پەتروپاۆلدا ەكى جىل بۇرىن قۇلاعان مۇرجانىڭ ورنىنا جاڭاسى تۇرعىزىلدى
پەتروپاۆل. KAZINFORM - پەتروپاۆل 2-ج ە و- دا 1-ءتۇتىن مۇرجاسى ءدىڭىنىڭ قۇرىلىسى اياقتالدى. بۇل ستانسانىڭ ەكولوگيالىق جانە تەحنولوگيالىق كورسەتكىشتەرىن جاقسارتۋعا مۇمكىندىك بەرەدى.
بيىل مامىر ايىندا «كازتەپلوسپەتسستروي» ج ش س مەردىگەرلىك ۇيىمىمەن شارت جاسالعان. قۇرىلىس كونۋستىق سىرعىمالى قالىپتاردى قولدانۋ ارقىلى جۇرگىزىلدى. ازىرلەۋشى جانە جەتكىزۋشىسى - اۆستريانىڭ «GLEITBAU G. M. B. H. » قوسالقى مەردىگەر ۇيىمى. ۇزدىكسىز قۇرىلىستى قامتاماسىز ەتۋ ءۇشىن 92 قىزمەتكەر جۇمىلدىرىلدى.
جاڭا ءتۇتىن مۇرجاسى كونۋستىق پىشىندە. ونىڭ ديامەترى - 20,52 مەتر، جوعارعى جاعى - 9,2 مەتر، نەگىزىندەگى مۇرجانىڭ قالىڭدىعى - 800 م م، جوعارى جاعى - 250 م م. كونسترۋكتسيانىڭ بيىكتىگى - 180 مەتر. بۇل 2-ج ە و جۇمىس ىستەپ تۇرعان 2-جانە 3-مۇرجالاردان 30 مەترگە ارتىق. ءدىڭدى تۇرعىزۋ ءۇشىن 3300,6 م3 اۋىر بەتون جانە 1 217,1 م3 جەڭىل بەتون، 530 توننا ءارتۇرلى ديامەتردەگى ارماتۋرا پايدالانىلدى.
«5-تامىزدا ءتۇتىن مۇرجاسىنىڭ ءدىڭى قۇيىلدى، بەكىتىلگەن جوبا بويىنشا 15-قاراشادا اياقتاۋ جوسپارلاندى. ءبىراق 73 كۇندە، ءبىر اي ەرتە بىتىردىك. ءبىز ءالى دە كوپ جۇمىس اتقارۋىمىز كەرەك. قالىپتاردى بولشەكتەگەننەن كەيىن قورعانىس قالپاقشاسى، جۇرەتىن باسپالداق، باعدارشام الاڭشالارى، قىلتيمالار، سىرتقى جارىقتاندىرۋ، نايزاعايدان قورعاۋ ورناتىلادى»، - دەيدى «سەۆقازەنەرگو» ا ق باس ديرەكتورى اناتولي كازانوۆسكي.
2025-جىلى كۇل جينالاتىن ءۇي-جايدى ورناتۋ بويىنشا جۇمىستار جۇرگىزىلەتىن بولادى.
«قازاندىق اگرەگاتتارىنان گاز ءجۇرۋ جولىن كەلتىرۋ كەرەك. بارلىق جۇمىس اياقتالعان سوڭ جاڭا ءتۇتىن مۇرجاسىنا قولدا بار 12 ىنەن ستانسانىڭ 7 قازاندىق اگرەگاتى قوسىلاتىن بولادى. سونىمەن قاتار 2025-جىلدىڭ قىركۇيەك ايىنا دەيىن 1، 2، 3، 4، 5، 6-قازاندىق اگرەگاتى قوسىلادى. 2026-جىلى جاڭا ءتۇتىن مۇرجاسىنا 7-قازاندىق اۋىستىرىلادى، ال 12-قازاندىق 3-ءتۇتىن مۇرجاسىنا قوسىلادى. وسىلايشا، قازىرگى تاڭدا 2-ءتۇتىن مۇرجاسىندا جۇمىس ىستەيتىن بارلىق قازاندىق اگرەگاتتارى ەكى مۇرجاعا اۋىستىرىلادى. وسى جۇمىستاردى اياقتاپ، 2026-جىلى 2-ءتۇتىن مۇرجاسىن بولشەكتەۋدى جوسپارلايمىز»، - دەپ اناتولي كازانوۆسكي جوسپارلارىمەن ءبولىستى.
جاڭا مۇرجانىڭ شىعارۋلارى مەن تەحنيكالىق پارامەترلەرىن باقىلاۋدى قامتاماسىز ەتۋ ءۇشىن وندا اۆتوماتتاندىرىلعان مونيتورينگ جۇيەسى ورناتىلادى. 1-ءتۇتىن مۇرجاسى كەلەسى جىلدىڭ قازان ايىنىڭ باسىندا پايدالانۋعا بەرىلەدى.
