تۇركىستاننان استاناعا «بىرلىك كەرۋەنى» كەلە جاتىر
تۇركىستان. KAZINFORM - استانا قالاسىندا 8-13-قىركۇيەك ارالىعىندا V دۇنيەجۇزىلىك كوشپەندىلەر ويىندارى وتەدى. وسىعان وراي تۇركىستان وبلىسىنان «بىرلىك كەرۋەنى» جوباسى ۇيىمداستىرىلىپ، ەلورداعا جولعا شىقتى.
ءىس-شارا بارىسىندا تۇركىستان وبلىسى اكىمىنىڭ ورىنباسارى ەرتاي التايەۆ قوجا احمەت ياساۋي كەسەنەسىنىڭ ىشىندەگى قۇدىقحانا بۇلاق سۋى قۇيىلعان تورسىقتى قازاقستان رەسپۋبليكاسى ۇلتتىق قۇراما كومانداسىنىڭ مۇشەسى عالىمجان يزجانوۆ تاپسىردى.
«دۇنيەجۇزىلىك كوشپەندىلەر ويىندارىنىڭ ءوتۋ باعىتى سپورتتىق، مادەني جانە عىلىمي باعدارلامالار بويىنشا جۇزەگە اسادى. سوندىقتان ماڭىزدى شارانىڭ وتۋىنە ءوڭىر سپورتشىلارى عانا ەمەس، مادەنيەت جانە عىلىم وكىلدەرى دە اتسالىساتىن بولادى. بۇل جوبادا ءار وبلىستىڭ بەلىگىلى سپورتشىلارى باستاعان كەرۋەن جەرگىلىكتى جەردەگى قاسيەتتى بۇلاقتار مەن قۇدىقتاردان سۋ الىپ، ارنايى تورسىقپەن استانا قالاسىنا جەتكىزەتىن بولادى. وسىعان وراي، سۋ الۋ ءراسىمىن وتكىزۋدە تۇركىستان قالاسىنداعى قوجا احمەت ياساۋي كەسەنەسىنىڭ ىشىندەگى قۇدىقحانابۇلاق كوزى تاڭدالىپ وتىر. قازىر عانا ءبىزدىڭ سپورتشىلارىمىز باستاعان ارنايى توپ قۇدىقحانا ىشىنەن سۋ الىپ، الدارىڭىزعا كەلدى. مەن وسى ورايدا، كوشپەندىلەر ويىندارى وتەتىن نەگىزگى الاڭعا وبلىستىڭ ىستىق سالەمىن، قاسيەتتى سۋدى جەتكىزەتىن كەرۋەنگە ساتتىلىك تىلەيمىن! بۇل دودادا ەل نامىسىن قورعايتىن وبلىس سپورتشىلارى قۋانتارلىق ناتيجە كورسەتەدى دەپ سەنەمىن»، - دەدى ەرتاي التايەۆ
ايتا كەتەيىك، 5- دۇنيەجۇزىلىك كوشپەندىلەر ويىندارى سپورتتىڭ 21 ءتۇرى بويىنشا وتەدى. وعان الەمنىڭ 89 ەلىنەن 2000-عا جۋىق سپورتشى، باپكەرلەر مەن وكىلدەر قاتىسىپ، نەگىزگى جۇلدەلەردى ساراپقا سالماق. ونىڭ ىشىندە سپورتتىڭ 13 ءتۇرى بويىنشا قازاقستان قۇراماسىنىڭ ساپىندا تۇركىستان وبلىسىنان 29 سپورتشى قاتىسادى.
اۆتور
قايرات زاينيشيەۆ
