تۇركياداعى ورمان ءورتى بىرنەشە ايماقتى شارپىدى

  استانا. KAZINFORM - تۇركيانىڭ يزمير، چاناككالە، ايدىن جانە بۋرسا پروۆينتسيالارىندا ورماندى دالا ايماقتارى ورتەنىپ جاتىپ. ءورتتىڭ جالپى اۋماعى مىڭ گەكتاردان اسادى. ءتىلسىز جاۋمەن كوپتەگەن تەحنيكا مەن ءورت ءسوندىرۋ ۇشاقتارى كۇرەسۋدە.

قالا بيلىگىنىڭ ءبىر بولجامى بويىنشا، يزميردەگى ورتكە لاقتىرىلعان تەمەكى تۇقىلى سەبەپ بولعان. تۇركيانىڭ سولتۇستىك-باتىسىنداعى چاناككالە پروۆينتسياسىندا دا وتقا ابايسىز قاراۋ سالدارىنان ءورت شىقتى. ايدىن جانە بۋرسا پروۆينتسيالارىندا ءورتتىڭ شىعۋ سەبەپتەرى ءالى انىقتالعان جوق. ەلدىڭ باسقا ايماقتارىندا قاتتى اپتاپ ىستىققا بايلانىستى ءورت شىعۋ قاۋپى ساقتالۋدا.

تۇركيانىڭ اۋىل شارۋاشىلىعى جانە ورمان شارۋاشىلىعى مينيسترلىگىنىڭ مالىمەتىنشە، يزميردە 16 ورمان ءورتى تىركەلگەن. ءورت كاراكاداگ، مەندەرەس، مەنەمەن، سەلچۋك، توربالى، چەشمە جانە باسقا اۋدانداردا بولدى. ەڭ كوپ زارداپ شەككەن ايماقتار - سەلچۋك پەن مەندەرەس، مۇندا جالىن قاتتى جەلدەن تەز تاراعان. جالىنمەن كۇرەسكە 170 تەن استام سۋ تاسىعىش كولىك، قۇرىلىس تەحنيكاسى، 11 ۇشاق، 27 تىكۇشاق، سونداي- اق 1000 عا جۋىق ءورت ءسوندىرۋشى مەن قاراپايىم ەرىكتىلەر جۇمىلدىرىلعان.

قاۋىپسىزدىك ماقساتىندا جەكەلەگەن ايماقتاعى تۇرعىندار قاۋىپسىز جەرگە جەتكىزىلدى. كەيبىر اۋداندارداعى ءورت پەن قويۋ تۇتىننەن ەكى قوناقۇي مەن بىرنەشە ءۇي تۇرعىندارى ەۆاكۋاتسيالاندى. دەگەنمەن، جەرگىلىكتى بيلىك وكىلدەرىنىڭ ايتۋىنشا، ءورتتى ءسوندىرۋ جۇمىستارى جاقسى جۇرگىزىلىپ جاتىر.

قازىرگى ۋاقىتتا چەشمە، مەندەرەس، مەنەمەن، سەلچۋك جانە توربالى ايماقتارىندا ءورتتى وقشاۋلاۋ جۇمىستارى جالعاسۋدا. مەندەرەس وڭىرىندەگى ورمان القابىندا تۇتانعان ءورتتى اۋەدەن سوندىرۋگە ارنايى ماشينالار مەن تەحنيكا جۇمىلدىرىلعان.

تۇركيادا جىل باسىنان بەرى بارلىعى 1551 ءورتتىڭ، ونىڭ ىشىندە 880 نەن استام ورمان ءورتىنڭ جانە 670 ءى اۋىلشارۋاشىلىق ءورتىنىڭ الدىن الۋ جۇمىستارى جۇرگىزىلگەنى بۇرىن حابارلانعان بولاتىن.