گۋتەرريش: يزرايل حالىقارالىق قۇقىقتى بۇزدى، كىنالىلەر جاۋاپقا تارتىلۋى ءتيىس

نيۋ-يورك. KAZINFORM – ب ۇ ۇ باس حاتشىسى انتونيۋ گۋتەرريش يزرايلدىڭ حالىقارالىق قۇقىقتى بۇزعانىن جانە بۇل ءۇشىن جاۋاپكەرشىلىككە تارتىلۋى كەرەك ەكەنىن مالىمدەدى. بۇل تۋرالى ول نيۋ-يوركتە جۋرناليستەرگە بەرگەن سۇحباتىندا ايتتى، دەپ جازدى انادولى.

ب ا ق وكىلدەرى گۋتەرريشكە يزرايلدىك اسكەريلەردىڭ بەيبىت پالەستينالىقتاردى اتىپ ولتىرۋگە بۇيرىق العانى تۋرالى اقپاراتتى ەسكە سالدى جانە مۇشە مەملەكەتتەر يزرايلگە قارسى سانكسيالار ەنگىزەتىن ۋاقىت كەلگەن جوق پا، دەگەن سۇراق قويدى.

- بۇل ءۇشىن ارنايى ەسەپتىڭ قاجەتى جوق - يزرايلدىڭ حالىقارالىق قۇقىقتى ورەسكەل بۇزعانى انىق. مۇنداي زاڭبۇزۋشىلىقتار بولعان جاعدايدا كىنالىلەر ءسوزسىز جاۋاپقا تارتىلۋى ءتيىس، - دەپ باسا ايتتى باس حاتشى.

گۋتەرريش سونداي-اق، ا ق ش پەن يزرايلدىڭ قولداۋىمەن قۇرىلعان «گازاعا گۋمانيتارلىق كومەك قورىنىڭ» گۋمانيتارلىق كومەك تاراتۋ ورتالىقتارىندا بەيبىت تۇرعىنداردىڭ قازا تابۋى تۋرالى جالعان اقپارات تاراتتى دەگەن ايىپتاۋىنا پىكىر ءبىلدىردى.

- بارشاڭىز كورگەن بەينەجازبالاردى ءبىز ويدان شىعارعان جوقپىز، - دەدى ول.

سونداي-اق، گازا سەكتورىندا اتىستى توقتاتۋ جونىندەگى جاڭا باستامالارعا قاتىستى سۇراققا جاۋاپ بەرىپ، گۋتەرريش:

- ءبىز پالەستينا اكىمشىلىگى ۇسىنعان بەيبىت باستامالاردى تولىعىمەن قولدايمىز، - دەدى.

ەسكە سالا كەتەيىك، بۇعان دەيىن گۋتەرريش تاياۋ شىعىستاعى شيەلەنىستى توقتاتۋعا شاقىردى.