تۇركيامەن پارلامەنتارالىق سەرىكتەستىكتى ودان ءارى نىعايتۋعا مۇددەلىمىز - قوشانوۆ
انكارا. KAZINFORM - تۇركيا ۇلى ۇلتتىق ءماجىلىسىنىڭ ءتوراعاسى نۋمان كۋرتۋلمۋشتىڭ شاقىرۋىمەن ءماجىلىس ءتوراعاسى ەرلان قوشانوۆ جانە ءبىر توپ دەپۋتات تۇركياعا رەسمي ساپارمەن باردى.
انكارا قالاسىندا دەپۋتاتتار پارلامەنت باسشىلىعىمەن كەزدەسىپ، ەكى ەل اراسىنداعى ستراتەگيالىق ارىپتەستىك پەن پارلامەنتارالىق قارىم- قاتىناستى دامىتۋ ماسەلەلەرىن تالقىلادى.
نۋمان كۋرتۋلمۋشپەن كەزدەسۋدە ءماجىلىس ءتوراعاسى ارىپتەسىن تۇركيا ۇلى ۇلتتىق ءماجىلىسىنىڭ 105 جىلدىعىمەن جانە ۇلتتىق ەگەمەندىك كۇنىمەن قۇتتىقتادى. ەرلان قوشانوۆ 100 جىلدا تۇركيانىڭ عالامات جەتىستىكتەرگە قول جەتكىزگەنىن اتاپ ءوتىپ، قوس مەملەكەتتىڭ اراسىندا شىنايى دوستىق پەن تۋىستىق بايلانىسقا نەگىزدەلگەن بەرىك ىنتىماقتاستىق ورناعانىنا ايرىقشا نازار اۋداردى.
- مەملەكەتتەرىمىزدىڭ اراسىنداعى قارىم- قاتىناس ەرەكشە جاقىن دەر ەدىم. بۇل جاقىندىعىمىزدى ەكى ەل كوشباسشىلارى اراسىنداعى باۋىرلىق بايلانىستان- اق اڭعارۋعا بولادى. پرەزيدەنتتەرىمىزدىڭ اراسىندا مىزعىماس دوستىق، سىيلاستىق بايلانىس بار. ولار وتە ءجيى كەزدەسىپ تۇرادى. ءار كەزدەسۋى ىنتىماقتاستىقتى تەرەڭدەتۋگە زور سەرپىن بەرەدى. ءدال وسىنداي دوستىق قارىم-قاتىناس پارلامەنت دەڭگەيىندە دە قالىپتاستى. الدا ءبىز ءوز تاراپىمىزدان ەكى ەل باسشىلارىنىڭ ۋاعدالاستىقتارىن زاڭنامالىق تۇرعىدا جۇزەگە اسىرامىز، - دەدى پالاتا سپيكەرى.
پارلامەنتارالىق ىنتىماقتاستىقتىڭ پەرسپەكتيۆالارى اڭگىمەنىڭ وزەگىنە اينالدى. بۇل رەتتە تاراپتار زاڭ شىعارۋ باعىتىنداعى بايلانىستى تەرەڭدەتۋگە كەلىستى.
- ءبىزدىڭ دەپۋتاتتارىمىز دا ءبىر-بىرىمەن ءجيى كەزدەسىپ تۇرادى. پارلامەنت - حالىق وكىلدەرى جينالاتىن ورىن. سوندىقتان ءبىز حالىقتىڭ وكىلدەرى رەتىندە ەكى ەلدىڭ تىعىز ارالاسۋىنا، جاقىنداسۋىنا جول اشامىز. پارلامەنتتىك ديپلوماتيانىڭ ميسسياسى دا وسى. ءبىر-بىرىمىزدەن ۇيرەنەتىن تۇستارىمىز از ەمەس. ءبىز تۇركيامەن پارلامەنتارالىق سەرىكتەستىكتى ودان ءارى نىعايتۋعا مۇددەلىمىز، - دەدى ءماجىلىس سپيكەرى.
تاراپتار كوپجاقتى فورماتتا دا ىقپالداستىقتى تەرەڭدەتۋگە قىزىعۋشىلىق تانىتىپ وتىر. بۇل رەتتە تۇركى مەملەكەتتەرى پارلامەنتتىك اسسامبلەياسى اياسىنداعى جۇمىسقا ەرەكشە ءمان بەرىلەدى. اتالعان ۇيىمعا ءتوراعالىق بيىل قازاقستانعا وتەدى. 11-12-ماۋسىمدا استانادا تۇركپا- نىڭ وتىرىسى جوسپارلانۋدا. وعان تۇرىك تاراپى قاتىساتىنىن ايتتى.
تۇركيا ۇلى ۇلتتىق ءماجىلىسىنىڭ ءتوراعاسى ءوز سوزىندە قازاق-تۇرىك ىنتىماقتاستىعى بارلىق سالادا قارقىندى دامي بەرەتىنىن اتاپ ءوتتى.
- قازاقستاننىڭ ءار جەتىستىگىنە شىن قۋانامىز. بىلتىر قازاقستاندا رەسمي ساپارمەن بولدىم. پرەزيدەنت قاسىم- جومارت توقايەۆپەن جانە وزىڭىزبەن وتكەن كەزدەسۋلەردە ەكى ەل اراسىندا بايلانىستى ودان ءارى جەتىلدىرۋگە ىقپال ەتەتىن ماڭىزدى تاقىرىپتاردى تالقىلادىق. بۇگىن سول اڭگىمەنى جالعاستىرىپ جاتىرمىز. ءبىز دوستىق توپتارىمىزدىڭ جانە حالىقارالىق ۇيىمداردىڭ اياسىندا بىرلەسكەن جۇمىستى نىعايتامىز، - دەدى نۋمان كۋرتۋلمۋش.
مەملەكەتارالىق قاتىناستاردى دامىتۋدا پارتياارالىق بايلانىستىڭ دا ماڭىزى زور. قوس تاراپ بۇل سالادا دا جۇمىستى ىلگەرىلەتۋگە دايىن ەكەنىن جەتكىزدى. بۇدان بولەك، ساۋدا- ەكونوميكا، اۋىل شارۋاشىلىعى، اسكەري- تەحنيكالىق سالاداعى سەرىكتەستىك ماسەلەلەرى ورتاعا سالىندى. مادەني-گۋمانيتارلىق قاتىناستى تەرەڭدەتۋ جايى دا كەڭىنەن ءسوز بولدى.
ساپار بارىسىندا دەلەگاتسيا مۇشەلەرى اتاتۇرىك كەسەنەسىنە گۇل شوقتارىن قويۋ راسىمىنە قاتىسىپ، مۇستافا كەمال اتاتۇرىكتىڭ رۋحىنا تاعزىم ەتتى. ءماجىلىس سپيكەرى قۇرمەت كىتابىنا جازبا قالدىرىپ، تاۋەلسىزدىك سوعىسى مۇراجايىن جانە پرەزيدەنت جانىنداعى ۇلت كىتاپحاناسىن ارالادى.
