تۇركىستاندا 9-سىنىپ وقۋشىسىن سىنىپتاسى ۇرىپ ءولتىردى
تۇركىستان. KAZINFORM - وقيعا 3-قاراشا كۇنى تۇركىستان قالاسىنىڭ شەتىندەگى زيراتتاردىڭ بىرىندە بولعان.
تۇركىستان وبلىسى پوليتسيا دەپارتامەنتىنىڭ حابارلاۋىنشا، قازىرگى تاڭدا وقۋشىنىڭ ءولىمى بويىنشا سوتقا دەيىنگى تەرگەۋ جۇرگىزىلىپ جاتىر.
- وقيعا ورنىنا بارعان جەدەل- تەرگەۋ توبى بارلىق قاجەتتى شارالاردى جۇرگىزدى. الدىن الا مالىمەت بويىنشا، 9-سىنىپ وقۋشىسىن سىنىپتاسى كەۋدە تۇسىنان ۇرعان. سوققى العان وقۋشى سول جەردە قايتىس بولعان. جەدەل-ىزدەستىرۋ ءىس-شارالارىنىڭ ناتيجەسىندە پوليتسەيلەر كۇدىكتىنى، سونداي-اق وقيعاعا قاتىسقانداردىڭ ءبارىنىڭ ءىزىن سۋىتپاي ۇستادى، - دەلىنگەن وبلىستىق پوليتسيا دەپارتامەنتىنىڭ رەسمي مالىمدەمەسىندە.
سونداي-اق جاس وسپىرىمدەردىڭ زاڭدى وكىلدەرى بالالاردى تاربيەلەۋ جونىندەگى مىندەتىن ورىنداماعانى ءۇشىن جاۋاپقا تارتىلدى.
اكىمدىك جانىنداعى كامەلەتكە تولماعاندار ىستەرى جانە ولاردىڭ قۇقىعىن قورعاۋ جونىندەگى كوميسسياعا ءتيىستى ۇسىنىس ەنگىزىلدى.
بۇدان بۇرىن تۇركىستان وبلىسىندا پوليتسەي پارا الدى دەگەن كۇدىكپەن ۇستالعانىن جازعان ەدىك.
