تۇركىستان وبلىسىندا 47 كوشەگە ارداگەرلەردىڭ ەسىمى بەرىلەدى
تۇركىستان. KAZINFORM - وڭىردە كەڭەس وداعىنىڭ باتىرلارى مەن ەكىنشى دۇنيەجۇزىلىك سوعىسى ارداگەرلەرىنىڭ ەسىمدەرىن ۇلىقتاۋ جۇمىستارى جالعاسىپ جاتىر. بيىل جىل سوڭىنا دەيىن 47 كوشەگە مايدانگەرلەردىڭ اتى بەرىلمەك.
رەسپۋبليكا بويىنشا ەسىمدەرى ۇلىقتالۋعا ءتيىس 500 ارداگەردىڭ ىشىندە 47 سى تۇركىستان وبلىسىنان ۇسىنىلدى. ىرىكتەۋدىڭ باستى تالاپتارىنىڭ ءبىرى ولار كەمىندە ءبىر وردەنمەن ماراپاتتالعان بولۋى كەرەك. وسى كريتەريگە سايكەس وبلىستان 122 ارداگەردىڭ ەسىمى مينيسترلىككە ۇسىنىلىپ، ىشىنەن 47 ى ماقۇلداندى.
- قازىرگى ۋاقىتتا اۋداندىق جانە قالالىق اكىمدىكتەر ارداگەرلەردىڭ ەسىمدەرىن كوشەلەرگە بەرۋ جۇمىسىن جۇرگىزىپ جاتىر. بۇل ۇدەرىس مادەنيەت جانە سپورت ءمينيسترىنىڭ 2023 -جىلعى 1-شىلدەدەگى 211-بۇيرىعىنا سايكەس جۇزەگە اسىرىلىپ كەلەدى. اتالعان بۇيرىقتا ەلدى مەكەندەردىڭ قۇرامداس بولىكتەرىنە اتاۋ بەرۋ، قايتا اتاۋ نەمەسە ترانسكريپتسياسىن ناقتىلاۋ كەزىندە جەرگىلىكتى حالىقتىڭ پىكىرىن ەسكەرۋ ءتارتىبى ايقىندالعان، - دەلىنگەن تۇركىستان وبلىسىنىڭ مادەنيەت باسقارماسىنىڭ اقپاراتىندا.
سونىمەن قاتار، 2020 -جىلعى 26-مامىرداعى 149-بۇيرىقپەن بەكىتىلگەن «مەموريالدىق تاقتالار ورناتۋعا رۇقسات بەرۋ» مەملەكەتتىك قىزمەت كورسەتۋ قاعيدالارىنا سايكەس، جەرگىلىكتى اكىمدىكتەر ءتيىستى كوشەلەر بويىنا ارداگەرلەر جايلى اقپارات بەرەتىن تاقتايشالار مەن مەموريالدىق بەلگىلەر ورناتۋ جۇمىستارىن جۇرگىزەتىن بولادى.
