تۇركىستان تۇرعىنى 40 جاسىندا ۇشەم بوساندى

تۇركىستان. KAZINFORM - ءۇش ۇلعا تۋىستارى ناريمان، نۇريمان جانە نۇرمان ەسىمدەرىن قويدى.

بايدىبەك اۋدانىنىڭ 40 جاستاعى تۇرعىنى، كوپبالالى انا جانساۋلە دوسپانوۆا ءۇش ۇلدى دۇنيەگە الىپ كەلدى. قازىرگى تاڭدا مەرزىمىنەن بۇرىن تۋعان سابيلەردىڭ جاعدايى قالىپتى. نارەستەلەرگە جانساقتاۋ ءبولىمىنىڭ ماماندارى تاراپىنان دا ەرەكشە كۇتىم جاسالعان.

جانساۋلە دوسپانوۆا ۇشەم بوساناتىنىن العاش ەستىگەن كەزدە قاتتى قوبالجىعانىن ايتادى. ال، كەيىننەن دارىگەرلەر كەسار تىلىگى ارقىلى وتا جاساعان.

«كۇتپەگەن جەردەن دارىگەرگە قارالىپ، ۇشەمدى بولاتىنىمدى ەستىگەندە باسقاشا سەزىمدە بولدىم. جالپى، 5 بالالى بولعان سوڭ، ءسابيلى بولۋدى جوسپارلاماعانبىز»، - دەيدى ول.

ۇشەمدەرگە تۋىستارى ناريمان، نۇريمان جانە نۇرمان ەسىمدەرىن قويدى.

ايتا كەتەيىك، تۇركىستان وبلىسىنىڭ 2-پەريناتالدىق ورتالىعىندا 2024-جىلى 24 ەگىز بەن 1 ۇشەم دۇنيەگە كەلدى.