تۇركىستان وبلىسىندا قاسقىر مەن ءشيبورى توعايداعى مالدارعا شابۋدا

 تۇركىستان. KAZINFORM - وتىرار اۋدانىنىڭ تۇرعىندارى ءتورت تۇلىگىن توعايعا شىعارا الماي وتىر.

سوڭعى كەزدەرى وتىرار اۋدانى اۋماعىندا قاسقىر مەن شيبورىلەردىڭ مالعا شابۋى ءجيىلەپ كەتكەن. اسىرەسە، اققۇم، كوكساراي، ماياقۇم، قوعام، تالاپتى اۋىلدىق وكرۋگتەرىنىڭ تۇرعىندارى ءتورت تۇلىگىن توعايعا شىعارا الماي قالعان. سەبەبى، جىرتقىشتار تەبىندە جايىلاتىن جىلقىلار مەن جەكە شارۋا قوجالىقتارىنداعى جاس تولدەردى جەپ كەتىپ جاتىر. ال، ولاردى اتۋعا جەرگىلىكتى تۇرعىنداردىڭ رۇقساتى جوق.

«قازىر اڭداردىڭ ۇيىعاتىن كەزەڭى. كوبەيەدى. ەل ىشىندە «سىردىڭ بويىنداعى توعايلاردى پانالاعان»، «ۇلتتىق پارك اۋماعىنداعى ءجۇر» دەگەن اڭگىمەلەر كوپ. ال، قاسقىردى اتۋعا ارنايى رۇقسات كەرەك. ۇلتتىق پارك اۋماعىنا قارۋمەن مۇلدەم كىرۋگە بولمايدى. ول ءۇشىن ارنايى رەسمي حات جازىلىپ، رۇقسات الىنۋى كەرەك. ال، شيبورىلەر اۋىلدىڭ ماڭايىندا ءجۇر. دەر كەزىندە قاۋىپسىزدىك شارالارىن قولعا الۋ كەرەك دەپ ويلايمىن»، - دەيدى «سىرداريا- تۇركىستان» مەملەكەتتىك وڭىرلىك تابيعي پاركىنىڭ ينسپەكتورى ابزال ۇسەنحان ۇلى.

جۋىردا وتىرار اۋدانىنىڭ اكىمدىگىندە ارنايى جيىن ءوتىپ، ءتۇز تاعىلارىنان كەلەر قاۋىپ-قاتەردىڭ الدىن الۋ ماسەلەسى قارالدى. اۋداندىق ءماسليحات ءتوراعاسى ۋاليحان ۇزاقوۆ دالا جىرتقىشتارىنىڭ شارۋالارعا كەلتىرىپ جاتقان زالالى اۋدان تۇرعىندارىمەن كەزدەسۋ بارىسىندا ءجيى ايتىلاتىن وزەكتى ماسەلەنىڭ بىرىنە اينالعانىن ايتتى.

اۋدان اكىمى اپپاراتىنىڭ باس ينسپەكتور-زاڭگەرى اسحات ءامىرحان دالا جىرتقىشتارىن اۋلاۋدىڭ ءتارتىبى مەن قاعيدالارى تۋرالى بايانداما جاساپ، زاڭدىلىعىن ءتۇسىندىردى.

سونداي- اق، وتىرار ورمان جانە جانۋارلار دۇنيەسى قورعاۋ مەكەمەسى مەن «سىرداريا- تۇركىستان» مەملەكەتتىك وڭىرلىك تابيعي پاركىنىڭ ماماندارى ءتيىستى اۋماقتاردا جابايى اڭداردى اتۋعا تىيىم سالىنعان شەكتەۋلەر جايىندا باياندادى.

«Amanat» پارتياسى وتىرار اۋداندىق فيليالىنىڭ ءتوراعاسى ەركەعالي تاڭاتاروۆ بۇگىنگى تاڭدا تۇرعىنداردىڭ كۇن كورىسىندەگى جالعىز مالى، كەيبىر ازاماتتاردىڭ نەسيەگە العان ءتورت تۇلىگى ءتۇز تاعىسىنىڭ جەمتىگىنە اينالعانىن، ءتىپتى شيبورىلەردىڭ اۋىل ارالاپ ءجۇرۋى، يەسىز جۇرگەن قاڭعىباس يتتەردىڭ كوبەيۋى تۇرعىندارعا، بالالارعا قاۋىپتى ەكەنىن جەتكىزدى.

جيىننىڭ قورىتىندىسىنا سايكەس ءماسليحات پەن پارتيا فيليالى جانە اۋدان اكىمدىگى بىرلەسكەن ارنايى جۇمىس توبىن قۇردى. وندا تۇرعىندار تاراپىنان ايتىلعان ءتيىستى ۇسىنىستار مەن شاعىمدار جيناقتالىپ، وڭتايلى شەشۋ ماسەلەسى قارالماق.