تۇركيالىق ينۆەستورلار اۋىل شارۋاشىلىعى تەحنيكاسىن شىعاراتىن زاۋىت سالۋعا كىرىستى

استانا. قازاقپارات - تۇركيانىڭ اۋىل شارۋاشىلىعى تەحنيكالارىن ءوندىرۋشى ءىرى كومپانيالارى دا قازاقستاندا زاۋىت سالۋعا نيەتتى، دەپ حابارلايدى 24kz.

انكارا جانە كونيا قالالارىندا قازاقستاننىڭ اۋىل شارۋاشىلىعى مينيسترلىگى دەلەگاتسياسىمەن كەزدەسكەن تۇركيالىق كاسىپكەرلەر وسىلاي دەدى. اسىرەسە، ەگىستىك القاپتارىن سۋارۋ تەحنيكالارىن شىعاراتىن كومپانيالار قازاقستان نارىعىنا كىرۋگە مۇددەلى. ەلىمىزدە سۋدى ءتيىمدى پايدالانۋ جاعى دۇرىس جولعا قويىلماعان.

«تامشىلاتىپ جانە جاڭبىرلاتىپ سۋارۋ ادىستەرىن كەڭىنەن قولدانۋ ارقىلى مول ءونىم الۋعا بولادى»، - دەيدى ماماندار. بۇگىندە تۇركيالىق ينۆەستورلاردىڭ قاتىسۋىمەن قىزىلوردا جانە اتىراۋ وبلىستارىندا ەگىستىك سۋارۋ قۇرىلعىلارىن شىعاراتىن زاۋىت سالۋ جۇمىستارى باستالىپ كەتتى.

زۋبەير اكىن، تۇركيالىق كاسىپكەر:

- قازاقستاندا كومپانيامىزدى اشىپ، زاۋىت سالۋ جۇمىستارىنا كىرىستىك. ءبىز تەك زاۋىت سالىپ قانا قويماي، تامشىلاتىپ سۋارۋ تەحنولوگياسىن جەرگىلىكتى شارۋالارعا ۇيرەتۋ ماسەلەسىن دە قولعا الامىز. سەبەبى قازاقستاندا سۋدى ءتيىمدى پايدالانۋ ماسەلەسى وزەكتى. بۇل تۇرعىدا بىزگە اۋىل شارۋاشىلىعى مينيسترلىگى دە جەرگىلىكتى اكىمدىك تە جان-جاقتى قولداۋ كورسەتىپ وتىر.

ابدۋلعاني اشراف، تۇركيالىق كاسىپكەر:

- قازاقستانعا 2019 -جىلدان بەرى ەگىستىك القاپتارىن سۋارۋ تەحنيكاسىن ساتىپ كەلەمىز. ەندى اتىراۋدا ءبىر زاۋىت سالۋدى جوسپارلاپ وتىرمىز. كەلەسى جىلى زاۋىتىمىزدى اشىپ، ءوندىرىستى سول جاقتا جاساماقپىز. قازاقستان مەملەكەتى تاراپىنان جەرگىلىكتى وندىرۋشىلەرگە جەڭىلدىكتەر كوپ. وسىنى پايدالانىپ، زاۋىتىمىزدى سول جاقتا اشىپ، كورشىلەس ەلدەرگە دە تەحنيكامىزدى ساتامىز دەگەن ويدامىز.