تۇركىستاندا اسىل تۇقىمدى ەشكىلەر كورمەسى ءوتتى
تۇركىستان. KAZINFORM - رەسپۋبليكالىق ءىس- شاراعا 200 گە جۋىق مال باسى مەن 350 دەن استام ادام قاتىستى.
تۇركىستان قالاسىندا العاش رەت «ءسۇت جانە ەت باعىتىنداعى اسىل تۇقىمدى ەشكىلەر» رەسپۋبليكالىق كورمەسى ءوتتى. ءىس- شارا تۇركىستان وبلىسى اكىمدىگىنىڭ قولداۋىمەن، «سەكسەك اتا» شارۋاشىلىعىنىڭ باستاماسىمەن ۇيىمداستىرىلدى.
كورمەگە قازاقستاننىڭ ءار وڭىرىنەن كەلگەن فەرمەرلەر، ۆەتەريناريا سالاسىنىڭ ماماندارى مەن قوناقتار قاتىستى. شەتەلدەن اكەلىنگەن زاانەن، ءالپى، لامانچا، انگلو- نۋبي، بۋر، كاموري، گۋلابي سىندى تانىمال تۇقىمدار قويىلىپ، جالپى سانى 200 گە جۋىق اسىل تۇقىمدى مال باسى تانىستىرىلدى. ولاردىڭ قاتارىندا ءسۇتتى ەشكىلەر، تەكەلەر جانە لاقتار بار.
كورمە بارىسىندا قاتىسۋشىلار ەشكى سۇتىنەن جاسالعان قۇرت، ىرىمشىك، ايران، كوجە، يوگۋرت ونىمدەرىنەن ءدام تاتتى.
كورمەگە كورشىلەس رەسەي، قىرعىزستان، وزبەكستان ازاماتتارى قىزىعۋشىلىق ءبىلدىرىپ، تىكەلەي ەفير ارقىلى تاماشالادى.
تىركەۋدەن سوڭ ەشكىلەردەن سىنامالار الىندى. اتاپ ايتقاندا، سىرت پىشىندەرى باعالانىپ، ەكستەرەرى قارالدى. بويى مەن سالماعى ولشەندى. ءسۇتىنىڭ مايلىلىعى مەن قۇنارلىلىعى زەردەلەندى. ەتتى باعىتى دا ەسكەرىلدى. قازىلار القاسى جەكە- جەكە ۇپاي قويىپ، ءادىل تۇردە ەڭ ەرەكشە ەشكى ءتۇرىن انىقتاۋعا اتسالىستى.
ناتيجەسىندە ەڭ ءسۇتتى ەشكى تۇركىستان وڭىرىنەن، سىرت كەلبەتى ۇزدىك تۇقىم شىمكەنت قالاسىنان، ەڭ اۋىر ەشكى جامبىل وبلىسىنان شىقتى.
سونىمەن قاتار «ساۋىنشىلار»، «اسىلداندىرۋ»، «ەڭ ۇزدىك ءسۇت ونىمدەرى» سىندى نوميناتسيالار بويىنشا كۋبوكتار مەن 300 مىڭ تەڭگەگە دەيىنگى سىيلىقتار تابىستالدى. لاقتار سايىسى مەن ساۋىنشىلار جارىسى دا كوپشىلىكتىڭ قىزىعۋشىلىعىن وياتتى.
كورمەنى تاماشالاۋعا كەلگەندەردىڭ سانى 350 ادامنان استى. ۇيىمداستىرۋشىلار بۇل يگى باستاما كەلەشەكتە ءداستۇرلى تۇردە جالعاساتىنىن جەتكىزدى.
ايتا كەتەيىك، بۇدان بۇرىن تۇركىستان وبلىسىندا 47 كوشەگە ارداگەرلەردىڭ ەسىمى بەرىلەتىنىن جازعان بولاتىنبىز.
