تۇركىستان وبلىسىندا وقۋشى قىز بەن اناسىن ءولتىرىپ كەتتى
تۇركىستان. KAZINFORM - تۇركىستان وبلىسىندا كامەلەتكە تولماعان قىز بەن ونىڭ اناسىن ءولتىرۋ فاكتىسى بويىنشا قىلمىستىق ءىس قوزعالدى. كۇدىكتى ءىزىن سۋىتپاي ۇستالىپ، ۋاقىتشا ۇستاۋ يزولياتورىنا قامالدى.
الەۋمەتتىك جەلىدە تاراعان اقپاراتقا سۇيەنسەك، مۇعالىم بولىپ قىزمەت اتقاراتىن ەر ادام 16 جاسار قىزعا ءتيىسىپ كەلگەن. مۇنى بىلگەن اناسى كۇدىكتىنىڭ ۇستىنەن ارىز ءتۇسىرىپتى.
سودان كەيىن جۇمىستان قۋىلعان ول ءبىر ءۇيدىڭ ەكى ادامىنان كەك العان كورىنەدى.
قازىرگى ۋاقىتتا پوليتسيا قىزمەتكەرلەرى وقيعانىڭ بۇكىل ءمان-جايىن انىقتاۋ ماقساتىندا قاجەتتى جەدەل- تەرگەۋ ءىس-شارالارىن جۇرگىزىپ جاتىر.
«تۇركىستان وبلىسىنىڭ تۇرعىنى مەن ونىڭ كامەلەتكە تولماعان قىزىن ءولتىرۋ فاكتىسى بويىنشا قىلمىستىق ءىس قوزعالدى. كۇدىكتى ۇستالىپ، ۋاقىتشا ۇستاۋ يزولياتورىنا قامالدى. تەرگەۋ مۇددەسىندەگى وزگە دە اقپاراتتار جاريا ەتىلمەيدى. پوليتسيا ازاماتتاردى جالعان اقپارات تاراتپاۋعا جانە تەك رەسمي دەرەككوزدەرگە سۇيەنۋگە شاقىرادى»، - دەدى تۇركىستان وبلىسى پوليتسيا دەپارتامەنتى باستىعىنىڭ تەرگەۋ جونىندەگى ورىنباسارى اسىلجان قالداربەكوۆ.
ال، تۇركىستان وبلىستىق ءبىلىم باسقارماسىنىڭ باسپا ءسوز قىزمەتى اتالعان وقيعا بويىنشا كۇدىككە الىنعان ەر ادام ءبىلىم سالاسىندا قىزمەت اتقارمايتىندىعىن مالىمدەدى.
«كۇدىكتى دەپ تانىلعان ازاماتتىڭ ءبىلىم سالاسىندا جۇمىس ىستەمەيتىنىن مالىمدەيمىز - دەلىنگەن اقپاراتتا.
