تۇركىستان وبلىسىندا اگرويندۋستريالىق كلاستەر قۇرىلادى
تۇركىستان. KAZINFORM - تۇركىستان وبلىسىنىڭ اكىمى نۇرالحان كوشەروۆ باستاعان رەسمي جانە ىسكەرلىك دەلەگاتسيا مۇشەلەرى قىتاي ەلىنە جۇمىس ساپارىن شاندۇڭ پروۆينتسياسىنىڭ جينين قالاسىندا جالعاستىردى.
ساپار بارىسىندا سارىمساق ءوندىرىسى بويىنشا الەمدەگى كوشباسشى سانالاتىن «Wanglin Group» كومپانياسىنىڭ باسشىسىمەن ماڭىزدى كەزدەسۋلەر ءوتىپ، ستراتەگيالىق ارىپتەستىك تۋرالى كەلىسسوزدەر جۇرگىزىلدى. ءوڭىردىڭ اگرارلىق سەكتورداعى ينۆەستيتسيالىق جوبالارىن تالقىلاۋعا باسىمدىق بەرىلدى. كەزدەسۋ بارىسىندا سارىمساق ءوسىرۋ جانە وڭدەۋ باعىتىندا بىرلەسكەن جوبالار جۇزەگە اسىرۋ ماسەلەسى كوتەرىلدى.
حالىقارالىق كومپانيا ءوز تاجىريبەلەرىمەن ءبولىسىپ، تۇركىستان وبلىسىنىڭ اگروكليماتتىق جاعدايىن جوعارى باعالادى. ينۆەستورلار تاراپىنان وڭىرگە ناقتى قارجى سالۋ، زاماناۋي قايتا وڭدەۋ زاۋىتتارىن سالۋ جانە ەكسپورتتىق لوگيستيكانى دامىتۋ ماسەلەسى تالقىلاندى.
كەزدەسۋ ناتيجەسىندە تاراپتار تۇركىستان وبلىسىندا اگرويندۋستريالىق كلاستەر قۇرۋ، سارىمساق ءوسىرۋ كولەمىن ارتتىرۋ، فەرمەرلەرمەن ۇزاق مەرزىمدى كەلىسىمشارتتار ورناتۋ جانە دايىن ءونىمدى شەتەلگە ەكسپورتتاۋ باعىتىندا بىرلەسىپ جۇمىس ىستەۋگە ۋاعدالاستى.
ساپار اياسىندا دەلەگاتسيا كومپانيانىڭ وڭدەۋ سەحتارى مەن لوگيستيكالىق ينفراقۇرىلىمىمەن تانىسىپ، سارىمساقتى تەرەڭ وڭدەۋ مەن ەكسپورتقا باعىتتالعان ءوندىرىس الاڭىندا بولدى. دۇنيە جۇزىندەگى سارىمساق باعاسىن رەتتەۋ ورتالىعىنىڭ جۇمىسىمەن تانىستى.
قىتايدىڭ ەڭ ءىرى سارىمساق وندىرۋشىلەرىنىڭ تاريحى تەرەڭدە. كومپانيانىڭ سارىمساق ونىمدەرىن قايتا وڭدەۋ، مۇزداتۋ، كەپتىرۋ، ساقتاۋ جانە الەمدىك نارىققا شىعارۋ سالاسىندا 20 جىلدان استام تاجىريبەسى بار. جالپى ەگىستىك كولەمى - 500 مىڭ گ ا، جىلىنا 8 ميلليون توننا ءونىم ساتۋعا شىعارىلادى. ەكسپورت كولەمى - $4 ميلليارد. ساقتاۋ قويماسى - 4,8 ميلليون توننا. سارىمساقتان سان الۋان ءتۇرلى ءدارى-دارمەك، دارۋمەندەر شىعارادى.
- بۇگىنگى كەلىسسوزدەر - تۇركىستان وبلىسى ءۇشىن ماڭىزدى بەتبۇرىس. ءبىز اۋىل شارۋاشىلىعى سالاسىن دامىتۋدىڭ جاڭا كەزەڭىنە قادام باسىپ وتىرمىز. بۇل باستامالار - پرەزيدەنتىمىزدىڭ اۋىل ەكونوميكاسىن كوتەرۋ جونىندەگى تاپسىرماسىنا تولىق ساي كەلەدى. ەڭ باستىسى - اۋىل تۇرعىندارىنا ناقتى پايدا اكەلەتىن، تۇراقتى تابىس بەرەتىن جوبالاردى ىسكە اسىرۋ. ءبىزدىڭ ديقاندار تابيعي ءونىم وندىرۋگە ماشىقتانعان. ەندى ولاردى حالىقارالىق نارىققا شىعارۋ ءۇشىن جاڭا تەحنولوگيالار مەن ينۆەستيتسيالار قاجەت. بۇل - جۇمىس ورىندارىن كوبەيتۋگە، اۋىلداعى تابىستى ارتتىرۋعا، ەكسپورت كولەمىن ۇلعايتۋعا سەپ بولادى. ءبىز وسىعان بار كۇشىمىزدى سالامىز، - دەپ تۇيىندەدى تۇركىستان وبلىسىنىڭ اكىمى نۇرالحان كوشەروۆ.
ساپار اياسىندا تۇركىستان وبلىسىنىڭ دەلەگاتسياسى قىتايلىق اگرارلىق تەحنوپاركتەردىڭ جۇمىسىمەن تانىسىپ، وڭدەلگەن اۋىل شارۋاشىلىعى ونىمدەرىن ساقتاۋ، لوگيستيكا مەن ەكسپورتقا شىعارۋ مەحانيزمدەرى بويىنشا تاجىريبە الماستى.
سونداي-اق دەلەگاتسيا سارىمساق سالاسىنا ارنالعان مەملەكەتتىك مۋزەيگە بارىپ، قىتايدىڭ اگروونەركاسىپ سالاسىنداعى جەتىستىكتەرىمەن، سارىمساق ءوسىرۋ جانە وڭدەۋ تاريحىمەن تانىستى. مۋزەي ەكسپوزيسياسىندا ەجەلگى داۋىردەن بۇگىنگە دەيىنگى تەحنولوگيالار مەن عىلىمي جەتىستىكتەر ۇسىنىلعان.
تۇركىستان وبلىسى - اۋىل شارۋاشىلىعى ونىمدەرىن ءوندىرۋ بويىنشا جەتەكشى وڭىرلەردىڭ ءبىرى. جىل سايىن ونداعان مىڭ گەكتار جەرگە سارىمساق، پياز، كوكونىس جانە باقشا داقىلدارى ەگىلەدى. وبلىستا اگرارلىق سەكتوردى ءارتاراپتاندىرۋ، قايتا وڭدەۋ كاسىپورىندارىن كوبەيتۋ، سۋارمالى ەگىنشىلىكتى دامىتۋ ماقساتىندا جۇيەلى جۇمىس جۇرگىزىلۋدە. قازىرگى تاڭدا وبلىستا اۋىل شارۋاشىلىعى سالاسىنا شەتەلدىك ينۆەستيتسيا تارتۋعا بارىنشا جاعداي جاسالىپ وتىر. 2025 -جىلى وڭىرگە تارتىلعان تىكەلەي شەتەلدىك ينۆەستيتسيا كولەمىن %30- عا ارتتىرۋ جوسپارلانعان.
ايتا كەتەلىك تۇركىستان وبلىسى اۋستراليا تاجىريبەسىمەن ەت كلاستەرىن دامىتاتىنى تۋرالى جازعان ەدىك.
اۆتور
نازىم بولەسوۆا
