تۇركياداعى ورمان ءورتى: 17 ادام قاماۋعا الىندى

استانا. KAZINFORM -   تۇركيانىڭ ءارتۇرلى ايماقتارىندا 15 كۇن ىشىندە ورمان ورتىنە قاتىسى بار 17 ادام قاماۋعا الىندى. بۇل تۋرالى تۇركيانىڭ ادىلەت ءمينيسترى يىلماز تۋنچ مالىمدەدى، دەپ حابارلايدى ازەرتادج.

مينيستر وتانداستارىن ەلدىڭ ورمان القاپتارىن قورعاۋعا شاقىردى جانە ونى «جاسىل وتان» دەپ اتادى. سونىمەن قاتار تۇركيا ۆيتسە- پرەزيدەنتى دجيەۆدەت يىلماز كليماتتىڭ وزگەرۋ سالدارىمەن كۇرەستىڭ تيىمدىلىگىن ارتتىرۋ مىندەتىن كوزدەيتىن تاۋەكەلدەردى باسقارۋ ورتالىعىن قۇرۋ تۋرالى جاريالادى.

تۇرىك بيلىگىنىڭ مالىمەتىنشە، ءورت سوندىرۋشىلەر مەن ەرىكتىلەر 25 شىلدەدە 73 ورمان ورتىمەن كۇرەسكەن، ولاردىڭ باسىم كوپشىلىگى ادامنىڭ كىناسىنەن بولعان.

حابارلانعانداي، تۇركيادا جۇما كۇنى 25 -شىلدەدە جاڭا تەمپەراتۋرا رەكوردى تىركەلدى.

ەسكيشەحير پروۆينتسياسىندا دالا ءورتىن ءسوندىرۋ كەزىندە قازا تاپقان 10 ادامنىڭ ءمايىتى د ن ق ساراپتاماسى ءۇشىن انكاراعا اكەلىنگەن.

شىلدە ايىنىڭ باسىندا تۇركيانىڭ ورمان القاپتارى مەن اۋىلشارۋاشىلىق ايماقتارىندا 260-تان استام ءورت بولدى.

ءورت ەلدىڭ باتىسىنداعى ءبىرقاتار پروۆينتسيادا، اتاپ ايتقاندا يزميردە تىركەلدى. اۋماقتى ءتۇتىن باسىپ، ءورت ءسوندىرۋ اۆياتسياسىنىڭ جۇمىسى كەزىندە حالىقارالىق اۋەجاي ۋاقىتشا جابىلدى.

وڭتۇستىك مەرسين جانە حاتاي پروۆينتسيالارىنىڭ ورماندارىندا، سونداي-اق انتاليا مەن مۋگلا كۋرورتتىق پروۆينتسيالارىندا ءورت تىركەلدى.

ايتا كەتەيىك، تۇركيادا بۇرىن-سوڭدى بولماعان اپتاپ: تەرمومەتر باعانى 50 گرادۋستان استى.