تۇركىستاندا ءىس جۇزىندە جۇمىسقا تۇرماعان ادامدارعا 130 ميلليون تەڭگە تولەنگەن
استانا. KAZINFORM - تۇركىستاننىڭ ەڭبەك موبيلدىلىگى ورتالىعىندا ءىس جۇزىندە جۇمىسقا تۇرماعان ادامدارعا 130 ميلليون تەڭگە تولەنگەن. بۇل تۋرالى قارجىلىق مونيتورينگ اگەنتتىگىنىڭ باسپا ءسوز قىزمەتى حابارلايدى.
قارجىلىق مونيتورينگ اگەنتتىگى وبلىس پروكۋراتۋراسىنىڭ ۇيلەستىرۋىمەن حالىقتى جۇمىسپەن قامتۋ سالاسى بويىنشا بولىنگەن بيۋدجەت قاراجاتىن تالان-تاراجعا سالۋ دەرەكتەرىنە قاتىستى بىرنەشە قىلمىستاردى اشكەرەلەگەن.
وبلىستىق جۇمىسپەن قامتۋدى ۇيلەستىرۋ جانە الەۋمەتتىك باعدارلامالار باسقارماسىنىڭ «ەڭبەك موبيلدىلىگى ورتالىعى» ك م م-نىڭ قىزمەتكەرلەرى مەملەكەتكە 130 ميلليون تەڭگەدەن استام زالال كەلتىرگەن.
«ەڭبەك موبيلدىلىگى ورتالىعى» ك م م-نىڭ جاۋاپتى تۇلعالارى «2021-2025» جىلدارعا ارنالعان كاسىپكەرلىكتى دامىتۋ جونىندەگى ۇلتتىق جوباسى» اياسىندا سۋبسيديالانعان جۇمىس ورىندارىنا قاتىسۋشى تۇلعالاردىڭ جالاقىلارىن تولەۋ بارىسىندا، ءبىرقاتار كاسىپورىنداردىڭ باسشىلارىمەن ادامدار توبى بولىپ ءسوز بايلاسا وتىرىپ، مەكەمەلەردە ءىس-جۇزىندە جۇمىس جاسامايتىن 132 ازاماتتىڭ جەكە دەرەكتەرىن «ەڭبەك نارىعى» اۆتوماتتاندىرىلعان اقپاراتتىق جۇيەسىنە ەنگىزىپ، ولارعا اۋدارىلعان ايلىق جالاقىلارىن يەمدەنىپ وتىرعان.
ايتا كەتەيىك، بۇعان دەيىن تۇركىستان وبلىسىندا «جايلى مەكتەپ» قۇرىلىسىن جوسپاردان كەشىكتىرگەندەر ەسكەرتۋ العانى تۋرالى جازعان ەدىك.
