تۇرلىحانوۆتىڭ ۇلىنا قاتىستى تاعى داۋ شىقتى
استانا. KAZINFORM - الەۋمەتتىك جەلىدە ءماجىلىس دەپۋتاتى داۋلەت تۇرلىحانوۆتىڭ بوستاندىعى شەكتەلگەن ۇلى نۇراسىل بولاتتىڭ تۇنگى ۋاقىتتا ەمىن-ەركىن جۇرگەن ۆيدەوسى تارادى.
«تاڭەرتەڭ Direct-كە وسىنداي ۆيدەو كەلدى. وندا ءماجىلىس دەپۋتاتى داۋلەت تۇرلىحانوۆتىڭ ۇلى نۇراسىل بولاتتىڭ تۇرعانىن كوردىم. ونىڭ بوستاندىعى شەكتەلگەن جانە وعان قوسىمشا تالاپتاردى ورىنداۋ جۇكتەلگەن. ءبىراق، ۆيدەودان ونىڭ زاڭعا قايشى ارەكەت ەتىپ، تالاپتاردى ساقتاماعانىن بايقاۋعا بولادى»، - دەپ جازدى زاڭگەر اننا چەرنوۆا Instagram-داعى پاراقشاسىندا.
وقيعانىڭ ءمان-جايىن ءبىلۋ ماقساتىندا قىلمىستىق-اتقارۋ جۇيەسى كوميتەتىنە جۇگىنگەن ەدىك.
«ن. بولاتقا قاتىستى ۇكىمدى ورىنداۋ پروباتسيا قىزمەتىنە (تىركەلگەن مەكەنجايى بويىنشا) بيىل 14-تامىزدا كەلىپ ءتۇستى. زاڭناماعا سايكەس پروباتسيالىق باقىلاۋ سوتتالعان ادامدى ەسەپكە العان ساتتەن باستاپ جۇزەگە اسىرىلادى»، - دەگەن جاۋاپ الدىق كوميتەتتىڭ باسپا ءسوز قىزمەتىنەن.
ەسكە سالا كەتەيىك، 2023 -جىلى اقپاندا نۇراسىل بولات الماتىدا زاڭگەر اننا دميتريەۆيچ پەن ونىڭ كۇيەۋى ولەگ چەرنوۆتى سوققىعا جىققان ەدى. كەيىن سپورت قايراتكەرى داۋلەت تۇرلىحانوۆ بالاسىنىڭ بۇزاقىلىق ارەكەتىنە بايلانىستى پىكىر ءبىلدىردى. ودان بولەك، داۋلەت تۇرلىحانوۆ ۇلىنىڭ ىسىنە ارالاسپايتىنىن ايتتى.
ال، وتكەن جىلى 2-شىلدە كۇنى ول مەرزىمدى اسكەري بورىشىن وتەپ جاتقان جەرى - قونايەۆ گارنيزونى اسكەري بولىمدەرىنىڭ بىرىنەن قاشىپ كەتكەن بولاتىن. كەيىن كوپ وتپەي تابىلىپ، قىزمەت اتقاراتىن ورنىنا جەتكىزىلدى. الماتى گارنيزونى ءبولىم باستىعىنىڭ بۇيرىعىنا باعىنباعانى جانە ورىنداماعانى ءۇشىن اكىمشىلىك جاۋاپكەرشىلىككە تارتىلدى.
2023 -جىلى 9-قازاندا داۋلەت تۇرلىحانوۆتىڭ ۇلىنا سوت ۇكىمى شىقتى. پروكۋرور سوتتالۋشى ب-عا 1 جىل 6 اي باس بوستاندىعىن شەكتەۋ تۇرىندە جازا تاعايىنداۋدى سۇرادى.
بيىل مامىردا جوعارعى سوت داۋلەت تۇرلىحانوۆتىڭ ۇلىنا كەسىلگەن ۇكىمدى وزگەرتتى. سودان سوڭ داۋلەت تۇرلىحانوۆ ۇلىنىڭ سوت ۇكىمىنە قاتىستى پىكىر ءبىلدىردى.
