تۇركياداعى قارا تەڭىزدەن جاڭا گاز كەن ورنى تابىلدى
استانا. KAZINFORM - سوڭعى جىلدارداعى ماڭىزدى ەنەرگەتيكالىق جاڭالىقتاردىڭ ءبىرىن تۇركيا جاريا ەتتى، دەپ حابارلادى Kazinform اگەنتتىگىنىڭ مەنشىكتى ءتىلشىسى.
تۇركيانىڭ ەنەرگەتيكا جانە تابيعي رەسۋرستار مينيسترلىگىنىڭ مالىمەتىنشە، ساكاريا گاز كەن ورنىنداعى Gِktepe-3 ۋچاسكەسىندە 49 كۇندىك بۇرعىلاۋ جۇمىستارىنان كەيىن تابيعي گاز قورى تابىلدى. جالپى كولەمى - 75 ميلليارد تەكشە مەتر، بۇل شامامەن 30 ميلليارد دوللارعا باعالانىپ وتىر.
الدىن الا ەسەپتەۋلەر بويىنشا، بۇل كولەم تۇركيانىڭ ىشكى سۇرانىسىن 3,5 جىل بويى قامتاماسىز ەتە الادى. جاڭا كەن ورنى ەلدىڭ ەنەرگەتيكالىق تاۋەلسىزدىگىن نىعايتا تۇسەدى جانە انكارانىڭ جانارماي يمپورتىنا تاۋەلدىلىكتى ازايتۋ جونىندەگى اۋقىمدى ستراتەگياسىنىڭ ءبىر بولىگى سانالادى.
تۇركيانىڭ ەنەرگەتيكا جانە تابيعي رەسۋرستار ءمينيسترى الپارسلان بايراكتار تابىلعان كەن ورنىن يگەرۋ جۇمىستارى جەدەلدەتىلەتىنىن، وندىرىستىك اۋقىمداعى گاز ءوندىرۋدى مۇمكىندىگىنشە تەز باستاۋ كوزدەلىپ وتىرعانىن مالىمدەدى. جاڭا كەن ورنى ەنەرگيا تاسىمالداۋشىلارىن يمپورتتاۋعا جۇمسالاتىن شىعىندى ەداۋىر ازايتىپ، تۇركيانىڭ ايماقتاعى ەنەرگەتيكالىق ويىنشى رەتىندەگى ورنىن كۇشەيتەدى دەپ كۇتىلەدى.
بايراكتاردىڭ ايتۋىنشا، Gِktepe-3-تەگى گاز قورىنىڭ تابىلۋى قارا تەڭىز قايراڭىنىڭ بولاشاعى زور ەكەنىن جانە تۇركيانىڭ ەنەرگەتيكالىق ينفراقۇرىلىمدى دامىتۋداعى جەتىستىكتەرىن تاعى ءبىر مارتە دالەلدەيدى.
بۇعان دەيىن ءبىز تۇركيانىڭ جاڭا ىگدىر-ناحچىۆان گاز قۇبىرى ارقىلى ازەربايجانعا گاز جەتكىزۋدى رەسمي تۇردە باستاعانىن حابارلاعان بولاتىنبىز. كوگىلدىر وتىن وسى جاڭا باعىتپەن تاسىمالداناتىن بولادى.
