تۇركىستان تۋرالى الەمدىك دەڭگەيدەگى فيلم تۇسىرىلەدى - سەرگەي دۆورتسيەۆوي
تۇركىستان تۋرالى الەمدىك دەڭگەيدەگى فيلم تۇسىرىلەدى. بۇل تۋرالى رەجيسسەر سەرگەي دۆورتسيەۆوي تۇركىستان وبلىسىنىڭ اكىمى دارحان ساتىبالدىمەن كەزدەسۋىندە ايتتى، دەپ حابارلايدى Kazinform.
شىتىرمان دراما جانرىنداعى تاريحي كينوتۋىندىعا شەتەل ارتىستەرى مەن قازاقستاننىڭ كينو جۇلدىزدارى قاتىسادى دەپ جوسپارلانىپ وتىر. سونداي- اق، تاريحي تۇلعالاردىڭ وبرازى دا كينودان كورىنىس تابادى. تۋىندىنىڭ نەگىزگى بولىكتەرى تۇركىستان قالاسى مەن قارناق اۋىلىندا تۇسىرىلەدى. ال، سەناري ازىرگە قۇپيا.
«بۇل وتە ۇلكەن جۇمىس بولماق. الەمنىڭ بىرنەشە ەلىنىڭ وكىلدەرى باس قوسقان مەگا جوباعا دايىندىق جۇمىستارى جۇرگىزىلىپ جاتىر. كاستينگ قازاقستاندا دا وتەدى. ءوزىم وسى وڭتۇستىكتە تۋىپ وسكەن سوڭ بۇل تاقىرىپ مەن ءۇشىن اسا ماڭىزدى، جانىما جاقىن. سوڭعى سەگىز ايدان بەرى تاريحي فاكتىلەردى وقىپ، يران، قىتاي تىلدەرىندە جازىلعان دۇنيەلەرمەن تانىسىپ ءجۇرمىن. سونى جيناقتاپ، الەمدى تاڭ قالدىراتىن دۇنيە شىعارۋعا دايىنمىن. بۇل دەڭگەيى مەن ساپاسى بولەك، 2-3 جىلدا مۇراعاتقا كەتەتىن ەمەس، جىلدار بويى ساقتالاتىن وشپەس تۋىندى بولادى»، - دەدى سەرگەي دۆورتسيەۆوي.
ءوڭىر باسشىسى ەلىمىزدىڭ كينەماتوگرافيا سالاسىن دامىتۋعا ۇلەسىن قوسىپ جۇرگەن جانە ونىڭ الەمدىك دەڭگەيدە تانىمال بولۋىنا قوسقان ۇلەسى ءۇشىن كينورەجيسسەر سەرگەي دۆورتسيەۆويعا شىنايى العىسىن ءبىلدىردى. تاريحتى دارىپتەيتىن باستاماسىنا قولداۋ كورسەتىلەتىنىن جەتكىزدى.
