تۇركيادان وقۋدان كەلىپ، اسكەريلەر كۇشتەپ اكەتكەن ستۋدەنت بوساتىلدى

استانا. KAZINFORM - تۇركيادا وقىپ جۇرگەن ستۋدەنتتى قازاقستان اۋماعىندا اسكەريلەردىڭ كوشەدەن الىپ كەتۋى جاعدايى بويىنشا ماسەلە شەشىلدى. بۇل تۋرالى قورعانىس ءمينيسترىنىڭ ءبىرىنشى ورىنباسارى سۇلتان قامالەتدينوۆ ءمالىم ەتتى.

سەناتتىڭ جالپى وتىرىسىنان كەيىن تىلشىلەر: «ول بالا وزگە مەملەكەتتە ءبىلىم الىپ جاتىر. ەندى، اسكەرگە كەتە مە؟»، - دەپ سۇرادى.

ءوز كەزەگىندە قورعانىس ءمينيسترىنىڭ ءبىرىنشى ورىنباسارى بۇل ماسەلە شەشىلگەنىن ايتتى.

- مۇنداي فاكت تىركەلگەن. تۇركيادان قازاقستانعا دەمالىسقا كەلگەن ستۋدەنتتى اسكەري كوميسسارياتقا الىپ كەلگەن… بۇل ماسەلە شەشىلدى، ياعني ونى كوميسسارياتتان بوساتتى. قازىر ول ءوز شارۋالارىمەن اينالىسىپ ءجۇر، - دەدى سۇلتان قامالەتدينوۆ.

ەسكە سالساق، الەۋمەتتىك جەلىدە تۇركيادا وقىپ جۇرگەن قازاقستاندىق ستۋدەنتتى اسكەريلەردىڭ كوشەدەن الىپ كەتكەنى تۋرالى حابارلانعان ەدى.

بۇعان دەيىن قورعانىس ءمينيسترىنىڭ ءبىرىنشى ورىنباسارى سۇلتان قامالەتدينوۆ جاستاردى اسكەرگە كۇشتەپ اكەتۋ ءىس-قيمىلدارىنا پىكىر ايتتى.

اۆتور

رۋسلان عابباسوۆ