تۇركىستان وبلىسىندا 182 جاس ءوسپىرىم جۇكتى بولىپ قالعان

تۇركىستان. KAZINFORM - ەرتە جۇكتىلىكتىڭ الدىن الۋ ماقساتىندا وڭىردە «رەپرودۋكتيۆتى دەنساۋلىقتى ساقتاۋ» اپتالىعى ءوتىپ جاتىر.

Түркістан облысында 182 жасөспірім жүкті болып қалған
Фото: Виктор Федюнин/Kazinform

بۇل تۋرالى تۇركىستان وبلىسى دەنساۋلىق ساقتاۋ باسقارماسى باسشىسىنىڭ ورىنباسارى باۋىرجان ساتىبالدى تۇركىستان وڭىرلىك كوممۋنيكاتسيالار قىزمەتىندە وتكەن بريفينگتە مالىمدەدى.

اپتالىقتىڭ باستى ماقساتى - حالىقتىڭ رەپرودۋكتيۆتى دەنساۋلىق ماسەلەلەرى تۋرالى اقپاراتتاندىرۋ، سالاۋاتتى ءومىر سالتىن ناسيحاتتاۋ جانە ۇرپاقتى بولۋ جۇيەسىمەن بايلانىستى اۋرۋلاردىڭ الدىن الۋ. اپتالىق اياسىندا اقپاراتتىق- ءتۇسىندىرۋ ءىس-شارالارى، دەنساۋلىق ساقتاۋ ورتالىقتارىندا اشىق ەسىك كۇندەرى، جاسوسپىرىمدەرگە ارنالعان تەگىن مەديتسينالىق تەكسەرۋلەر مەن كەڭەستەر ۇيىمداستىرىلادى.

بريفينگتە قر پرەزيدەنتىنىڭ جانىنداعى ايەلدەر ىستەرى جانە وتباسىلىق-دەموگرافيالىق ساياسات جونىندەگى ۇلتتىق كوميسسيا مۇشەسى نازىم جانعازينوۆا اتا-انا مەن بالا اراسىندا جوسپارلانباعان جۇكتىلىك جونىندە اشىق اڭگىمە بولۋى كەرەكتىگىن ايتىپ، ۇلت بولاشاعىنا جاۋاپكەرشىلىكپەن قاراۋعا شاقىردى. ال تۇركىستان وبلىسى دەنساۋلىق ساقتاۋ باسقارماسى باسشىسىنىڭ ورىنباسارى باۋىرجان ساتىبالدى تۇركىستان وبلىسى تۋۋ كورسەتكىشى بويىنشا ەلىمىزدەگى كوش باستاپ كەلە جاتقانىن جەتكىزدى.

«وتكەن جىلى وڭىردە 56 مىڭعا جۋىق نارەستە دۇنيەگە كەلسە، وسى جىلدىڭ العاشقى 5 ايىندا 20 مىڭ 859 ءسابي دۇنيە ەسىگىن اشىپ وتىر. انا مەن بالا دەنساۋلىعى - ەل بولاشاعىنىڭ جارقىن بولۋىنىڭ نەگىزى. بۇگىنگى تاڭدا وبلىسىمىزدا 500 مىڭعا جۋىق بالا تۋۋعا قابىلەتتى جاستاعى ايەلدەر بار. ونىڭ ىشىندە 28 مىڭنان استام ايەل جۇكتى بولىپ تىركەلگەن. سونىمەن قاتار 182 جاس ءوسپىرىمنىڭ جۇكتىلىگى تىركەلىپ وتىر. جىل سايىن قازاقستاندا جاتىر موينى وبىرىنىڭ 1900 گە جۋىق جاڭا جاعدايى انىقتالىپ، 600 گە جۋىق ايەل وسى دەرتتەن كوز جۇمادى. رەپرودۋكتيۆتى دەنساۋلىقتى قورعاۋ اپتالىعى اياسىنداعى جۇمىستار حالىق دەنساۋلىعىن نىعايتۋعا سەپتىگىن تيگىزەدى دەگەن ۇمىتتەمىن»، - دەدى باۋىرجان ساتىبالدى.

سوڭعى جاڭالىقتار