اقان سەرى قورامسا ۇلى اتىنداعى رەسپۋبليكالىق ءداستۇرلى انشىلەر بايقاۋى باستالدى

 پەتروپاۆلدا اقان سەرى قورامسا ۇلىنىڭ 180 جىلدىق مەرەيتويىنا وراي رەسپۋبليكالىق ءداستۇرلى انشىلەر بايقاۋى باستالدى.

ەكىنشى رەت ءوتىپ وتىرعان ونەر دوداسىنا قاتىسۋعا بيىل 40 تان استام ۇمىتكەر تىلەك ءبىلدىردى، دەپ حابارلايدى Kazinform.

اقىن، ءانشى، كومپوزيتور اقان سەرىنىڭ بيىل 180 جىلدىق مەرەيتويى. وسىعان وراي وبلىستىق فيلارمونيادا اقان سەرى قورامسا ۇلى اتىنداعى II رەسپۋبليكالىق ءداستۇرلى انشىلەر بايقاۋى باستالدى. ءىس- شاراعا ەلىمىزدىڭ تۇكپىر- تۇكپىرىنەن 18 بەن 35 جاس ارالىعىنداعى انشىلەر قاتىسىپ جاتىر.

بۇگىن بايقاۋدىڭ ءبىرىنشى كەزەڭىندە قاتىسۋشىلار اقان سەرىنىڭ اندەرىن: «قۇلاگەر»، «مايداقوڭىر»، «كوكشەتاۋدىڭ بيىگى»، «شوقتىعى بيىك»، «كوكجەندەت»، «سىرىمبەت» سەكىلدى ەل اراسىندا تانىمال اندەرىن شىرقادى. ال بۇل كەزەڭنەن وتكەندەر ەرتەڭ ءوز قالاۋى بويىنشا حالىق ءانىن نەمەسە حالىق كومپوزيتورلارىنىڭ ءبىر ءانىن ورىندايدى.

«جالپى ماقساتىمىز - اقان بابامىزدىڭ ءان مۇراسىن ناسيحاتتاپ، ونى كەلەشەك ۇرپاققا جەتكىزۋ. جالپى اتادان بالاعا ميراس بولعان سال- سەرىلەردىڭ شىعارمالارىن كەڭىنەن تانىتۋ. ارينە، جاس دارىنداردى انىقتاۋ. II رەسپۋبليكالىق ءداستۇرلى انشىلەر بايقاۋى ەرتەڭ مارەسىنە جەتپەك. ەكى كەزەڭنەن دە سۇرىنبەي ءوتىپ، توپ جارعان انشىلەر ماراپاتتالادى جانە قاراشانىڭ 24- كۇنى بولاتىن گالا- كونسەرتتە ونەر كورسەتەدى» - دەيدى ءىس- شارانى ۇيىمداستىرۋشىلاردىڭ ءبىرى، ق ر مادەنيەت سالاسىنىڭ ۇزدىگى ءبىرجان ەسجانوۆ.

بايقاۋعا ءداستۇرلى ءان ونەرىن دامىتۋعا ۇلەسىن قوسىپ، سال- سەرىلەر ءداستۇرىن جالعاستىرۋشى ەربول ايتبايەۆ، ونەر مايتالماندارى - قايرات كاكىموۆ، نۇرجان جانپەيىسوۆ، داۋرەنبەك الكەنوۆ قازىلىق ەتىپ جاتىر.