پەتروپاۆلدا بەس اسىق جانە اسىق اتۋدان ەل چەمپيوناتى ءوتىپ جاتىر
پەتروپاۆل. KAZINFORM - پەتروپاۆلدا بەس اسىق جانە اسىق اتۋ ۇلتتىق سپورت تۇرلەرىنەن باستالعان قازاقستان رەسپۋبليكاسى چەمپيوناتىنا 19 كوماندا قاتىسىپ جاتىر.
ولاردىڭ اراسىندا تەك شىعىس قازاقستان وبلىسىنىڭ عانا سپورتشىلارى جوق. جالپى بۇل جولى جارىس الاڭىنا 100 دەن استام سپورتشى شىققان. ولاردىڭ ىشىندە حالىقارالىق جارىستاردىڭ جەڭىمپازدارى دا بار.
- بۇل چەمپيونات - تەك سپورتتىق باسەكە عانا ەمەس، بۇل - حالقىمىزدىڭ سان عاسىرلىق تاريحىنان سىر شەرتەتىن، ۇرپاقتان-ۇرپاققا جالعاسىپ كەلە جاتقان رۋحاني قۇندىلىقتىڭ جالعاسى. اسىق ويىنى - ۇلت تاربيەسىنىڭ وزەگىنە اينالعان، ۇلتتىق سانانى قالىپتاستىراتىن ەرەكشە مادەني مۇرا. بۇگىنگى ءىس- شارا - سالت- ءداستۇرىمىزدى ۇلىقتاۋمەن قاتار، ۇلتتىق سپورت ارقىلى ەل مەرەيىن ۇستەم ەتىپ جۇرگەن ساڭلاقتارىمىزدى تانىستىراتىن كۇن. سولاردىڭ ءبىرى - ءسانيا اسكەر. ول 2024 -جىلى استانادا وتكەن V دۇنيەجۇزىلىك كوشپەندىلەر ويىندارىندا قازاقستان ايەلدەر قۇراماسى ساپىندا ونەر كورسەتىپ، التىن جۇلدەنى قانجىعاسىنا بايلادى. اسىق اتۋ شەبەرى - كاميلا سەكسەمباي. بىلتىر الەم كۋبوگىندا توپ جاردى. مىنە، وسىنداي تۇلعالار - ەلدىڭ رۋحىن كوتەرەتىن، جاس بۋىنعا باعىت- باعدار بەرەتىن لايىقتى ۇلگى، - دەدى سولتۇستىك قازاقستان وبلىستىق دەنە شىنىقتىرۋ جانە سپورت باسقارماسىنىڭ باسشىسى ءادىلحان ساعىندىقوۆ.
بۇل جارىستا سقو نامىسىن التى سپورتشى قورعايدى، ولار: كەنجەحان اكىمجانوۆ، دامير سۇندەتوۆ، قانات جاحين، سانيا اسكەر، سابينا ەرماعانبەت جانە كاميلا سەكسەمباي.
چەمپيوناتتا س ق و- نىڭ اسىق اتۋدان اعا جاتتىقتىرۋشىسى اقجان سۇراعانوۆقا «اسىق اتۋ سپورتىنىڭ قايراتكەرى» مەدالى تابىس ەتىلدى.
بەس اسىق جانە اسىق اتۋ ۇلتتىق سپورت تۇرلەرىنەن باستالعان قازاقستان چەمپيوناتى 13-ماۋسىمعا دەيىن جالعاسادى.
بۇعان دەيىن قازاقستان قۇراماسى سپورتتىق گيمناستيكادان ازيا چەمپيوناتىندا 3 مەدال جەڭىپ العانىن جازعان ەدىك.
