پەتروپاۆلدا استانالىق ايەلدەن جارتى كەلى سينتەتيكالىق ەسىرتكى تاركىلەندى

پەتروپاۆل. KAZINFORM - پەتروپاۆلدا سينتەتيكالىق ەسىرتكى ساتۋدى كاسىپ ەتكەن استانالىق ايەلدەن جارتى كەلىدەن استام ەسىرتكى الىندى. بۇل - وبلىستا تاركىلەنگەن ەڭ ءىرى سينتەتيكالىق ەسىرتكى پارتيالارىنىڭ ءبىرى.

سولتۇستىك قازاقستان وبلىسى پوليتسيا دەپارتامەنتى باسپا ءسوز قىزمەتىنىڭ مالىمەتىنشە، وتكەن جىلدىڭ جەلتوقسان ايىندا ەسىرتكى قىلمىسىنا قارسى ءىس-قيمىل باسقارماسىنىڭ قىزمەتكەرلەرى سينتەتيكالىق ەسىرتكى تاراتۋعا قاتىسى بار كۇدىكتى ايەلدى ۇستادى. ءتارتىپ ساقشىلارى نابەرەجنايا كوشەسىندە كەتىپ بارا جاتقان «Hyundai Elantra» اۆتوكولىگىن توقتاتقان. كولىك سالونىندا استانا قالاسىنىڭ ەشقايدا جۇمىس ىستەمەيتىن 43 جاستاعى تۇرعىنى بولعان. ول پەتروپاۆل قالاسىندا ۋاقىتشا تۇرىپ كەلگەن. ايەلدەن 80 تۇيىنشەك تاركىلەندى.

ساراپتاما ناتيجەسىنە سايكەس، بۇل زات «مەفەدرون» سينتەتيكالىق ەسىرتكىسى بولىپ شىقتى. ونىڭ تۇرعىلىقتى مەكەنجايىنان دا ەسىرتكى مەن بۋىپ-ءتۇيۋ قۇرالدارى تابىلدى. تاركىلەنگەن زاتتىڭ جالپى سالماعى 0,5 كەلىدەن استى. ونىڭ 247,8 گرامى - مەفەدرون، 322,36 گرامى α- PvP ەسىرتكىسى.

«بۇل فاكتى ق ر قىلمىستىق كودەكسىنىڭ 297-بابىنىڭ 3-بولىگى بويىنشا سوتقا دەيىنگى تەرگەپ-تەكسەرۋلەردىڭ ءبىرىڭعاي تىزىلىمىنە ەنگىزىلدى. جەدەل ۋاكىلدەردىڭ اقپاراتى بويىنشا، ينتەرنەت-دۇكەندەگى كۋراتورلارى كۇدىكتىنى «بۋىپ-ءتۇيۋشى» رەتىندە پەتروپاۆلعا جىبەرگەن. ايەل 2 اي جۇمىس ىستەپ ۇلگەرگەن. بۇل - وبلىستا تاركىلەنگەن ەڭ ءىرى سينتەتيكالىق ەسىرتكى پارتيالارىنىڭ ءبىرى»، - دەيدى س ق و پ د ەسىرتكى قىلمىسىنا قارسى ءىس-قيمىل باسقارماسىنىڭ باستىعى رۋسلان ساپاروۆ.