پەتروپاۆلدا بيەنىڭ قۇرعاق ءسۇتىن شىعاراتىن كاسىپورىن سالىنىپ جاتىر
پەتروپاۆل. KAZINFORM - بيەنىڭ ساۋمالىن ۇنتاقتالعان كۇيدە شىعاراتىن كاسىپورىن سولتۇستىك قازاقستان وبلىسى ايىرتاۋ اۋدانى كۋتۋزوۆكا دەگەن ەلدى مەكەنىندە ورنالاسادى.
قازىر بۇل اۋىلدا 5,2 گ ا اۋماقتا قۇرىلىس ءجۇرىپ جاتىر. جاڭا زاۋىت بيىل تامىز ايىندا پايدالانۋعا بەرىلمەك.
«سيەۆەر اگرو لتد» ج ش س ديرەكتورىنىڭ ورىنباسارى ارمانتاي ءابىلوۆتىڭ ايتۋىنشا، نىساننىڭ جالپى اۋماعى 2 مىڭ شارشى مەتر بولادى.
- بۇل يدەيا گەرمانيانىكى. شەت ەلدە قۇرعاق ءسۇت شىعاراتىن كاسىپورىن بار. سوعان قاراپ، بىزدە وزىمىزدە سونداي زاۋىت اشۋدى جوسپارلادىق. جوبا قۇنى 2,5 ميلليارد تەڭگە، سونىڭ 1,5 ميلليارد تەڭگەسى «سولتۇستىك» ا ك ك» ا ق ارقىلى بەرىلدى. بۇل - رەسپۋبليكا بويىنشا ءبىزدىڭ ەكىنشى كاسىپورنىمىز. قوستاناي وبلىسىندا ءبىزدىڭ ءدال وسىنداي زاۋىتىمىز بار، ول تابىستى جۇمىس ىستەپ جاتىر. ونىمگە سۇرانىس جوعارى. قازىر ءونىمدى ەكسپورتقا دايىنداپ جاتىرمىز. گەرمانياعا، قىتايعا جىبەرۋ جوسپاردا بار. گەرمانيادا، ماسەلەن ءبىزدىڭ ءونىمدى قولدانىپ كوسمەتيكا وندىرمەك. قازىرگى ۋاقىتتا قۇجاتتارمەن جۇمىس ىستەپ جاتىرمىز، - دەيدى ارمانتاي ءابىلوۆ.
قازىرگى ۋاقىتتا قۇرىلىستا 50 ادام ەڭبەك ەتىپ جاتىر. قوندىرعىعا تاپسىرىس بەرىلدى، كوكتەمدە اكەلىنەدى. زاۋىت اشىلىپ، ىسكە كىرىسكەن كەزدە 15-20 ادام جۇمىسقا الىنباق.
- ساۋمالدىڭ اعزاعا پايداسى وتە كوپ. ءبىراق سول پايداسىن كورۋ ءۇشىن ساۋعاننان كەيىن ونى 2-3 ساعات ىشىندە ءىشۋ كەرەك. ەڭ باستى قۇرىلعى - سۋبليماتور، ساۋىلعان ءسۇت پاستەريزاتسيادان وتەدى، كەيىن تومەن تەمپەراتۋرادا ونى قاتىرادى. سوسىن ءسۇت قۇرامىنداعى ىلعال جويىلىپ، ناتيجەسىندە قۇرعاق ءسۇت قالادى. بۇل جۇمىستىڭ ءبارىن جاڭاعى سۋبليماتور اتقارادى، - دەيدى ارمانتاي ءابىلوۆ.
بيەنىڭ قۇرعاق ءسۇتى 100, 200 گ ر جانە كەلىلىك قاپتامادا شىعارىلماق.
بۇعان دەيىن س ق و- دا سيىر مەن جىلقى تەرىلەرى ىسكە جاراپ، ودان پروتەين ءوندىرىلىپ جاتقانىن جازعان ەدىك.
