تۇركىستان وبلىسىندا جۇرگىزۋشىلەر جوندەۋدەن كەيىن بۇلىنگەن جولعا نارازى

تۇركىستان. KAZINFORM - جۋىردا جوندەلگەن تاس جولدىڭ قايتادان جارامسىز كۇيگە ءتۇسۋى قوعام تاراپىنان سىنعا ۇشىراپ وتىر.

الەۋمەتتىك جەلىلەردە شىمكەنت قالاسىنان وزبەكستان شەكاراسىنا دەيىنگى باعىتتاعى اۆتوجولدىڭ جاي-كۇيىن سىنعا العان بەينەجازبا تاراپ جاتىر. بەينەروليك اۆتورىنىڭ ايتۋىنشا، جول جامىلعىسى جوندەۋ جۇمىستارى اياقتالعاننان كەيىن ءبىر ايعا تولماي جاتىپ-اق بۇلىنگەن.

- بىرەۋلەر مۇنى اۋىر كولىكتەر بۇزدى دەر. ءبىراق جول نە ۇشىن سالىنادى، ەگەر ول كولىكتەرگە ارنالماسا؟ مەردىگەر ساپاسىز جاساسا، ءول ۇشىن جۇرگىزۋشى كىنالى ەمەس. قالىڭ، ساپالى اسفالت توسەۋ كەرەك ەدى، - دەيدى بەينەروليك اۆتورى.

بۇل ماسەلە بويىنشا جاۋاپ بەرگەن «قازاۆتوجول» ۇلتتىق كومپانياسىنىڭ مالىمەتىنشە، بەينەكادردا كورسەتىلگەن جاعداي رەسپۋبليكالىق ماڭىزى بار ا-15 «جىزاق - گاگارين - جەتىساي - كيروۆسكي - قىزىلاسكەر - سارىاعاش - اباي - جىبەك جولى» اۆتوجولىنىڭ 156-190 شاقىرىم ارالىعىندا تىركەلگەن. بۇل ۋچاسكەدە ۇزىندىعى 34 شاقىرىمدى قۇرايتىن (III تەحنيكالىق سانات) ورتاشا جوندەۋ جۇمىستارى جۇرگىزىلىپ جاتىر. جوبا اياسىندا ەسكى جابىندى جونۋ، ەكى قاباتتى اسفالتبەتون توسەۋ جانە جول جيەگىن نىعايتۋ جۇمىستارى كوزدەلگەن. جوبانى تولىق اياقتاۋ مەرزىمى 2025 -جىلدىڭ قازانىنا بەلگىلەنگەن.

- 2025 -جىلعى شىلدە ايىندا 157-175 شاقىرىم (ۇزىندىعى 18 ك م) ارالىعىندا اسفالتبەتون جامىلعىسىندا ويىقتار مەن شۇڭقىرلار تۇرىندە اقاۋلار انىقتالدى. بۇل جاعداي اۋىر جۇك كولىكتەرىنىڭ رۇقسات ەتىلمەگەن قوزعالىسى مەن بەلگىلەنگەن ءتارتىپتى ورەسكەل بۇزۋىنان تۋىندادى. ەسكەرتۋ بەلگىلەرىنىڭ ورناتىلعانىنا قاراماستان، كەيبىر جۇرگىزۋشىلەر جاڭادان توسەلگەن جابىنمەن ءجۇرۋىن جالعاستىرىپ، ونىڭ تولىق قاتۋىنا جانە بەرىكتىك قاسيەتتەرىنىڭ قالىپتاسۋىنا كەدەرگى كەلتىردى، - دەلىنگەن «قازاۆتوجول» كومپانياسى تاراتقان اقپاراتتا.

سونداي-اق، كومپانيا اتالعان ۋچاسكە بويىنشا جۇمىستاردىڭ قابىلدانباعىنىن جانە قاراجاتتىڭ تولەنبەگەندىگىن جەتكىزدى.

- جوندەۋ جۇمىستارى شەكتەۋلى جاعدايدا جۇرگىزىلىپ جاتىر. بالاما اينالما جول قاراستىرىلماعان، ال كولىك اعىنىنىڭ قارقىندىلىعى تاۋلىگىنە 15 مىڭنان اسادى. سونىمەن قاتار، وڭىردە اۋا تەمپەراتۋراسى 45+، 50+ گرادۋسقا دەيىن جەتەتىن اپتاپ ىستىق بايقالدى. قازاقستان رەسپۋبليكاسى يندۋستريا جانە ينفراقۇرىلىمدىق دامۋ ءمينيسترىنىڭ 2023 -جىلعى 5-شىلدەدەگى  492- بۇيرىعىنا سايكەس، 1- ماۋسىمنان 31 - تامىزعا دەيىنگى كەزەڭدە اۋا تەمپەراتۋراسى 25+ گرادۋستان اسقان جاعدايدا ساعات 10:00-دەن 22:00-گە دەيىن اۋىر جۇك كولىكتەرىنىڭ (جەكە وسكە تۇسەتىن سالماعى 8 توننادان جوعارى) قوزعالىسىنا تۇركىستان وبلىسىندا شەكتەۋ ەنگىزىلدى. الايدا بۇل تالاپتار ءجيى ەسكەرىلمەي، ورەسكەل بۇزىلىپ جاتىر. انىقتالعان اقاۋلارعا بايلانىستى جوندەۋ جۇمىستارى ۋاقىتشا توقتاتىلدى. قالپىنا كەلتىرۋ شارالارى مەردىگەردىڭ ءوز قاراجاتى ەسەبىنەن جۇرگىزىلۋدە، بيۋدجەت قاراجاتى تارتىلمايدى، - دەلىنگەن اقپاراتتا.

اۆتور

قايرات زاينيشەۆ