تۇركىستانعا وزگە وڭىرلەر تارتۋ ەتكەن عيماراتتاردىڭ بۇگىنگى جاعدايى قالاي
تۇركىستان. KAZINFORM - تۇركىستان قالاسى وبلىس ورتالىعى اتانعان ساتتە وزگە وڭىرلەر سىي رەتىندە بىرنەشە عيمارات سالىپ بەرگەن بولاتىن. ولاردىڭ ىشىندە شىعىس مونشاسى، ۆيزيت ورتالىق، نەكە سارايى سەكىلدى الەۋمەتتىك نىساندار دا بار. كەيىننەن ەل ىشىندە اتالعان عيماراتتار جەكە مەنشىككە ساتىلىپ كەتىپتى دەگەن اڭگىمە دە «گۋ» ەتە قالدى. سول كەزدە باسپا ءسوز بريفينگىن وتكىزگەن اكىمدىك الەۋمەتتىك نىسانداردىڭ ساتىلماعانىن، تەك سەنىمگەرلىك باسقارۋعا بەرىلگەندىگىن ايتقان بولاتىن. ال، سەنىمگەرلىك باسقارۋعا بەرىلگەن نىسانداردىڭ بۇگىنگى جاعدايى قالاي؟ بۇل بويىنشا Kazinform ءتىلشىسى تۇركىستان قالاسىنىڭ اكىمدىگىنە سۇراۋ سالدى.
بۇرىن تۇركىستان قالاسىنىڭ اكىمدىگى مەن مادەنيەت ءۇيى رەتىندە حالىققا قىزمەت ەتىپ كەلگەن ورتالىقتاعى قوس نىساننىڭ تاعدىرى ەل ىشىندە كوپ تالقىلاندى.
ال، تۇركىستان قالاسى اكىمنىڭ ورىنباسارى تالعات تولەگەنوۆ ۇسىنعان جاۋاپقا سۇيەنسەك، 2020 -جىلى بۇرىنعى اكىمدىك پەن مادەنيەت ءۇيى زاڭعا سايكەس اۋكسيون ارقىلى جەكەشەلەندىرۋگە بەرىلگەن.
- اتالعان عيماراتتاردى جەكەشەلەندىرۋ كەزىندە اۋكسيوننىڭ زاڭسىز وتكەنى بويىنشا سوتقا ارىز تۇسكەن. سوت شەشىمىمەن ەكى عيماراتتىڭ دا تالاپ ارىزى قاناعاتتاندىرۋسىز قالدىرىلدى. ياعني ءبارى زاڭ اياسىندا وتكىزىلگەنى تۋرالى شەشىم شىقتى. قازىرگى تاڭدا ەسكى اكىمدىك عيماراتىنىڭ جەڭىمپازى ءبىلىم سالاسىنا ينۆەستيتسيا قۇيىپ، «بولاشاق» كوللەدجىن اشتى. جەكەشەلەندىرۋ كەزىندە جەڭىمپازعا عيماراتتى ناقتى ءبىر ماقساتتا پايدالانۋ بويىنشا زاڭ اياسىندا مىندەتتەمە قويىلمايدى. ال، مادەنيەت ءۇيىنىڭ جەڭىمپازى زاڭعا سايكەس ينۆەستيتسيا تارتا وتىرىپ، قانداي ماقساتتا عيماراتتى قولدانۋدى ءوز قۇزىرىندا قالدىرادى، - دەلىنگەن اكىمدىك جاۋابىندا.
قالا اكىمدىگىنىڭ مالىمەتىنە سۇيەنسەك، تۇركىستان قالاسىندا 2020-2024 -جىلدار ارالىعىندا 5 نىسان كەيىننەن ساتىپ الۋ قۇقىعىنسىز سەنىمگەرلىك باسقارۋعا بەرىلگەن.
ونىڭ ىشىندە شىعىس مونشاسى، نەكە سارايى، ۆيزيت ورتالىعى، قولونەرشىلەر ورتالىعى، «جىبەك جولى» اتتراكسيوندار ساياباعى بار.
- تۇركىستان قالاسىندا سوڭعى 5 جىلدا كوپتەگەن جاڭا عيماراتتار مەن نىساندار بوي كوتەردى. عيماراتتاردى كۇتىپ ۇستاۋ، جەتىلدىرۋ جانە ينۆەستيتسيا قۇيۋ بيۋدجەتتەن كوپ اقشا تالاپ ەتەدى - دەيدى اكىمدىكتەگىلەر.
