ومبى ۋەزى ارقىلى ءۇش رەت قاجىلىققا بارعان. ءبىر رەت جاماعات بولىپ، ەكى رەت كەرۋەن باسى بولىپ بارعان. ول كىسىنى بارا جاتقاندار كەرۋەنباسى ەتىپ تاعايىنداعان، ويتكەنى ول كىسى يسلام قاعيدالارىن تولىق مەڭگەرگەن ادام. ودان تاراعان ۇرپاق مۋزەيگە سىيلاپ، بۇل قازىر بىزدەگى كونە جادىگەرلەردىڭ ءبىرى، - دەيدى مۇرات ءامىرجانوۆ.
مۋزەي ديرەكتورىنىڭ ايتۋىنشا، ءبابىش قاجىنىڭ شىن اتى - قابدىراحمان. ول اراب تىلىندە ەركىن سويلەپ، گرامماتيكاسىن جەتىك مەڭگەرگەن، سونداي-اق قۇراننىڭ وتىز پاراسىن تولىق وقي الاتىن ءبىلىمدار بولعان. ءبابىش قاجىنىڭ ساپارلاردا پايدالانعان جاينامازى، كيەلى مۇرا رەتىندە، ۇرپاقتان-ۇرپاققا امانات بولىپ ساقتالىپ كەلەدى.
- جاينامازدى قازاقتار قاسيەتتى ساناپ، اياق استىنا تاستاماعان، ءاردايىم بەلدەن جوعارى ۇستاعان. ويتكەنى قۇراندا بەلدەن تومەن ۇستاۋعا بولمايدى دەپ جازىلعان حاديس بار. بۇرىن كيىز ۇيلەردە جەل سوعىپ، شاڭ باسقاندىقتان دا جوعارى قويىپ، تازالىعىن قاتتى قۇرمەتتەگەن. سول سەبەپتى دە وسى كۇنگە دەيىن وتە جاقسى ساقتالىپ، جەتكەن، - دەيدى ءامىرجانوۆ.
