تۇركىستان حالقى كۇندە تاساتتىق بەرىپ جاتىر - دەپۋتات وڭىردەگى قۋاڭشىلىق ماسەلەسىن كوتەردى

استانا. KAZINFORM - ماجىلىستە ءوتىپ جاتقان ۇكىمەت ساعاتىندا دەپۋتات ۇلاسبەك سادىبەكوۆ تۇركىستان وبلىسىنىڭ بىرنەشە اۋدانى قۋاڭشىلىقتان زارداپ شەگىپ جاتقانىن ءمالىم ەتتى.

- بيىل ەلدىڭ ءبىراز ءوڭىرىن قۋاڭشىلىق جايلاپ، تۇرعىنداردىڭ تىنىس- تىرشىلىگىنە ەداۋىر قيىندىق اكەلىپ وتىر. اسىرەسە تۇركىستان وبلىسىنىڭ بايدىبەك، سوزاق اۋداندارىنا قۋاڭشىلىق سالدارى وتە اۋىر ءتيىپ جاتىر. ءشوپ شىقپاي، جايىلىمداردىڭ قۋراپ كەتۋى سۋ كوزدەرىنىڭ تارتىلۋى كۇندەلىكتى تۇرمىسقا تىكەلەي اسەر ەتىپ وتىر. مالعا ازىق تابۋ مۇڭعا اينالعان حالىق كۇندە تاساتتىق بەرىپ، تاڭىرگە جالبارىنىپ وتىر. كەشە عانا بايدىبەك اۋدانىنداعى ەگىننىڭ باسىندا بولدىم. ەندى جاڭبىردان كۇدەرىن ءۇزىپ، ەككەن ەگىنىمىز كومباين وراعىنا ىلىنسە ەكەن دەپ قۇدايدان تىلەپ وتىر. سۋ ۇنەمدەۋ جولدارى نەگە حالىق اراسىندا كەڭىنەن قولدانىلماي جاتىر، - دەپ سۇرادى دەپۋتات.

سۋ رەسۋرستارى جانە يرريگاتسيا ءمينيسترى نۇرجان نۇرجىگىتوۆ بىلتىر سۋ ۇنەمدەۋ جۇيەسىن ەنگىزگەن شارۋالارعا تولەنەتىن سۋبسيديا كولەمىن كوتەرگەندەرىن ايتتى.

- سۋبسيديا تولەنەتىن شىعىن كولەمىن 50 پايىزدان 80 پايىزعا كوتەردىك. ونىڭ 30 پايىزى جەرگىلىكتى اكىمدىك بيۋدجەتىنەن بەرىلەدى. سۋ ۇنەمدەۋ تەحنولوگيالارىن ەنگىزگەن شارۋا قوجالىقتارىنا بەرىلەتىن سۋبسيديا 2027 -جىلعا دەيىن شىعىنداردىڭ 85 پايىزىنا دەيىن وسەدى. ال سۋ ۇنەمدەۋ تەحنولوگياسىن ەنگىزبەگەندەرگە بەرىلەتىن اعىن سۋ الۋ سۋبسيدياسى 30 پايىزعا دەيىن تۇسەدى، - دەدى مينيستر.

ۆەدومستۆو باسشىسى مەملەكەت ەرەجە مەن زاڭدار نەگىزىندە سۋ ۇنەمدەيتىن تەحنولوگيالاردى ەنگىزۋگە بارلىق مۇمكىندىكتەردى جاساپ وتىرعانىن ايتتى.

- سۋ ۇنەمدەۋ قۇرالدارىن شىعاراتىن ەكى زاۋىتىمىز بار. 2024 -جىلى ىسكە قوسىلعان. تولىق قۋاتىن ەندى شىعايىن دەپ وتىر. بىلتىر جاڭبىرلاتىپ سۋارۋ جۇيەسى 70 مىڭ گەكتارعا ورناتىلسا، سونىڭ 7 مىڭ گەكتارىن وتاندىق زاۋىتتار شىعاردى. بيىل وسى زاۋىتتارعا 30 مىڭ گەكتار جەرگە قاجەتتى تاپسىرىس ءتۇستى، - دەدى نۇرجان نۇرجىگىتوۆ.