شىعىس مونشاسى تۇركىستانعا قىزىلوردا وبلىسىنىڭ تارتۋى رەتىندە تۇرعىزىلعان. نىسان 2020 -جىلى «Qurylys Nurcity» ج ش س-نە 5 جىل مەرزىمگە كەيىننەن ساتىپ الۋ قۇقىعىنسىز سەنىمگەرلىك باسقارۋعا بەرىلدى.
الايدا، بيىلعى ناۋرىز ايىندا قۇرىلتايشى اتىنان ارەكەت ەتەتىن تۇركىستان قالاسى اكىمدىگىنىڭ ەكونوميكا جانە قارجى ءبولىمى جانە «Qurylys Nurcity» ج ش س-مەن 2020 -جىلى 16-ساۋىردە جاسالعان سەنىمگەرلىك باسقارۋ شارتى عيماراتتى دۇرىس پايدالانباعانى ءۇشىن ەكى جاقتىڭ كەلىسىمىمەن مەرزىمىنەن بۇرىن بۇزىلعان.
سودان مەملەكەتتىك مۇلىك ءتىزىلىمى ۆەب-پورتالىندا جاريالانعان ەلەكتروندىق ساۋدا-ساتتىقتا جەكە كاسىپكەر «ورازحان» جەڭىمپاز اتاندى. ول عيماراتتى ينۆەستيسيا تارتۋ جانە كىرىس كوزدەرىن ۇلعايتۋ ماقساتىندا كەيىننەن ساتىپ الۋ قۇقىعىنسىز 10 جىل مەرزىمگە سەنىمگەرلىك باسقارۋعا الدى.
سونداي-اق، كاسىپكەر تازا تابىستىڭ 60 پايىزىن بيۋدجەتكە اۋدارىپ وتىرۋعا مىندەتتەلدى. قازىرگى تاڭدا ءوز قاراجاتى ەسەبىنەن جوندەۋ جۇمىستارىن جۇرگىزىپ جاتىر.
نەكە سارايى 2021 -جىلى «باستاما KZ» ج ش س-نە كەيىننەن ساتىپ الۋ قۇقىعىنسىز 10 جىل مەرزىمگە سەنىمگەرلىك باسقارۋعا بەرىلگەن. تازا تابىستىڭ 50 پايىزىن جەرگىلىكتى بيۋدجەتكە اۋدارىپ وتىرادى.
سەنىمگەرلىك باسقارۋشى نەكە قيۋ راسىمدەرىن وتكىزۋ ارقىلى جانە ماقساتتى پايدالانۋى نەكە قيۋ راسىمىنە قاجەتتى قىزمەتتەردى كورسەتەتىن كاسىپكەرلەرگە شارشى الاڭدى سۋبارەنداعا بەرۋ ارقىلى پايدا تاۋىپ، عيماراتتىڭ كوممۋنالدىق شىعىندارىن، كۇتىپ ۇستاۋ شىعىندارىن، اعىمداعى جوندەۋ جۇمىستارىنىڭ شىعىندارىن جانە سالىعىن، قىزمەتكەرلەرىنىڭ جالاقىسىن تولەپ وتىرادى.
ۆيزيت ورتالىعى تۇركىستان قالاسىنا كەلەتىن تۋريستەرگە قولايلى جاعداي جاساۋ، كىرىس كوزدەرىن ۇلعايتۋ جانە بيۋدجەت شىعىندارىن ازايتۋ ماقساتىندا زاڭ اياسىندا كەيىننەن ساتىپ الۋ قۇقىعىنسىز 10 جىل مەرزىمگە سەنىمگەرلىك باسقارۋعا بەرىلگەن.
كاسىپكەر عيماراتقا ينۆەستيسيا سالىپ، بارلىق كۇتىپ ۇستاۋ شىعىندارىن كوتەرىپ، كىرىستەرىنىڭ ءبىر بولىگىن بيۋدجەتكە تولەپ وتىرۋى ءتيىس بولعان. دەگەنمەن، «ۆيزيت ورتالىعى» ورتالىعى بويىنشا عيماراتتى دۇرىس پايدالانباعانى ءۇشىن زاڭدى تۇلعا «تۇركىستان ەكسكۋرسيا بيۋروسى» ج ش س-مەن ەكىجاقتى كەلىسىمگە سايكەس كەلىسىمشارت بۇزىلىپ، اتالعان عيمارات مەملەكەت تەڭگەرىمىنە قايتارىلدى.
