تۇركىستان وبلىسىندا بىردەن 28 پوليتسەي جازالاندى
تۇركىستان. KAZINFORM - الەۋمەتتىك جەلىدە تاراعان اقپاراتقا سۇيەنسەك، تۇلكىباس اۋداندىق پوليتسيا ءبولىمىنىڭ جانە پوليتسيا دەپارتامەنتىنىڭ 28 قىزمەتكەرى قاتاڭ سوگىس الىپ، اتقارىپ وتىرعان لاۋازىمىنا سايكەس ەمەستىگى انىقتالعان. ءتىپتى كەيبىرى قىزمەتىنەن بوساتىلعان. ولاردىڭ اراسىندا باسشىلىق وكىلدەرى دە بار.
اتالعان جاعدايعا قاتىستى پىكىر بىلدىرگەن تۇركىستان وبلىسى پوليتسيا دەپارتامەنتىنىڭ باسپا ءسوز قىزمەتى ق ر ءى ءى م مەن تۇركىستان وبلىسى پوليتسيا دەپارتامەنتىنىڭ باسشىلىعىنىڭ نۇسقاۋىن ورىنداۋ اياسىندا تەكسەرۋ جۇرگىزىلگەندىگىن مالىمدەدى.
- قورىتىندىسى بويىنشا ءتۇرلى قىزمەتتىك ءتارتىپتى بۇزعانى جانە جۇمىستاعى كەمشىلىكتەرى ءۇشىن ءبىرقاتار قىزمەتكەرلەر تارتىپتىك جاۋاپكەرشىلىككە تارتىلدى. جالپى پوليتسيا دەپارتامەنتى زاڭ بۇزۋشىلىقتاردىڭ الدىن الۋ جانە جولىن كەسۋ، سونداي- اق جەكە قۇرام اراسىندا قىزمەتتىك ءتارتىپ پەن زاڭدىلىقتى نىعايتۋ ماقساتىندا ءتيىستى شارالاردى ۇزدىكسىز اتقارىپ كەلەدى، - دەلىنگەن اقپاراتتا.
ايتا كەتەيىك، بۇدان بۇرىن تۇركىستان وبلىسىنىڭ كەلەس اۋدانىندا ءبىلىم ءبولىمىنىڭ بيۋدجەتىن تالان-تاراجعا سالعاندارعا قاتىستى سوت ۇكىمى شىققانىن جازعان بولاتىنبىز.
