تەرروريزمگە قارسى كۇرەستىڭ «سارى» دەڭگەيى الىندى - جەدەل شتاب

استانا. KAZINFORM - شاڭحاي ىنتىماقتاستىق ۇيىمىنا مۇشە مەملەكەتتەر باسشىلارىنىڭ سامميتى مەن قىتاي حالىق رەسپۋبليكاسى ءتوراعاسىنىڭ مەملەكەتتىك رەسمي ساپارى اياقتالدى.

وسىعان بايلانىستى «تەرروريزمگە قارسى ءىس- قيمىل تۋرالى» زاڭنىڭ 13-جانە 15-باپتارىنا سايكەس كۇزەتىلەتىن تۇلعالاردىڭ قاۋىپسىزدىگىن قامتاماسىز ەتۋ بويىنشا كۇزەت ءىس- شارالارىن وتكىزۋ كەزىندە تەرروريزمگە قارسى كۇرەس جونىندەگى رەسپۋبليكالىق جەدەل شتابتىڭ باسشىسى رەتىندە قازاقستان رەسپۋبليكاسى مەملەكەتتىك كۇزەت قىزمەتى باستىعى تەرروريزمگە قارسى وپەراتسيا رەجيمىن 4 -شىلدەنىڭ 23 ساعات 59 مينۋتىنان استانا قالاسىندا الىپ تاستاۋ تۋرالى شەشىم قابىلداندى.

سونىمەن قاتار قازاقستان رەسپۋبليكاسى پرەزيدەنتىنىڭ 2013 -جىلعى 9-تامىزداعى №611 جارلىعىمەن بەكىتىلگەن «تەرروريزم اكتىسى قاتەرىنىڭ تۋىنداۋى تۋرالى اقپارات مونيتورينگىنىڭ جانە حالىقتى حاباردار ەتۋدىڭ مەملەكەتتىك جۇيەسىنىڭ ۇيىمداستىرىلۋى مەن جۇمىس ىستەۋ قاعيدالارىنا» سايكەس استانا، الماتى، قاراعاندى جانە كوكشەتاۋ قالالارىندا 4-شىلدەنىڭ 23 ساعات 59 مينۋتىنان تەرروريستىك قاۋىپتىلىكتىڭ ءبىرقالىپتى («سارى» ) دەڭگەيى الىپ تاستالىنادى.

«كۇشتىك قۇرىلىم بولىمشەلەرى شتاتتىق رەجيمدەگى جۇمىسقا كوشەدى»، - دەلىنگەن تەرروريزمگە قارسى كۇرەس جونىندەگى رەسپۋبليكالىق جەدەل شتاب حابارلاماسىندا.