بۇگىنگى تاڭدا تۇركىستان قالاسى اكىمدىگىنىڭ 2023 -جىلعى 16-قاراشاداعى «كوممۋنالدىق مەنشىكتىڭ كەيبىر ماسەلەلەرى تۋرالى» №451-قاۋلىسى جانە تۇركىستان وبلىسى اكىمدىگىنىڭ 2024 -جىلعى 25-قاڭتارداعى № 16-قاۋلىسىمەن «ازىرەت سۇلتان» مەملەكەتتىك تاريحي-مادەني قورىق-مۋزەيىنىڭ تەڭگەرىمىنە وتكىزىلگەن.
قولونەرشىلەر ورتالىعى - مەملەكەتتىك مۇلىك ءتىزىلىمى ۆەب-پورتالىنداعى 2023 -جىلعى 30-ناۋرىزداعى № 275901-ەلەكتروندىق حاتتاما نەگىزىندە «شەبەر-ارت» ج ش س-نە كەيىننەن ساتىپ الۋ قۇقىعىنسىز 10 جىل مەرزىمگە سەنىمگەرلىك باسقارۋعا بەرىلگەن. كاسىپكەر تازا تابىستىڭ 50 پايىزىن بيۋدجەتكە اۋدارادى.
«جىبەك جولى» اتتراكسيوندار ساياباعى «Ashyq aSpan park» ج ش س-نە كەيىننەن ساتىپ الۋ قۇقىعىنسىز 10 جىل مەرزىمگە سەنىمگەرلىك باسقارۋعا بەرىلگەن. مۇندا دا تازا تابىستىڭ 50 پايىزى بيۋدجەتكە اۋدارىلادى.
تۇركىستان قالاسى اكىمىنىڭ ورىنباسارى تالعات تولەگەنوۆ كەيىننەن ساتىپ الۋ قۇقىعىنسىز سەنىمگەرلىك باسقارۋ - مەملەكەتتىك مۇلىكتى جەكەشەلەندىرۋ ەمەس ەكەندىگىن ءتۇسىندىردى. ياعني، مەملەكەتتىك مۇلىك مەملەكەتتىڭ مەنشىگىندە بولادى، جەكە مەنشىككە وتپەيدى.
- تۇركىستان قالاسى اكىمدىگى تاراپىنان بەرىلگەن «شىعىس مونشاسى»، «قولونەرشىلەر ورتالىعى»، «جىبەك جولى» اتتراكسيوندار ساياباعى، «نەكە سارايى» جانە «ۆيزيت ورتالىعى» عيماراتتارى مەملەكەتتىك مۇلىك ءتىزىلىمى ۆەب-پورتالى ارقىلى ەلەكتروندىق تەندەرمەن باسەكەلەستىك ورتاعا مۇلىكتى ۋاقىتشا پايدالانۋعا بەرۋ بولىپ تابىلادى. بۇل جەردە جەكە كاسىپكەر عيماراتتاردى پايدالانۋدان تاپقان تابىسىنىڭ ءبىر بولىگىن كەلىسىمشارتقا سايكەس بيۋدجەتكە اۋدارادى. سەنىمگەرلىك باسقارۋ كەلىسىمشارتىنىڭ مەرزىمى بىتكەننەن كەيىن عيمارات مەملەكەتكە قايتارىلادى. سەنىمگەرلىك باسقارۋ كەلىسىمشارتى بويىنشا عيمارات جەكەشەلەندىرۋگە جاتپايتىندىعىن حابارلايمىز، - دەيدى تالعات تولەگەنوۆ.
سونداي-اق، كەيىننەن ساتىپ الۋ قۇقىعىنسىز سەنىمگەرلىك باسقارۋعا بەرىلگەن نىسانداردىڭ يەلەرىنە جالپى نىسان بويىنشا ماقساتتى پايدالانۋى، عيماراتتى كۇتىپ ۇستاۋ، كوممۋنالدىق تولەمدەرىن تولەپ وتىرۋ، عيماراتتاردى قازاقستاننىڭ بارلىق قۇرىلىس، ءورت قاۋىپسىزدىگى، سانيتارلىق، ەكولوگيالىق نورمالارىنا كەلتىرۋگە جانە وبەكتىنىڭ ساقتالۋىن قامتاماسىز ەتۋ، عيماراتتاردى سەنىمگەرلىك باسقارۋشىنىڭ قاراجاتى ەسەبىنەن قاجەتتى ينفراقۇرىلىممەن (ەلەكتر، سۋ جابدىقتارى، كارىز، جىلۋ جابدىقتارى جەلىلەرى) قامتاماسىز ەتۋ جانە عيماراتتى سەنىمگەرلىك باسقارۋدان تۇسكەن تازا تابىستىڭ ءبىر بولىگىن جەرگىلىكتى بيۋدجەتكە اۋدارۋ جۇكتەلگەن.
اۆتور
قايرات زاينيشەۆ
