پەتروپاۆلدا ابىلايحاننىڭ تۋى كوتەرىلدى
پەتروپاۆل. KAZINFORM - قازاقستاننىڭ مەملەكەتتىك رامىزدەرى كۇنى قارساڭىندا پەتروپاۆلدا ءۇش ءجۇزدىڭ باسىن قوسقان ابىلاي حاننىڭ تۋى كوتەرىلدى.
«ابىلاي حان رەزيدەنتسياسى» مۋزەي كەشەنىنىڭ مالىمەتىنشە، ابىلاي حاننىڭ ناقتى تۋىنىڭ بەينەسى جانە ناقتى اقپارات ساقتالماعان. ول تۋرالى دەرەكتەر كوپ جىل بويى ديسكۋسسيادا بولىپ، تالقىلاندى. ناتيجەسىندە بيىل تابىلعان تاريحي دەرەكتەرگە سۇيەنە وتىرا، شوقان ءۋاليحانوۆتىڭ، بەلگىلى تاريحشى قۇربانعالي حاليدتىڭ «بەس تاريح» عىلىمي ەڭبەگىنە سۇيەنىپ، زاماناۋي تاريحشىلاردىڭ جانە تۇركىستان قالاسىنداعى ابىلاي جەرلەنگەن قوجا احمەت ياساۋي كەسەنەسىنىڭ عىلىمي قىزمەتكەرلەرىنىڭ بىرلەسە تالقىلاپ، زەرتتەۋ جۇرگىزۋ نەگىزىندە ابىلاي تۋىنىڭ جيناقتى بەينەسى بەكىتىلدى.
وسىلايشا قوجا احمەت ياسساۋي كەسەنەسىندە تاۋكە، ەسىم حانداردىڭ تۋىمەن قاتار ابىلايدىڭ تۋى ورناتىلدى. ەندى بۇل تۋدى ابىلايحان رەزيدەنتسياسىنان دا كەلىپ كورۋگە بولادى.
«جالپى، جوشى حاننىڭ ۇرپاقتارى قىزىل تۋدى ۇستاعان. كەيىن شىعايدىڭ ۇلكەن ۇلى اق تۋ ۇستاعان. ودان كەيىن بولات حان كەزىندە ۇلدارىنا ابىلمامبەتكە قىزىل تۋ، ابىلايعا كوك تۋ ۇستاتقان. كەيىن ابىلاي حان بولعان كەزىندە وسى ءۇش ءتۇستى بىرىكتىرىپ، تۋ قىلىپ ۇستادى. تۋ ورتاسىندا شىڭعىسحاننان تاراعان شىڭعىس تورەلەردىڭ تاڭباسى بار، تۋدىڭ ارتقى جاعىندا ابىلاي ءمورى بەينەسى سالىنعان»، - دەيدى «ابىلاي حان رەزيدەنتسياسى» مۋزەي كەشەنىنىڭ ءبولىم باسشىسى ءاليا مامبەتالينوۆا.
